Last Updated:
Actor Sathyendra: ಸತ್ಯೇಂದ್ರ ಅವರು ಆರೋಗ್ಯ ಸಮಸ್ಯೆಗಳಿಂದ ಬಳಲುತ್ತಿದ್ದು, ರಾಯಪೆಟ್ಟಾ ಸರ್ಕಾರಿ ಆಸ್ಪತ್ರೆಯಲ್ಲಿ ನಿಧನರಾದರು. ಆದರೆ ಅವರ ಶವ ತೆಗೆದುಕೊಂಡು ಹೋಗಲು ಇದುವರೆಗೂ ಮನೆಯವರ್ಯಾರು ಬಂದಿಲ್ಲ. ಹೀಗಾಗಿ ಸರ್ಕಾರಿ ಆಸ್ಪತ್ರೆಯ ಶವಾಗಾರದಲ್ಲೇ ನಟ ಸತ್ಯೆಂದ್ರ ಶವ ಅನಾಥವಾಗಿ ಇದ್ಯಂತೆ!
ಚೆನ್ನೈ: ತಮಿಳುನಟ (Tamil actor) ಹಾಗೂ ಯೂಟ್ಯೂಬರ್ (YouTuber) ಸತ್ಯೇಂದ್ರ (Sathyendra) ನಿಧನರಾಗಿದ್ದಾರೆ. 65 ವರ್ಷದ ಸತ್ಯೇಂದ್ರ ಅವರು ಆರೋಗ್ಯ ಸಮಸ್ಯೆಗಳಿಂದ ಬಳಲುತ್ತಿದ್ದು, ರಾಯಪೆಟ್ಟಾ ಸರ್ಕಾರಿ ಆಸ್ಪತ್ರೆಯಲ್ಲಿ (Royapettah Government Hospital) ಕೊನೆಯುಸಿರೆಳೆದರು. ಆದರೆ ಅವರ ಶವ ತೆಗೆದುಕೊಂಡು ಹೋಗಲು ಇದುವರೆಗೂ ಮನೆಯವರ್ಯಾರು ಬಂದಿಲ್ಲ. ಹೀಗಾಗಿ ಸರ್ಕಾರಿ ಆಸ್ಪತ್ರೆಯ ಶವಾಗಾರದಲ್ಲೇ (hospital morgue) ನಟ ಸತ್ಯೆಂದ್ರ ಶವ ಅನಾಥವಾಗಿ ಇದ್ಯಂತೆ!
ನಟ ಮತ್ತು ಯೂಟ್ಯೂಬರ್ ಸತ್ಯೇಂದ್ರ ಅವರ ನಿಧನವು ತಮಿಳು ಚಲನಚಿತ್ರೋದ್ಯಮಕ್ಕೆ ಶಾಕ್ ನೀಡಿದೆ. ಚೆನ್ನೈನಲ್ಲಿ ಅವರು ನಿಧನರಾದ ಕೆಲವು ದಿನಗಳ ನಂತರವೂ, ಆಸ್ಪತ್ರೆಯ ಶವಾಗಾರದಲ್ಲಿ ಅವರ ಮೃತದೇಹವು ಅನಾಥವಾಗಿ ಬಿದ್ದಿದೆ. ಮೃತದೇಹಕ್ಕೆ ಹಕ್ಕುದಾರರು ಅಥವಾ ಅವರ ಕುಟುಂಬಸ್ಥರು ಯಾರೂ ಮುಂದೆ ಬಾರದ ಕಾರಣ, ಅನಾಥವಾಗಿ ಶವವಾಗಿ ಇದ್ದಾರೆ.
