Last Updated:
ಮಾಜಿ ಸಚಿವ ಮೇಜರ್ ವಿಜಯ್ ಸಿಂಗ್ ಮಂಕೋಟಿಯಾ ನಿಧನರಾಗಿದ್ದಾರೆ. ಅವರು ಕಾಂಗ್ರೆಸ್ ಮತ್ತು ಬಿಜೆಪಿ ಎರಡರಲ್ಲೂ ಸೇವೆ ಸಲ್ಲಿಸಿದ್ದರು. ಹಿಮಾಚಲ ಪ್ರದೇಶದ ಕಾಂಗ್ರಾದ ಶಹಪುರದ ಶಾಸಕರಾಗಿದ್ದರು ಮತ್ತು ಪ್ರವಾಸೋದ್ಯಮ ಸಚಿವರೂ ಆಗಿದ್ದರು.
ಹಿಮಾಚಲ ಪ್ರದೇಶದ ಹಿರಿಯ ರಾಜಕಾರಣಿ ಮೇಜರ್ ವಿಜಯ್ ಸಿಂಗ್ ಮಂಕೋಟಿಯಾ (Vijai Singh Mankotia) ನಿಧನರಾಗಿದ್ದಾರೆ. ಅವರು ಐದು ಬಾರಿ ಶಾಸಕರಾಗಿ ಮತ್ತು ಎರಡು ಬಾರಿ ಸಚಿವರಾಗಿ ಸೇವೆ ಸಲ್ಲಿಸಿದ್ದರು. ಮಂಗಳವಾರ ಬೆಳಿಗ್ಗೆ ಕಾಂಗ್ರಾ ಜಿಲ್ಲೆಯ ತಮ್ಮ ಹುಟ್ಟೂರು ಟಿಯಾರಾ ಗ್ರಾಮದಲ್ಲಿ ಕೊನೆಯುಸಿರೆಳೆದಿದ್ದಾರೆ. ಅವರಿಗೆ 87 ವರ್ಷ ವಯಸ್ಸಾಗಿತ್ತು. ಇದೀಗ ಹಠಾತ್ ಹೃದಯಾಘಾತವಾಗಿ ನಿಧನರಾಗಿದ್ದಾರೆ ಎಂದು ವರದಿಯಾಗಿದೆ.
ಮಂಗಳವಾರ ಬೆಳಿಗ್ಗೆ ಇದ್ದಕ್ಕಿದ್ದ ಹಾಗೇ ಅವರ ಆರೋಗ್ಯ ಹದಗೆಟ್ಟಿತ್ತು. ಕುಟುಂಬದವರು ಅವರನ್ನು ಫೋರ್ಟಿಸ್ ಆಸ್ಪತ್ರೆಗೆ ಕರೆದೊಯ್ಯುತ್ತಿದ್ದಾಗ ದಾರಿಯಲ್ಲೇ ಹೃದಯಾಘಾತವಾಗಿ ಆಸ್ಪತ್ರೆ ತಲುಪುವ ಮೊದಲೇ ನಿಧನರಾದರು.
ಮೇಜರ್ ಮಂಕೋಟಿಯಾ ಕಾಂಗ್ರೆಸ್ ಮತ್ತು ಬಿಜೆಪಿ ಎರಡೂ ಪಕ್ಷಗಳಲ್ಲಿ ನಾಯಕರಾಗಿದ್ದರು. 2024ರಲ್ಲಿ ಅವರು ಕಾಂಗ್ರೆಸ್ ತೊರೆದು ಬಿಜೆಪಿ ಸೇರಿದ್ದರು. ಅವರು ಮಾಜಿ ಮುಖ್ಯಮಂತ್ರಿ ವೀರಭದ್ರ ಸಿಂಗ್ ಅವರ ಕಟ್ಟಾ ವಿರೋಧಿಯಾಗಿದ್ದರು. ಈ ಮಂಕೋಟಿಯಾ ಅವರು ಕಾಂಗ್ರಾದ ಟಿಯಾರಾ ಗ್ರಾಮದಲ್ಲಿ ಜನಿಸಿದ್ದು, ಶಿಮ್ಲಾದ ಬಿಷಪ್ ಕಾಟನ್ ಶಾಲೆಯಲ್ಲಿ ವ್ಯಾಸಂಗ ಮಾಡಿದರು. ರಾಜಕೀಯದಲ್ಲಿ ಶಹಪುರದಿಂದ ಶಾಸಕರಾಗಿ ಮತ್ತು ಪ್ರವಾಸೋದ್ಯಮ ಸಚಿವರಾಗಿ ಸೇವೆ ಸಲ್ಲಿಸಿದ್ದರು.
