ಪ್ರವಾಸಿಗರ ಸ್ವರ್ಗವಾಗಿರುವ ಸ್ವಿಟ್ಜರ್ಲೆಂಡ್​ನಲ್ಲಿ (Switzerland) ಈ ವಿಚಿತ್ರ ನಿಯಮವಿದೆ! ಹೌದು, ಸ್ವಿಟ್ಜರ್ಲೆಂಡ್‌ನಲ್ಲಿ ಭಾನುವಾರ ಬಟ್ಟೆ ಒಗೆಯುವುದು ಮತ್ತು ಒಣಗಲು ಹಾಕುವುದು ಕಾನೂನುಬಾಹಿರ ಮತ್ತು ದಂಡನೀಯ ಅಪರಾಧ.

ಸ್ವಿಟ್ಜರ್ಲೆಂಡ್‌ನಲ್ಲಿ ಭಾನುವಾರವನ್ನು ಅಧಿಕೃತ ವಿಶ್ರಾಂತಿ ದಿನವೆಂದು ಕರೆಯಲಾಗುತ್ತದೆ. ಈ ದಿನ ಸಾರ್ವಜನಿಕವಾಗಿ ಯಾವುದೇ ಶಬ್ದ ಮಾಡುವ ಕೆಲಸಗಳನ್ನು (ಉದಾಹರಣೆಗೆ ಹುಲ್ಲು ಕತ್ತರಿಸುವುದು, ಬಟ್ಟೆ ಒಗೆಯುವ ಯಂತ್ರ (ವಾಷಿಂಗ್ ಮಷಿನ್) ಓಡಿಸುವುದು) ನಿಷೇಧಿಸಲಾಗಿದೆ. ಅದರಲ್ಲೂ, ಹೆಚ್ಚಿನ ಅಪಾರ್ಟ್ಮೆಂಟ್​ಗಳಲ್ಲಿ ಎಲ್ಲರೂ ಹಂಚಿಕೊಳ್ಳುವ ಲಾಂಡ್ರಿ ರೂಮ್ ಇರುತ್ತದೆ. ಅಲ್ಲಿನ ನಿಯಮಾವಳಿಗಳ ಪ್ರಕಾರ ಭಾನುವಾರ ಮತ್ತು ಸಾರ್ವಜನಿಕ ರಜಾದಿನಗಳಲ್ಲಿ ಯಂತ್ರಗಳನ್ನು ಬಳಸುವುದು ಕಟ್ಟುನಿಟ್ಟಾಗಿ ನಿಷೇಧಿತ.

ಈ ನಿಯಮವನ್ನು ಉಲ್ಲಂಘಿಸಿದರೆ ಮೊದಲು ಅಕ್ಕ ಪಕ್ಕದ ಮನೆಯವರು ದೂರು ನೀಡುತ್ತಾರೆ. ಆದ್ರೆ, ಈ ನಿಯಮವನ್ನು ಪದೇ ಪದೇ ಮುರಿದರೆ ಮುನಿಸಿಪಲ್ ಕಾಯ್ದೆಯಡಿ ಭಾರಿ ದಂಡ ವಿಧಿಸಲಾಗುತ್ತದೆ. ಇನ್ನೂ, ಈ ದಂಡ ಪಾವತಿಸಲು ವಿಫಲವಾದರೆ, ಗಂಭೀರ ಪ್ರಕರಣ ಎಂದು ಭಾವಿಸಿ ಜೈಲು ಶಿಕ್ಷೆಯನ್ನೂ ವಿಧಿಸಲು ಅವಕಾಶವಿದೆ.

ಸ್ವಿಟ್ಜರ್ಲೆಂಡ್​ನೊಂದಿಗೆ ಜರ್ಮನಿಯಲ್ಲಿಯೂ, ಭಾನುವಾರವನ್ನು ಶಾಂತಿ ಮತ್ತು ವಿಶ್ರಾಂತಿಯ ದಿನವೆಂದು ಪರಿಗಣಿಸಲಾಗುತ್ತದೆ. ಹಾಗಾಗಿ, ಇಲ್ಲಿನ ಜನರಿಗೆ ಕುಟುಂಬದೊಂದಿಗೆ ಸಮಯ ಕಳೆಯುವ ಮತ್ತು ವಿಶ್ರಾಂತಿ ಪಡೆಯುವ ಹಕ್ಕನ್ನು ನೀಡಲಾಗಿದೆ. ಅದಕ್ಕಾಗಿಯೇ ಜೋರಾಗಿ ಸಂಗೀತ ನುಡಿಸುವುದು, ಟಿವಿ ವಾಲ್ಯೂಮ್ ಹೆಚ್ಚಿಸುವುದು, ಹುಲ್ಲುಗಳನ್ನು ಕಟ್​ ಮಾಡುವುದು, ಗೋಡೆಗಳನ್ನ ಕೊರೆಯುವುದು ಅಥವಾ ಭಾನುವಾರದಂದು ಪೀಠೋಪಕರಣಗಳನ್ನು ಬಡಿಯುವುದನ್ನು ಕಾನೂನುಬಾಹಿರವೆಂದು ಪರಿಗಣಿಸಬಹುದು.