Last Updated:
ಬಿಹಾರದ ಮುಜಫರ್ಪುರದ 14 ವರ್ಷದ ಅಯಾನ್ ರಾಜ್ ಜಿಲ್ಲಾ ಅಂಡರ್-16 ಕ್ರಿಕೆಟ್ ಲೀಗ್ನ ಆರಂಭಿಕ ಪಂದ್ಯದಲ್ಲಿ ಅದ್ಭುತ ಇನ್ನಿಂಗ್ಸ್ ಆಡಿ ಗಮನ ಸೆಳೆದಿದ್ದಾರೆ. ಈ ಪ್ರದರ್ಶನವು ಸ್ಥಳೀಯ ಕ್ರಿಕೆಟ್ ನಲ್ಲಿ ಪ್ರಮುಖ ಚರ್ಚೆಯ ವಿಷಯವಾಗಿದೆ
ಐಪಿಎಲ್ 2026ರಲ್ಲಿ (IPL 2026) ತಮ್ಮ ಅದ್ಭುತ ಬ್ಯಾಟಿಂಗ್ ಮೂಲಕ ಎಲ್ಲರ ಗಮನ ಸೆಳೆದಿರುವ 15 ವರ್ಷದ ಯುವಕ ವೈಭವ್ ಸೂರ್ಯವಂಶಿ (Vaibhav Sooryavanshi) ಇದೀಗ ಭಾರತ ತಂಡದ ಪರ ಆಡಲು ಸಜ್ಜಾಗಿದ್ದಾರೆ. ಸೂರ್ಯವಂಶಿ ಆಟ ನೋಡಿರುವ ಆಯ್ಕೆದಾರರು ಐರ್ಲೆಂಡ್ ಮತ್ತು ಇಂಗ್ಲೆಂಡ್ (England Tour) ಪ್ರವಾಸ ಕೈಗೊಳ್ಳುವ ಭಾರತೀಯ ತಂಡಕ್ಕೆ ವೈಭವ್ ಅವರನ್ನು ಆಯ್ಕೆ ಮಾಡಿದ್ದಾರೆ. ಪ್ರಸ್ತುತ, ಅವರು ತ್ರಿಕೋನ ಸರಣಿಯಲ್ಲಿ ಭಾರತ-ಎ ತಂಡಕ್ಕಾಗಿ ಆಡುತ್ತಿದ್ದಾರೆ. ಅವರು ತಮ್ಮ ಚೊಚ್ಚಲ ಪಂದ್ಯದಲ್ಲಿ ಕೇವಲ 14 ರನ್ಗಳನ್ನು ಗಳಿಸುವ ಮೂಲಕ ನಿರಾಶೆ ಮೂಡಿಸಿದ್ದರು, ನಂತರ ಎರಡನೇ ಪಂದ್ಯದಲ್ಲಿ 22 ಎಸೆತಗಳಲ್ಲಿ 44 ರನ್ ಗಳಿಸಿ ಮಿಂಚಿದರು. ಭವಿಷ್ಯದಲ್ಲಿ ಅವರು ದೊಡ್ಡ ಇನ್ನಿಂಗ್ಸ್ ಆಡುತ್ತಾರೆ ಎಂಬ ವಿಶ್ವಾಸದಲ್ಲಿ ಕ್ರಿಕೆಟ್ ಅಭಿಮಾನಿಗಳು ಮತ್ತು ವಿಶ್ಲೇಷಕರು ಇದ್ದಾರೆ.
ಇದರ ಮಧ್ಯೆ ವೈಭವ್ ಸೂರ್ಯವಂಶಿಯವರ ಬಾಲ್ಯದ ಗೆಳೆಯ ಅಯಾನ್ ರಾಜ್ ಕೂಡ ತಮ್ಮ ಬ್ಯಾಟ್ನಿಂದ ಮೈದಾನದಲ್ಲಿ ವಿಧ್ವಂಸಕ ಪ್ರದರ್ಶನ ನೀಡುವ ಮೂಲಕ ಸುದ್ದಿಯಾಗಿದ್ದಾರೆ. ಬಿಹಾರದ ಮುಜಫರ್ಪುರದ 14 ವರ್ಷದ ಅಯಾನ್ ರಾಜ್ ಜಿಲ್ಲಾ ಅಂಡರ್-16 ಕ್ರಿಕೆಟ್ ಲೀಗ್ನ ಆರಂಭಿಕ ಪಂದ್ಯದಲ್ಲಿ ಅದ್ಭುತ ಇನ್ನಿಂಗ್ಸ್ ಆಡಿ ಗಮನ ಸೆಳೆದಿದ್ದಾರೆ. ಈ ಪ್ರದರ್ಶನವು ಸ್ಥಳೀಯ ಕ್ರಿಕೆಟ್ನಲ್ಲಿ ಪ್ರಮುಖ ಚರ್ಚೆಯ ವಿಷಯವಾಗಿದೆ, ಬಿಹಾರ ಕ್ರಿಕೆಟ್ಗೆ ಮತ್ತೊಂದು ಅದ್ಭುತ ರತ್ನದ ಆವಿಷ್ಕಾರವನ್ನು ಎಲ್ಲರೂ ಶ್ಲಾಘಿಸಿದ್ದಾರೆ. ಈ ಪಂದ್ಯದಲ್ಲಿ ಅಯಾನ್ ಕೇವಲ 83 ಎಸೆತಗಳಲ್ಲಿ 210 ರನ್ಗಳ ಇನ್ನಿಂಗ್ಸ್ ಆಡುವ ಮೂಲಕ ಎಲ್ಲರ ಗಮನ ಸೆಳೆದಿದ್ದಾರೆ.
