NTA neet.nta.nic.in ಮತ್ತು nta.ac.in ವೆಬ್‌ಸೈಟ್‌ಗಳಲ್ಲಿ ಅಧಿಕೃತ ಪ್ರೆಸ್ ನೋಟ್ ಮತ್ತು ಸಾರ್ವಜನಿಕ ಸೂಚನೆ ಹೊರಡಿಸಿ ಸ್ಪಷ್ಟಪಡಿಸಿದೆ. NEET 2026 ಮರು-ಪರೀಕ್ಷೆಗೆ ಹೊಸ ನೋಂದಣಿ ಅಗತ್ಯವೇ ಇಲ್ಲ. ಫೆಬ್ರವರಿ 8, 2026ರಂದು ಆರಂಭವಾಗಿ ಮಾರ್ಚ್ 11, 2026ರಂದು ಮುಕ್ತಾಯವಾದ ನೋಂದಣಿ ಪ್ರಕ್ರಿಯೆಯಲ್ಲಿ ವಿದ್ಯಾರ್ಥಿಗಳು ಸಲ್ಲಿಸಿದ ಎಲ್ಲ ವಿವರಗಳು, ಅರ್ಜಿ ಮಾಹಿತಿ, ಪರೀಕ್ಷಾ ಕೇಂದ್ರ ಆಯ್ಕೆ, ವೈಯಕ್ತಿಕ ದಾಖಲೆಗಳು ಮರು-ಪರೀಕ್ಷೆಗೂ ಯಥಾವತ್ತಾಗಿ ಮಾನ್ಯವಿರುತ್ತವೆ. ಇಷ್ಟರ ನಡುವೆ ಪರೀಕ್ಷಾ ಪ್ರವೇಶ ಪತ್ರ ಮಾತ್ರ ಹೊಸದಾಗಿ ಕೊಡಲಾಗುತ್ತದೆ ಅಷ್ಟೇ!

ಈ ನಿರ್ಧಾರ ಕೇವಲ ಪರೀಕ್ಷೆ ಬರೆದ ವಿದ್ಯಾರ್ಥಿಗಳಿಗೆ ಮಾತ್ರವಲ್ಲ ಮೇ 2026ರಲ್ಲಿ ನೋಂದಾಯಿಸಿ ಈ ಕಾರಣಕ್ಕೆ ಪರೀಕ್ಷೆ ಬರೆಯಲಾಗದ ಎಲ್ಲ ವಿದ್ಯಾರ್ಥಿಗಳಿಗೂ ಅನ್ವಯಿಸುತ್ತದೆ. ಹೆಚ್ಚುವರಿ ಶುಲ್ಕ ಸಂಪೂರ್ಣ ಶೂನ್ಯ ಎಂದು ಇಲಾಖೆ ಘೋಷಿಸಿದ್ದು ಮರು-ಪರೀಕ್ಷೆಯನ್ನು NTA ತನ್ನ ಸ್ವಂತ ಖರ್ಚಿನಲ್ಲಿ ನಡೆಸಲಿದೆ.

ಇಡೀ ಪ್ರಕ್ರಿಯೆ ಉಚಿತ ಮತ್ತು ಅಧಿಕೃತ. ಇದು ವಿದ್ಯಾರ್ಥಿಗಳ ನೆಮ್ಮದಿಗೆ ಕಾರಣವಾಗಿದೆ. ಏಕೆಂದರೆ 1000-1700 ರೂಪಾಯಿವರೆಗೆ ಅಂದಾಜು 360 ಕೋಟಿ ರೂಪಾಯಿಯವರೆಗೆ ಪರೀಕ್ಷಾ ಶುಲ್ಕವಾಗಿ NTA ಗೆ ಜಮೆಯಾಗಿತ್ತು, ಈಗ ಮತ್ತೊಂದು ಪರೀಕ್ಷೆಗೆ ಮತ್ತದೇ ನೋಂದಣಿ ಗುದ್ದಾಟ ನಡೆಯಲಿದೆಯೇ? ಅಷ್ಟೇ ಹಣ ತುಂಬಬೇಕೆ ಎಂಬ ಆಕಾಂಕ್ಷಿಗಳ ತಳಮಳಕ್ಕೆ ಇಲಾಖೆ ತಿಲಾಂಜಲಿ ಇಟ್ಟಿದೆ.

NTA ವಿದ್ಯಾರ್ಥಿಗಳು ಮತ್ತು ಪೋಷಕರನ್ನು ಸಾಮಾಜಿಕ ಮಾಧ್ಯಮಗಳಲ್ಲಿ ಹರಡುತ್ತಿರುವ ಅಪ್ರಮಾಣಿತ ವದಂತಿಗಳನ್ನು ನಂಬಬಾರದೆಂದು ವಿಶೇಷವಾಗಿ ಎಚ್ಚರಿಸಿದೆ. ಮರು-ಪರೀಕ್ಷೆಯ ದಿನಾಂಕ, ಹಾಲ್ ಟಿಕೆಟ್ ಬಿಡುಗಡೆ ಸೇರಿದಂತೆ ಎಲ್ಲ ಮಾಹಿತಿಯನ್ನು ಕೇವಲ neet.nta.nic.in ಮತ್ತು nta.ac.in ವೆಬ್‌ಸೈಟ್‌ಗಳಿಂದ ಮಾತ್ರ ಪಡೆಯಬೇಕು. SMS ಅಲರ್ಟ್‌ಗಾಗಿ ನೋಂದಾಯಿತ ಮೊಬೈಲ್ ನಂಬರ್ ಚಾಲ್ತಿಯಲ್ಲಿಡಬೇಕು. ಹೆಚ್ಚಿನ ಮಾಹಿತಿಗೆ neet-ug@nta.ac.in ಇಮೇಲ್ ಅಥವಾ 011-40759000 ಸಂಖ್ಯೆಗೆ ಕರೆ ಮಾಡಬಹುದು. ಪರೀಕ್ಷೆಯ ಪಠ್ಯಕ್ರಮ ಮತ್ತು ಮಾದರಿ ಬದಲಾಗಿಲ್ಲವಾದ್ದರಿಂದ ವಿದ್ಯಾರ್ಥಿಗಳು ಗೊಂದಲಕ್ಕೊಳಗಾಗದೆ ತಯಾರಿ ಮುಂದುವರಿಸಬೇಕೆಂದು NTA ಸ್ಪಷ್ಟಪಡಿಸಿದೆ.