ಉಕ್ರೇನ್ ಮತ್ತು ರಷ್ಯಾ ಎರಡೂ ಸೈನ್ಯಗಳು ಡ್ರೋನ್‌ಗಳನ್ನು ನಿಯಂತ್ರಿಸಲು ಈ ಅತ್ಯಂತ ತೆಳುವಾದ ಫೈಬರ್-ಆಪ್ಟಿಕ್ ಕೇಬಲ್‌ಗಳನ್ನು ಬಳಸುತ್ತಿವೆ. ಎಲೆಕ್ಟ್ರಾನಿಕ್ ಜ್ಯಾಮಿಂಗ್‌ಗೆ ಬಲಿಯಾಗದ ಈ ಕೇಬಲ್‌ಗಳು 20ರಿಂದ 65 ಕಿಲೋಮೀಟರ್‌ಗಳಷ್ಟು ಉದ್ದವಿರುತ್ತವೆ. ಡ್ರೋನ್ ಹಾರಿದ ನಂತರ ಈ ಕೇಬಲ್‌ಗಳು ಮರಗಳಲ್ಲಿ, ಹೊಲಗಳಲ್ಲಿ, ರಸ್ತೆಗಳಲ್ಲಿ ಮತ್ತು ಮನೆಗಳ ಮೇಲೆ ಬಿದ್ದು ಸುರುಳಿ ಕಟ್ಟಿದ ದೈತ್ಯಾಕಾರದ ಜೇಡರ ಬಲೆಯಂತೆ ಕಾಣುತ್ತವೆ. ಈ ಕೇಬಲ್‌ಗಳನ್ನು ಮತ್ತೆ ಬಳಸಲಾಗುವುದಿಲ್ಲ.

ಆದರೆ ಪಕ್ಷಿಗಳು ಈ ಕೇಬಲ್‌ಗಳನ್ನು ಸಂಗ್ರಹಿಸಿ ತಮ್ಮ ಗೂಡುಗಳನ್ನು ನಿರ್ಮಿಸುತ್ತಿವೆ. ಉಕ್ರೇನ್‌ನಲ್ಲಿ ಒಂದು ಗ್ಲೈಡ್ ಬಾಂಬ್ ಮರವನ್ನು ಕೆಡವಿದಾಗ ಆ ಮುರಿದ ಕೊಂಬೆಗಳಲ್ಲಿ ಅಂತಹ ಒಂದು ಗೂಡು ಕಂಡುಬಂದಿದೆ. ಈ ಗೂಡುಗಳು ಒಣ ಹುಲ್ಲು ಮತ್ತು ಫೈಬರ್-ಆಪ್ಟಿಕ್ ಕೇಬಲ್‌ಗಳ ಮಿಶ್ರಣದಿಂದ ತಯಾರಾಗಿವೆ. ಕೈವ್‌ನ ಯುದ್ಧ ಮ್ಯೂಸಿಯಂನ ಸಂಶೋಧಕರಾದ ಯಾನಾ ಹ್ರಿಂಕೊ ಅವರು ಈ ಗೂಡುಗಳನ್ನು ಸೈನಿಕರಿಂದ ಪಡೆದಿದ್ದು, ಪಕ್ಷಿಗಳ ಗೂಡುಗಳು ಸಹ ಯುದ್ಧದ ಸ್ವರೂಪಕ್ಕೆ ಒಗ್ಗಿಕೊಂಡಿರುವ ಬಗ್ಗೆ ಆತಂಕ ವ್ಯಕ್ತಪಡಿಸಿದ್ದಾರೆ.

ಯುದ್ಧದಲ್ಲಿ ಮನುಷ್ಯರು ತಮ್ಮ ಪ್ರೀತಿಪಾತ್ರರನ್ನು ಕಳೆದುಕೊಳ್ಳುತ್ತಿದ್ದಾರೆ, ಮನೆಗಳು ನಾಶವಾಗುತ್ತಿವೆ. ಆದರೆ ಪಕ್ಷಿಗಳು ಈ ವಿನಾಶದ ನಡುವೆಯೂ ತಮ್ಮ ಮುಂದಿನ ಪೀಳಿಗೆಗೆ ಆಶ್ರಯ ಕೊಡಲು ಹೋರಾಡುತ್ತಿವೆ. ಈ ಫೈಬರ್ ಕೇಬಲ್‌ಗಳು ಒಂದು ಕಡೆ ಯುದ್ಧದ ಕ್ರೂರತೆಯನ್ನು ಬಿಂಬಿಸಿದರೆ, ಮತ್ತೊಂದು ಕಡೆ ಪ್ರಕೃತಿಯ ಅದಮ್ಯ ಜೀವನ ಶಕ್ತಿಯನ್ನು ತೋರಿಸುತ್ತವೆ. ಈ ಗೂಡುಗಳು ಯುದ್ಧದ ನಡುವೆಯೂ ಜೀವನ ನಿರಂತರವಾಗಿ ಮುಂದುವರಿಯುತ್ತದೆ ಎಂಬ ಭರವಸೆಯ ಸಂಕೇತವನ್ನು ನಮಗೆ ನೀಡುತ್ತದೆ ಅನ್ನೋದರಲ್ಲಿ ಎರಡು ಮಾತಿಲ್ಲ.