ಮೀನಾಕ್ಷಿ ಗೋಯತ್ ಜಿಂದ್ ಜಿಲ್ಲಾ ಚಾಬ್ರಿ ಗ್ರಾಮಕ್ಕೆ ಸೇರಿದ ಕುಸ್ತಿಪಟು ಆಗಿದ್ದರು. ಸದ್ಯ ಆಕೆಯ ಕುಟುಂಬ ಸೋನಿಪತ್‌ನಲ್ಲಿ ವಾಸಿಸುತ್ತಿದೆ. ವಿನೇಶ್ ಫೋಗಟ್ ಅವರ ವಿವಾಹ ಜಿಂದ್ ಜಿಲ್ಲೆಯ ಬಖ್ತಾ ಖೇರಾ ಗ್ರಾಮದಲ್ಲಿ ನಡೆದಿದ್ದನ್ನು ಇಲ್ಲಿ ಸ್ಮರಿಸಿಕೊಳ್ಳಬಹುದು. ಆದ್ದರಿಂದಲೇ ಇಬ್ಬರ ನಡುವಿನ ಫೈಟ್ ಸ್ಥಳೀಯರಿಗೆ ಭಾರೀ ಕುತೂಹಲ ಮೂಡಿಸಿತ್ತು. ಚಾಬ್ರಿ ಗ್ರಾಮದ ಜನರು ಮೀನಾಕ್ಷಿ ಗೆಲುವು ಪಡೆಯುತ್ತಾಳೆ ಎಂಬ ನಂಬಿಕೆಯೊಂದಿಗೆ ಕಾದು ಕುಳಿತಿದ್ದರು. ಕೊನೆಗೂ ಅವರ ನಂಬಿಕೆ ಉಳಿಸುವಂತೆ ಮೀನಾಕ್ಷಿ ಪ್ರದರ್ಶನ ನೀಡಿದ್ದರು.

ಮೀನಾಕ್ಷಿ ಅವರ ಗೆಲುವಿನ ಬಳಿಕ ಚಾಬ್ರಿ ಗ್ರಾಮದಲ್ಲಿ ಹಬ್ಬದ ವಾತಾವರಣ ನಿರ್ಮಾಣ ಆಗಿತ್ತು. ಗ್ರಾಮ ಪಂಚಾಯತ್ ಅಧ್ಯಕ್ಷ ರಾಕೇಶ್ ಮಾತನಾಡಿ, ಚಿಕ್ಕ ವಯಸ್ಸಿನಿಂದಲೂ ಮೀನಾಕ್ಷಿ ಅತ್ಯುತ್ತಮ ಕ್ರೀಡಾಪಟು. ಏಷ್ಯನ್ ಗೇಮ್ಸ್‌ನಲ್ಲಿ ಖಂಡಿತ ದೇಶಕ್ಕಾಗಿ ಪದಕ ಗೆಲ್ಲುತ್ತಾರೆ. ಮೀನಾಕ್ಷಿ ಮನೆಯ ಹಿರಿಯ ಮಗಳು, ಆಕೆಯ ಆಸಕ್ತಿಯನ್ನು ಗಮನಿಸಿ ಕುಟುಂಬಸ್ಥರು ಕುಸ್ತಿಯಲ್ಲಿ ಪ್ರೇರಣೆ ನೀಡಿದ್ದರು. ಆಕೆಗೆ ತರಬೇತಿ ನೀಡಲು ಜಿಂದ್‌ನಿಂದ ಸೋನಿಪತ್‌ಗೆ ಶಿಫ್ಟ್ ಆಗಿದ್ದರು. ಮೀನಾಕ್ಷಿ ಅವರ ತಂದೆ ಪ್ರೇಮ್ ಗೋಹತ್ ಅಲ್ಲಿ ಡೈರಿ ತೆಗೆದು ಜೀವನ ನಡೆಸಲು ಆರಂಭಿಸಿದ್ದರು. ಮಗಳ ಶಿಕ್ಷಣ ಹಾಗೂ ಆಹಾರ ಬಗ್ಗೆ ವಿಶೇಷ ಕಾಳಜಿ ವಹಿಸಿದ್ದರು. ಕುಸ್ತಿಯೊಂದಿಗೆ ಶಿಕ್ಷಣಕ್ಕೂ ಪ್ರಾಮುಖ್ಯತೆ ನೀಡಿದ್ದರು. ಇದರ ಪರಿಣಾಮ ಮೀನಾಕ್ಷಿ ಕುರುಕ್ಷೇತ್ರ ವಿವಿಯಿಂದ ಬಿಎ ಪದವಿ ಕೂಡ ಪಡೆದುಕೊಂಡಿದ್ದಾರೆ.

