Last Updated:
ಭಾರತ ಮತ್ತು ಇಂಗ್ಲೆಂಡ್ ನಡುವಿನ ಮೂರನೇ ಏಕದಿನ ಪಂದ್ಯ ಲಾರ್ಡ್ಸ್ನಲ್ಲಿ ನಡೆಯಲಿದೆ. ಇದಕ್ಕೂ ಮುನ್ನ ಸ್ಟಾರ್ ಆಟಗಾರ ವೃತ್ತಿಪರ ಕ್ರಿಕೆಟ್ನಿಂದ ನಿವೃತ್ತಿ ಹೊಂದಲು ನಿರ್ಧರಿಸಿದ್ದಾರೆ.
ಲಾರ್ಡ್ಸ್(Lords)ನಲ್ಲಿ ಭಾರತ (India) ಮತ್ತು ಇಂಗ್ಲೆಂಡ್ (England)ನಡುವಿನ ಮೂರನೇ ಏಕದಿನ (ODI) ಪಂದ್ಯ ಜುಲೈ 19 ರಂದು ನಡೆಯಲಿದೆ. ಈಗ ಮೂರು ಪಂದ್ಯಗಳ ಸರಣಿ 1-1 ರಲ್ಲಿ ಸಮಬಲದಲ್ಲಿದೆ. ಹೀಗಾಗಿ ಮೂರನೇ ಏಕದಿನ ಪಂದ್ಯ ಭಾರೀ ಕುತೂಹಲ ಮೂಡಿಸಿದೆ. ಇದಕ್ಕೂ ಮುನ್ನ ಸ್ಟಾರ್ ಆಟಗಾರ ವೃತ್ತಿಪರ ಕ್ರಿಕೆಟ್ನಿಂದ ನಿವೃತ್ತಿ (Retirement) ಹೊಂದಲು ನಿರ್ಧರಿಸಿದ್ದಾರೆ. ಇಂಗ್ಲೆಂಡ್ನ ಸ್ಟಾರ್ ಬ್ಯಾಟರ್ ಮತ್ತು ಕೆಂಟ್ ತಂಡದ ದಿಗ್ಗಜ ಆಟಗಾರ ಜೋ ಡೆನ್ಲಿ (Joe denly) ನಿವೃತ್ತಿ ಘೋಷಿಸಿದ್ದಾರೆ.
ಈಗ 40 ವರ್ಷ ವಯಸ್ಸಿನ ಡೆನ್ಲಿ, 2026 ರ ಕ್ರಿಕೆಟ್ ಋತುವಿನ ಕೊನೆಯಲ್ಲಿ ಪೂರ್ಣವಾಗಿ ನಿವೃತ್ತಿ ಹೊಂದಲಿದ್ದಾರೆ. ಅವರು ಕ್ರಿಕೆಟ್ನಲ್ಲಿ 20 ವರ್ಷಗಳಿಗೂ ಹೆಚ್ಚು ಕಾಲ ಆಡಿದ್ದಾರೆ. ಸೆಪ್ಟೆಂಬರ್ 2020ರಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಅವರು ತಮ್ಮ ಕೊನೆಯ ಅಂತಾರಾಷ್ಟ್ರೀಯ ಪಂದ್ಯವನ್ನು ಆಡಿದ್ದರು. ಜೋ ರೂಟ್ ಮತ್ತು ಬೆನ್ ಸ್ಟೋಕ್ಸ್ ಅವರ ನಾಯಕತ್ವದಲ್ಲಿ ಡೆನ್ಲಿ ಆಡಿದ್ದಾರೆ.
ಜೋ ಡೆನ್ಲಿ 2004 ರಲ್ಲಿ ಕೆಂಟ್ ತಂಡಕ್ಕೆ ಮೊದಲ ಬಾರಿ ಆಡಲು ಆರಂಭಿಸಿದರು. ಅವರು ತಂಡವನ್ನು ಹಲವು ಪಂದ್ಯಗಳಲ್ಲಿ ಗೆಲ್ಲುವಂತೆ ಮಾಡಿದರು. ಅವರ ಸಹಾಯದಿಂದ ಕೆಂಟ್ ತಂಡವು 2007ರಲ್ಲಿ ತನ್ನ ಮೊದಲ ಟಿ20 ಟ್ರೋಫಿ ಗೆದ್ದುಕೊಂಡಿತು.