ಮೇ 27, 2007ರಂದು ಮೇಜರ್ ವಿಜಯ್ ಸಿಂಗ್ ಮಂಕೋಟಿಯಾ ಒಂದು ಸಿಡಿ ಬಿಡುಗಡೆ ಮಾಡಿದ್ದರು. ಅದು ವೀರಭದ್ರ ಸಿಂಗ್, ಪ್ರತಿಭಾ ಸಿಂಗ್ ಮತ್ತು ಆಗಿನ ಪೊಲೀಸ್ ಉಪ ಆಯುಕ್ತ ಮಹೇಂದ್ರ ಸಿಂಗ್ ನಡುವಿನ ಹಣಕಾಸು ವಹಿವಾಟನ್ನು ದಾಖಲಿಸಿದೆ ಎಂದು ಹೇಳಲಾಗಿತ್ತು. ಈ ಧ್ವನಿಮುದ್ರಣ 1989ರದ್ದು ಎಂದು ಹೇಳಲಾಗಿತ್ತು. ಮಾಜಿ ಮುಖ್ಯಮಂತ್ರಿ ವೀರಭದ್ರ ಸಿಂಗ್ ಅವರನ್ನು ನಂತರ ಈ ಪ್ರಕರಣದಲ್ಲಿ ಖುಲಾಸೆಗೊಳಿಸಲಾಗಿತ್ತು. ದರ್ಲಘಾಟ್ನಲ್ಲಿ ಸಿಮೆಂಟ್ ಸ್ಥಾವರ ಘಟಕವನ್ನು ಅನುಮೋದಿಸಲು ಅವರು ತಮ್ಮ ಸ್ಥಾನವನ್ನು ದುರುಪಯೋಗಪಡಿಸಿಕೊಂಡಿದ್ದಾರೆ ಎಂಬ ಆರೋಪವೂ ಇತ್ತು.
ಮೇಜರ್ ಮಂಕೋಟಿಯಾ ಅವರ ಜೀವನ ಸೈನ್ಯ ಸೇವೆ, ರಾಜಕೀಯ ಮತ್ತು ಸಾಮಾಜಿಕ ಕಾರ್ಯಗಳಿಂದ ತುಂಬಿತ್ತು. 1959ರಲ್ಲಿ ಯುಪಿಎಸ್ಸಿ ಪರೀಕ್ಷೆಯಲ್ಲಿ ಅಖಿಲ ಭಾರತ ಮೆರಿಟ್ ಪಟ್ಟಿಯಲ್ಲಿ ಐದನೇ ಸ್ಥಾನ ಪಡೆದರು. 1960ರಲ್ಲಿ ಡೆಹ್ರಾಡೂನ್ನ ಭಾರತೀಯ ಮಿಲಿಟರಿ ಅಕಾಡೆಮಿ (ಐಎಂಎ)ಗೆ ಪ್ರವೇಶಿಸಿದರು. 1962ರ ಗಣರಾಜ್ಯೋತ್ಸವ ಮೆರವಣಿಗೆಯಲ್ಲಿ ಐಎಂಎ ತುಕಡಿಯನ್ನು ಮುನ್ನಡೆಸಿದರು. ಅವರು ಐಎಂಎಯ ಕೊನೆಯ ಕೆಡೆಟ್ ಕಮಾಂಡರ್ ಆಗಿದ್ದರು. ಜೂನ್ 1962ರಲ್ಲಿ ತರಬೇತಿ ಪೂರ್ಣಗೊಳಿಸಿದ ನಂತರ ಪ್ರತಿಷ್ಠಿತ ಸ್ವೋರ್ಡ್ ಆಫ್ ಆನರ್ ಮತ್ತು ಚಿನ್ನದ ಪದಕ ಪಡೆದರು. ಅವರನ್ನು ಗೂರ್ಖಾ ರೈಫಲ್ಸ್ಗೆ ನಿಯೋಜಿಸಲಾಯಿತು.