ಕಠಿಣ ಪರಿಶ್ರಮ ಹಾಕಿದ ಪರಿಣಾಮ 2016ರಲ್ಲಿ ಸಬ್ ಜೂನಿಯರ್ ರಾಷ್ಟ್ರೀಯ ಚಾಂಪಿಯನ್‌ಶಿಪ್‌ನಲ್ಲಿ ಚಿನ್ನದ ಪದಕ ಗಳಿಸಿದ್ದರು. 2019ರಲ್ಲಿ ಅಂಡರ್ 23 ರಾಷ್ಟ್ರೀಯ ಸ್ಪರ್ಧೆಯಲ್ಲಿ ಭಾಗಿಯಾಗಿದ್ದರು. ಆದರೆ ಈ ವೇಳೆ ಜಾರಿಬಿದ್ದ ಪರಿಣಾಮ ಕಾಲಿಗೆ ತೀವ್ರವಾದ ಗಾಯವಾಗಿ ಹಾಸಿಗೆ ಸೀಮಿತವಾಗಿದ್ದರು. ಈ ಗಾಯದ ಕಾರಣಕ್ಕೆ ಆಕೆ ನಡೆಯುವುದು ಕೂಡ ಕಷ್ಟವಾಗಿತ್ತು. ಸುಮಾರು 6 ತಿಂಗಳ ಕಾಲ ಹಾಸಿಗೆ ಹಿಡಿದಿದ್ದ ಮೀನಾಕ್ಷಿ, ಧೈರ್ಯ ಕಳೆದುಕೊಳ್ಳಲಿಲ್ಲ.

ಇನ್ನು, ವಿನೇಶ್ ಫೋಗಟ್ ಎರಡು ಪಂದ್ಯಗಳಲ್ಲಿ ಗೆದ್ದು ಸೆಮಿಫೈನಲ್ ತಲುಪಿದ್ದರು. ಮೊದಲ ಪಂದ್ಯದಲ್ಲಿ ಜ್ಯೋತಿ ಸಿಹಾಗ್, ಎರಡನೇ ಪಂದ್ಯದಲ್ಲಿ ನಿಶು ವಿರುದ್ಧ ಗೆದ್ದು ಬೀಗಿದ್ದರು. ಆದರೆ ಮೀನಾಕ್ಷಿ ಅವರ ಎದುರು ವಿನೇಶ್ ನಿಲ್ಲಲು ಸಾಧ್ಯವಾಗಲಿಲ್ಲ. ವಿನೇಶ್ ವಿರುದ್ಧ ಗೆದ್ದು ಮೀನಾಕ್ಷಿ ಭಾರತದ ತಂಡದಲ್ಲಿ ತಮ್ಮ ಸ್ಥಾನವನ್ನು ಖಚಿತಪಡಿಸಿಕೊಂಡಿದ್ದು, ಏಷ್ಯನ ಗೇಮ್ಸ್‌ನಲ್ಲಿ ಪದಕ ಆಸೆಯನ್ನು ಮೂಡಿಸಿದ್ದಾರೆ. ಗ್ರಾಮೀಣ ಭಾಗದಿಂದ ಬಂದು ಅಂತರಾಷ್ಟ್ರೀಯ ವೇದಿಕೆ ವರೆಗೂ ಹೋರಾಟದಿಂದಲೇ ತಲುಪಿರುವ ಮೀನಾಕ್ಷಿ, ಭಾರತಕ್ಕೆ ಚಿನ್ನದ ಪದಕ ತರುವ ಗುರಿಯನ್ನು ಹೊಂದಿದ್ದಾರೆ.