ಮುಜಫರ್ಪುರ ಜಿಲ್ಲಾ ಕ್ರಿಕೆಟ್ ಅಸೋಸಿಯೇಷನ್ ಆಯೋಜಿಸಿದ್ದ ಜಿಲ್ಲಾ ಅಂಡರ್-16 ಕ್ರಿಕೆಟ್ ಲೀಗ್ನಲ್ಲಿ ‘ಸಂಸ್ಕೃತಿ ಕ್ಲಬ್’ ಪರ ಅಯಾನ್ ರಾಜ್ ಆಡಿದ್ದರು. ಪಂದ್ಯದ ಸಮಯದಲ್ಲಿ ಅವರು ಎದುರಾಳಿ ಬೌಲರ್ಗಳನ್ನ ಧ್ವಂಸ ಮಾಡಿದರು. ಮೈದಾನದಾದ್ಯಂತ ಬೌಂಡರಿಗಳ ಸುರಿಮಳೆಗೈದ ಅವರು ಕೇವಲ 83 ಎಸೆತಗಳಲ್ಲಿ 35 ಬೌಂಡರಿಗಳು ಮತ್ತು 9 ಅದ್ಭುತ ಸಿಕ್ಸರ್ಗಳನ್ನು ಒಳಗೊಂಡಂತೆ 210 ರನ್ಗಳನ್ನು ಗಳಿಸುವ ಮೂಲಕ ಸಂಚಲನ ಮೂಡಿಸಿದರು.
ಅವರ ವೀರೋಚಿತ ದ್ವಿಶತಕದಿಂದಾಗಿ, ಸಂಸ್ಕೃತಿ ಕ್ಲಬ್ ತಂಡವು ನಿಗದಿತ 30 ಓವರ್ಗಳಲ್ಲಿ 4 ವಿಕೆಟ್ಗಳಿಗೆ 464 ರನ್ಗಳ ಬೃಹತ್ ಮೊತ್ತವನ್ನು ಗಳಿಸುವಲ್ಲಿ ಯಶಸ್ವಿಯಾಯಿತು. ಅಯನ್ ರಾಜ್ ಅವರ ದಾಖಲೆಯ ಇನ್ನಿಂಗ್ಸ್ ಈ ಬೃಹತ್ ಸ್ಕೋರ್ಗೆ ಪ್ರಮುಖ ಪಾತ್ರ ವಹಿಸಿತು. ಅವರ ಈ ಇನ್ನಿಂಗ್ಸ್ಗೆ ವ್ಯಾಪಕ ಪ್ರಶಂಸೆ ಕೇಳಿಬರುತ್ತಿದೆ.
ಅಯನ್ ರಾಜ್ ಅವರಿಗೆ ಇಂತಹ ಚರ್ಚೆಗೆ ಒಳಗಾಗುತ್ತಿರುವುದು ಇದೇ ಮೊದಲಲ್ಲ. ಅವರು ಈ ಹಿಂದೆ ಜಿಲ್ಲಾ ಮಟ್ಟದ ಕ್ರಿಕೆಟ್ನಲ್ಲಿ ತಮ್ಮ ಬ್ಯಾಟಿಂಗ್ ಕೌಶಲ್ಯವನ್ನು ಪ್ರದರ್ಶಿಸಿದ್ದರು. ಈ ಹಿಂದೆ ಒಂದೇ ಪಂದ್ಯದಲ್ಲಿ ಅಜೇಯ ತ್ರಿಶತಕವನ್ನು ಗಳಿಸುವ ಮೂಲಕ ಕ್ರಿಕೆಟ್ ಸಮುದಾಯವನ್ನು ಬೆರಗುಗೊಳಿಸಿದರು. ಅವರು ಬರೋಬ್ಬರಿ 41 ಬೌಂಡರಿ, 21 ಸಿಕ್ಸರ್ ಸಹಿತ 327 ರನ್ಗಳಿಸಿದ್ದರು. ಅವರ ನಿರಂತರ ಅತ್ಯುತ್ತಮ ಪ್ರದರ್ಶನದೊಂದಿಗೆ, ಅಯನ್ ರಾಜ್ ಈಗ ಬಿಹಾರ ಕ್ರಿಕೆಟ್ನ ಉದಯೋನ್ಮುಖ ತಾರೆಗಳಲ್ಲಿ ಒಬ್ಬರಾಗಿ ಮನ್ನಣೆ ಪಡೆಯುತ್ತಿದ್ದಾರೆ.
ಕೆಲವು ಕ್ರಿಕೆಟ್ ತಜ್ಞರು ಸಹ ಅಯನ್ ರಾಜ್ ಇದೇ ರೀತಿಯ ಫಾರ್ಮ್ ಮತ್ತು ಪ್ರದರ್ಶನದ ಮಟ್ಟವನ್ನು ಕಾಯ್ದುಕೊಂಡರೆ, ಅವರು ಭವಿಷ್ಯದಲ್ಲಿ ಜಾಗತಿಕ ವೇದಿಕೆಯಲ್ಲಿ ಬಿಹಾರ ರಾಜ್ಯ ಮತ್ತು ಭಾರತ ಎರಡಕ್ಕೂ ಕೀರ್ತಿ ತರುತ್ತಾರೆ ಎಂದು ಮಾತನಾಡಿಕೊಳ್ಳುತ್ತಿದ್ದಾರೆ.