ಅವರು 1962ರ ಚೀನಾ-ಭಾರತ ಯುದ್ಧ, 1965ರ ಭಾರತ-ಪಾಕಿಸ್ತಾನ ಯುದ್ಧ ಮತ್ತು 1971ರ ಬಾಂಗ್ಲಾದೇಶ ಯುದ್ಧದಲ್ಲಿ ಭಾಗವಹಿಸಿದ್ದರು. 1976ರಲ್ಲಿ ಸೈನ್ಯದಿಂದ ಅಕಾಲಿಕ ನಿವೃತ್ತಿ ಪಡೆದರು. ನಂತರ 1982ರಲ್ಲಿ ರಾಜಕೀಯ ಪ್ರವೇಶಿಸಿದರು. ಶಹಪುರ್ ವಿಧಾನಸಭಾ ಕ್ಷೇತ್ರದಿಂದ ಸ್ವತಂತ್ರ ಅಭ್ಯರ್ಥಿಯಾಗಿ ಸ್ಪರ್ಧಿಸಿ ಭರ್ಜರಿ ಗೆಲುವು ಸಾಧಿಸಿದರು. ನಂತರ ಐದು ಬಾರಿ ಶಾಸಕರಾಗಿ ಮತ್ತು ಎರಡು ಬಾರಿ ಹಿಮಾಚಲ ಪ್ರದೇಶ ಸರ್ಕಾರದಲ್ಲಿ ಕ್ಯಾಬಿನೆಟ್ ಸಚಿವರಾಗಿ ಸೇವೆ ಸಲ್ಲಿಸಿದರು. ಪ್ರವಾಸೋದ್ಯಮ, ನಾಗರಿಕ ವಿಮಾನಯಾನ ಮತ್ತು ಕಾನೂನು ಖಾತೆಗಳನ್ನು ನಿರ್ವಹಿಸಿದ್ದರು.
ಮೇಜರ್ ಮಂಕೋಟಿಯಾ “ದಿ ಪ್ಯಾಟರ್ನ್ಸ್ ಆಫ್ ಡೆಸ್ಟಿನಿ,” “ಟರ್ಮಾಯಿಲ್” ಮತ್ತು “ಉಫಿಯಾವಲ್” ಎಂಬ ಮೂರು ಪುಸ್ತಕಗಳನ್ನು ಬರೆದಿದ್ದರು. ತಮ್ಮ ಬರವಣಿಗೆಯ ಮೂಲಕ ನ್ಯಾಯ ಮತ್ತು ಸಮಾನತೆಯ ಬಗ್ಗೆ ಅಭಿಪ್ರಾಯಗಳನ್ನು ವ್ಯಕ್ತಪಡಿಸಿದ್ದರು. ರವೀಂದ್ರನಾಥ ಟ್ಯಾಗೋರ್ ಮತ್ತು ಪ್ಲೇಟೋ ಅವರನ್ನು ಮಾರ್ಗದರ್ಶಕರು ಎಂದು ಉಲ್ಲೇಖಿಸುತ್ತಿದ್ದರು. ‘ಬಡವರನ್ನು ಎಂದಿಗೂ ಕೈಬಿಡಬೇಡಿ ಮತ್ತು ಬೆಳಕಿಗೆ ಎಂದಿಗೂ ಭಯಪಡಬೇಡಿ. ಇದು ಅರ್ಥಪೂರ್ಣ ಜೀವನದ ಸಾರ’ ಎಂದು ಹೇಳುತ್ತಿದ್ದರು. ಅವರು ರಾಜಸ್ಥಾನದ ಕೋಟಾ ಕುನಾರಿಯ ಪತ್ನಿ ಜಯಶ್ರೀ ಕುಮಾರಿ ಅವರೊಂದಿಗೆ ವಾಸಿಸುತ್ತಿದ್ದರು. ಅವರಿಗೆ ಇಬ್ಬರು ಮಕ್ಕಳಿದ್ದಾರೆ. ಮಗ ಸೂರ್ಯವೀರ್ ಸಿಂಗ್ ಮತ್ತು ಮಗಳು ಸಂಯುಕ್ತ ಕುಮಾರಿ. ಹಿಮಾಚಲ ಪ್ರದೇಶದ ರಾಜಕೀಯದಲ್ಲಿ ಮಹತ್ವದ ಪಾತ್ರ ವಹಿಸಿದ್ದ ಮೇಜರ್ ವಿಜಯ್ ಸಿಂಗ್ ಮಂಕೋಟಿಯಾ ಅವರ ನಿಧನದಿಂದ ರಾಜಕೀಯ ವಲಯದಲ್ಲಿ ಶೋಕ ಉಂಟಾಗಿದೆ.
