256 ರನ್​ಗಳ ಬೃಹತ್ ಗುರಿ ಬೆನ್ನಟ್ಟಿದ ಆರ್​ಸಿಬಿ ತಂಡ ಉತ್ತಮ ಆರಂಭ ಪಡೆದುಕೊಂಡಿತು. ಕೇವಲ 4.3 ಓವರ್​ಗಳಲ್ಲಿ 60 ರನ್​ಗಳ ಜೊತೆಯಾಟ ನಡೆಸಿತು. ಆರಂಭಿಕನಾಗಿ ಬಡ್ತಿ ಪಡೆದು ಆಡಿದ ವೆಂಕಟೇಶ್ ಅಯ್ಯರ್ ಸ್ಫೋಟಕ ಆಟವಾಡಿದರು. ಕೇವಲ 19 ಎಸೆತಗಳಲ್ಲಿ ತಲಾ 4 ಬೌಂಡರಿ, ಸಿಕ್ಸರ್​ಗಳ ಸಹಿತ 44 ರನ್​ಗಳಿಸಿ ಇಶಾನ್ ಮಾಲಿಂಗ ಬೌಲಿಂಗ್​​ನಲ್ಲಿ ಅಭಿಷೇಕ್ ಶರ್ಮಾಗೆ ಕ್ಯಾಚ್ ನೀಡಿ ಔಟ್ ಆದರು. ಅಯ್ಯರ್ ಬೆನ್ನಲ್ಲೇ ವಿರಾಟ್ ಕೊಹ್ಲಿ 15 ರನ್​ಗಳಿಸಿ ಸಕಿಬ್ ಹುಸೇನ್​​ ಬೌಲಿಂಗ್​​ನಲ್ಲಿ ಸ್ಮರಣ್​ಗೆ ಕ್ಯಾಚ್ ನೀಡಿ ಔಟ್ ಆದರು.

3ನೇ ಕ್ರಮಾಂಕದಲ್ಲಿ ಆಡಿದ ದೇವದತ್ ಪಡಿಕ್ಕಲ್ ಇಂದು ನಿರೀಕ್ಷಿತ ಪ್ರದರ್ಶನ ತೋರಲಿಲ್ಲ. 14 ಎಸೆತಗಳಲ್ಲಿ 2 ಬೌಂಡರಿ, 1 ಸಿಕ್ಸರ್ ಸಹಿತ 21 ರನ್​ಗಳಿಸಿ ಮಾಲಿಂಗ ಬೌಲಿಂಗ್​ನಲ್ಲಿ ಅಭಿಷೇಕ್​ಗೆ ಕ್ಯಾಚ್ ನೀಡಿ ನಿರ್ಗಮಿಸಿದರು.

ಪವರ್​ ಪ್ಲೇ ವೇಳೆ ಪಂದ್ಯವನ್ನ ಗೆಲ್ಲಬೇಕೆಂದು ಆಡುತ್ತಿದ್ದ ಆರ್​ಸಿಬಿ 3 ವಿಕೆಟ್ ಕಳೆದುಕೊಂಡ ನಂತರ ಕೇವಲ ಅಗ್ರಸ್ಥಾನ ಉಳಿಸಿಕೊಳ್ಳಲು ನಿರ್ಧರಿಸಿ ನಿಧಾನಗತಿಯ ಬ್ಯಾಟಿಂಗ್​ಗೆ ಮೊರೆ ಹೋಯಿತು. ನಾಯಕ ರಜತ್​ ಹಾಗೂ ಕೃನಾಲ್ ಪಾಂಡ್ಯ ಇಬ್ಬರು 166 ರನ್​​ಗಳ ಗಡಿ ದಾಟಿಸಲು ಸಿಂಗಲ್ ಡಬಲ್ಸ್​ಗಳಲ್ಲೇ ಆಡಿದರು. ಹಾಗೊಂದು, ಹೀಗೊಂದು ಬೌಂಡರಿ ಸಿಡಿಸುತ್ತಿದ್ದ ಈ ಜೋಡಿ 4ನೇ ವಿಕೆಟ್ ಜೊತೆಯಾಟದಲ್ಲಿ 84 ರನ್​ ಸೇರಿಸಿದರು.

ರಜತ್​ ಪಾಟೀದಾರ್ 39 ಎಸೆತಗಳಲ್ಲಿ 6 ಬೌಂಡರಿ, 1 ಸಿಕ್ಸರ್ ಸಹಿತ 56 ರನ್​ಗಳಿಸಿ 19ನೇ ಓವರ್​​ನಲ್ಲಿ ಟ್ರಾವಿಸ್​ ಹೆಡ್ ಬೌಲಿಂಗ್​​ನಲ್ಲಿ ಸ್ಮರಣ್​ಗೆ ಕ್ಯಾಚ್ ನೀಡಿ ಪೆವಿಲಿಯನ್​ ಸೇರಿಕೊಂಡರು. ಕೃನಾಲ್ ಪಾಂಡ್ಯ ಎಸೆತಗಳಲ್ಲಿ ಬೌಂಡರಿಗಳ ಸಹಿತ ಅಜೇಯ 41ರನ್​ಗಳಿಸಿದರೆ, ಟಿಮ್ ಡೇವಿಡ್ ಅಜೇಯ 15 ರನ್​ಗಳಿಸಿದರು.

ಅಗ್ರಸ್ಥಾನವನ್ನ ಪಡೆಯುವ ಉದ್ದೇಶವೇ ಮುಖ್ಯವಾಗಿದ್ದರಿಂದ ಆರ್​ಸಿಬಿ ಯಾವುದೇ ಹಂತದಲ್ಲಿ ಗೆಲುವಿಗಾಗಿ ಪ್ರಯತ್ನಿಸದೇ 20 ಓವರ್​​​ ಪೂರ್ಣಗೊಳಿಸಿತು. ಕೊನೆಗೆ ಆರ್​ಸಿಬಿ 20 ಓವರ್​ಗಳಲ್ಲಿ 4 ವಿಕೆಟ್ ಕಳೆದುಕೊಂಡು 200  ರನ್​ಗಳಿಸಿತು.