ಜೋ ಡೆನ್ಲಿ
ಡೆನ್ಲಿ ಅವರು 2022ರಲ್ಲಿ ಕೆಂಟ್ ತಂಡವನ್ನು ಏಕದಿನ ಕಪ್ಗೆ ಕರೆದೊಯ್ದರು. ಟಿ20 ಪಂದ್ಯಗಳಲ್ಲಿ 5000 ರನ್ ಗಳಿಸಿದ ಮೊದಲ ಕೆಂಟ್ ಆಟಗಾರ ಇವರು. ಇದಲ್ಲದೆ, ಟೆಸ್ಟ್, ಏಕದಿನ ಮತ್ತು ಟಿ20 ಮೂರು ಮಾದರಿಗಳಲ್ಲಿ ಶತಕ ಗಳಿಸಿದ ಕೆಲವೇ ಕೆಂಟ್ ಬ್ಯಾಟರ್ಗಳಲ್ಲಿ ಒಬ್ಬರು.
ಇಂಗ್ಲೆಂಡ್ ತಂಡದಲ್ಲಿ ಜೋ ಡೆನ್ಲಿ ಅವರ ಪಯಣ ಏರಿಳಿತಗಳಿಂದ ತುಂಬಿತ್ತು. ಅವರು 2009ರಲ್ಲಿ ಮೊದಲ ಬಾರಿ ತಂಡಕ್ಕೆ ಸೇರಿ ಪಂದ್ಯ ಆಡಿದರು. ಆದರೆ ಮುಂದಿನ ವರ್ಷವೇ (2010) ತಂಡದಿಂದ ಹೊರಗುಳಿದರು. ಅನಂತರ ಮತ್ತೊಮ್ಮೆ ಅವಕಾಶ ಸಿಗುವವರೆಗೆ ಅವರು 8 ವರ್ಷಗಳ ಕಾಲ ಕಾಯಬೇಕಾಯಿತು.
ಕೊನೆಗೆ 2018ರಲ್ಲಿ ತಂಡಕ್ಕೆ ಮರಳಿದರು. ಒಟ್ಟಾರೆಯಾಗಿ ಅವರು ಇಂಗ್ಲೆಂಡ್ ಪರ 15 ಟೆಸ್ಟ್ ಪಂದ್ಯಗಳನ್ನು ಆಡಿದ್ದಾರೆ. ಈ ಸಮಯದಲ್ಲಿ ಕಷ್ಟದ ಸಂದರ್ಭಗಳಲ್ಲಿ ತಂಡಕ್ಕಾಗಿ ಅನೇಕ ಮುಖ್ಯ ಇನ್ನಿಂಗ್ಸ್ಗಳನ್ನು ಆಡಿದ್ದಾರೆ. ಅದರಲ್ಲಿ 2019ರಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಮೂರನೇ ಸ್ಥಾನದಲ್ಲಿ ಆಡಿದ ಸ್ಮರಣೀಯ ಇನ್ನಿಂಗ್ಸ್ ಸೇರಿದೆ.
ಕೆಂಟ್ ಕ್ಲಬ್ ಬಿಡುಗಡೆ ಮಾಡಿದ ಹೇಳಿಕೆಯಲ್ಲಿ ಜೋ ಡೆನ್ಲಿ, ವೃತ್ತಿಪರ ಕ್ರಿಕೆಟ್ನಲ್ಲಿ ಉತ್ತಮ ವೃತ್ತಿಜೀವನ ನಡೆಸಿದ ನಂತರ, ಈಗ ನಿವೃತ್ತಿ ಹೊಂದುವ ಸಮಯ ಬಂದಿದೆ. 2026 ಋತುವು ಮುಗಿದ ನಂತರ ನಾನು ಕ್ರಿಕೆಟ್ ಆಟದಿಂದ ಸಂಪೂರ್ಣವಾಗಿ ನಿವೃತ್ತರಾಗುತ್ತೇನೆ. ಕ್ರಿಕೆಟ್ ನನಗೆ ನಾನು ನಿರೀಕ್ಷಿಸಿದ್ದಕ್ಕಿಂತ ಬಹಳ ಹೆಚ್ಚು ಕೊಟ್ಟಿದೆ. ಕೆಂಟ್ ಕ್ಲಬ್ಗೆ ಮೊದಲ ಬಾರಿ ಆಡಿದ್ದರಿಂದ ಹಿಡಿದು ಇಂಗ್ಲೆಂಡ್ ತಂಡವನ್ನು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಪ್ರತಿನಿಧಿಸುವವರೆಗೆ, ಪ್ರತಿ ಕ್ಷಣವೂ ನನಗೆ ಬಹಳ ಹೆಮ್ಮೆಯ ವಿಷಯವಾಗಿದೆ ಎಂದು ಹೇಳಿದ್ದಾರೆ.