ಚಲನಚಿತ್ರಗಳು, ಕಿರುಚಿತ್ರಗಳು ಮತ್ತು ಡಿಜಿಟಲ್ ಪ್ಲಾಟ್ಫಾರ್ಮ್ಗಳಲ್ಲಿ ಸತ್ಯೇಂದ್ರ ಫೇಮಸ್ ಆಗಿದ್ದರು. ಅವರು ಹಲವಾರು ದಶಕಗಳು ಮತ್ತು ಬಹು ಭಾಷೆ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಆಂಧ್ರಪ್ರದೇಶ ಮೂಲದವರಾದ ಸತ್ಯೇಂದ್ರ ಕರ್ನಾಟಕದಲ್ಲಿ ಬೆಳೆದರು. ಅವರ ತಂದೆ ಸ್ವತಂತ್ರ ಭಾರತದ ಮೊದಲ ಸರ್ಕಲ್ ಇನ್ಸ್ಪೆಕ್ಟರ್ ಆಗಿ ಸೇವೆ ಸಲ್ಲಿಸಿದ್ದರು ಅಂತ ಆಗಾಗ್ಗೆ ಮಾತನಾಡುತ್ತಿದ್ದರು. ತಂದೆಯ ಮರಣದ ನಂತರ, ಸತ್ಯೇಂದ್ರ ರಂಗಭೂಮಿ ಮತ್ತು ಪ್ರದರ್ಶನ ಕಲೆಗಳ ಕಡೆಗೆ ಆಕರ್ಷಿತರಾದರು, ಅಂತಿಮವಾಗಿ ಸಿನಿಮಾ ಕ್ಷೇತ್ರಕ್ಕೆ ಕಾಲಿಟ್ಟರು.
ಸತ್ಯೆಂದ್ರ ಮೊದಲು ನಟಿಸಿದ್ದು ಕನ್ನಡ ಸಿನಿಮಾದಲ್ಲಿ. ರಾಷ್ಟ್ರ ಪ್ರಶಸ್ತಿ ವಿಜೇತ ಕನ್ನಡ ಸಿನಿಮಾ ಗ್ರಹಣದ ಮೂಲಕ ತಮ್ಮ ಸಿನಿ ಕರಿಯರ್ ಆರಂಭಿಸಿದರು. ಬಳಿಕ ತಮಿಳು ಸೇರಿದಂತೆ ಹಲವು ಭಾಷೆಯ 60ಕ್ಕೂ ಹೆಚ್ಚು ಚಲನಚಿತ್ರಗಳಲ್ಲಿ ಕಾಣಿಸಿಕೊಂಡರು. ನಂತರ 150ಕ್ಕೂ ಹೆಚ್ಚು ಕಿರುಚಿತ್ರಗಳಲ್ಲಿ ಕಾಣಿಸಿಕೊಂಡರು. ತಮಿಳು, ತೆಲುಗು ಮತ್ತು ಕನ್ನಡ ಚಿತ್ರರಂಗದಲ್ಲಿ ಕೆಲಸ ಮಾಡಿದರು. ಇದಾದ ಮೇಲೆ ಅವರು ತಮ್ಮ YouTube ಚಲನಚಿತ್ರ ವಿಮರ್ಶೆಗಳ ಮೂಲಕ ಪ್ರೇಕ್ಷಕರಲ್ಲಿ ಪರಿಚಿತ ಮುಖವಾದರು.
ನಟನೆಯ ಹೊರತಾಗಿ, ಸತ್ಯೇಂದ್ರ ಅವರು ಉದ್ಯಮದಲ್ಲಿ ಅನೇಕ ಕೆಲಸಗಳನ್ನು ಮಾಡಿದರು. ಅವರು ನಿರ್ದೇಶಕ, ನಿರ್ಮಾಪಕ, ಅನುವಾದಕ ಮತ್ತು ಚಲನಚಿತ್ರ ವಿಮರ್ಶಕರಾಗಿ ಕೆಲಸ ಮಾಡಿದರು. ಶೈಕ್ಷಣಿಕವಾಗಿಯೂ ಸಹ, ಅವರು ಬಲವಾದ ಹಿನ್ನೆಲೆಯನ್ನು ಹೊಂದಿದ್ದರು. ಅವರು ಕನ್ನಡ ಸಾಹಿತ್ಯ ಮತ್ತು ತತ್ವಶಾಸ್ತ್ರದಲ್ಲಿ ಸ್ನಾತಕೋತ್ತರ ಪದವಿಗಳನ್ನು, ನಾಟಕದಲ್ಲಿ ಬಿಎ ಪದವಿಯನ್ನು ಮತ್ತು ಫ್ರೆಂಚ್ ಮತ್ತು ಜರ್ಮನ್ ಭಾಷೆಗಳಲ್ಲಿ ಡಿಪ್ಲೊಮಾಗಳನ್ನು ಹೊಂದಿದ್ದರು. ಅವರು ಇಟಾಲಿಯನ್ ಮತ್ತು ಸ್ಪ್ಯಾನಿಷ್ ಭಾಷೆಗಳಲ್ಲಿ ಕಾರ್ಯ ಜ್ಞಾನವನ್ನು ಹೊಂದಿದ್ದರು ಎಂದು ವರದಿಗಳು ಹೇಳುತ್ತವೆ.
ಎಝವತು ಮಾನಿತನ್, ಮನ್ ವಸನೈ ಮತ್ತು ಕಡಮೈ ಕಣ್ಣಿಯಮ್ ಮುಂತಾದ ಸಿನಿಮಾಗಳಿಗೆ ಚಿತ್ರಕಥೆ ಬರೆದಿದ್ದಾರೆ. ಅವರು 18 ಇಯರ್ಸ್ ಸೇರಿದಂತೆ ದೂರದರ್ಶನದ ಅನೇಕ ಧಾರಾವಾಹಿಗಳಲ್ಲಿ ಪೋಷಕ ಪಾತ್ರಗಳಲ್ಲಿ ಕಾಣಿಸಿಕೊಂಡರು. ಅವರ ಅಂತಿಮವಾಗಿ ಇತ್ತೀಚಿಗೆ ರಿಲೀಸ್ ಆದ ನಟ ಸೂರ್ಯ ಅವರ ಕರುಪ್ಪ ಸಿನಿಮಾ ಬಗ್ಗೆ ಯೂಟ್ಯೂಬ್ ವಿಮರ್ಶೆ ಮಾಡಿದ್ದರು.
ವರದಿಗಳ ಪ್ರಕಾರ, ಸತ್ಯೇಂದ್ರ ಅವರನ್ನು ಚೆನ್ನೈ ಆಸ್ಪತ್ರೆಗೆ ದಾಖಲಿಸುವ ಮೊದಲು ಹಲವು ದಿನಗಳಿಂದ ಅಸ್ವಸ್ಥರಾಗಿದ್ದರು, ನಂತರ ಚಿಕಿತ್ಸೆಯ ಸಮಯದಲ್ಲಿ ಅವರು ನಿಧನರಾದರು. ಪೊಲೀಸ್ ಅಧಿಕಾರಿಗಳು ಅವರ ಸಾವನ್ನು ದೃಢಪಡಿಸಿದರು. ಆದರೆ ಅವರ ಕುಟುಂಬದ ಯಾವುದೇ ಸದಸ್ಯರು ಇನ್ನೂ ಬಾರದ ಕಾರಣ ಅವರ ದೇಹವು ಶವಾಗಾರದಲ್ಲಿಯೇ ಇದೆ ಎಂದು ಹೇಳಲಾಗುತ್ತಿದೆ.
ನಟನ ಸಾವಿನ ಸುದ್ದಿ ಹರಡುತ್ತಿದ್ದಂತೆ ತಮಿಳು ಚಲನಚಿತ್ರ ಕ್ಷೇತ್ರದ ಕೆಲವರು ಅವರ ಸಂಬಂಧಿಕರನ್ನು ಪತ್ತೆಹಚ್ಚಲು ಸಹಾಯ ಮಾಡಿದರು. ನಟ ವಿಶಾಲ್ ಈ ವಿಷಯದ ಬಗ್ಗೆ ಪೊಲೀಸ್ ಅಧಿಕಾರಿಗಳನ್ನು ಸಂಪರ್ಕಿಸಿ ಸತ್ಯೇಂದ್ರ ಅವರ ಕುಟುಂಬ ಸದಸ್ಯರನ್ನು ಪತ್ತೆಹಚ್ಚಲು ಪ್ರಯತ್ನಗಳು ನಡೆಯುತ್ತಿವೆ ಎಂದು ಹೇಳಿದರು.
