ಚಿಕಿತ್ಸೆ ಸಮಯದಲ್ಲಿ ಪತ್ನಿ ಸಾವನಪ್ಪಿದ್ರೆ, ಅವರ 78 ವರ್ಷದ ಪತಿಯ ಸ್ಥಿತಿ ಗಂಭೀರವಾಗಿದೆ. ಈ ಘಟನೆಯು ಸ್ಥಳೀಯವಾಗಿ ಭೀತಿ ಹರಡಿದೆ. ರಾತ್ರಿ ಆರಾಮಾಗಿ ಊಟ ಮಾಡಿದ ದಂಪತಿಗೆ ಇದ್ದಕ್ಕಿದ್ದ ಹಾಗೇ ಹೀಗೆ ಅನಾರೋಗ್ಯವಾಗಿರುವುದು ಆತಂಕಕ್ಕೆ ಕಾರಣವಾಗಿದೆ.

ಭಾನುವಾರ ರಾತ್ರಿ ಶಾಂತಾರಾಮ್ (78) ಮತ್ತು ಅವರ ಪತ್ನಿ ದ್ವಾರಕಾಬಾಯಿ (68) ಮನೆಯಲ್ಲಿ ಮಟನ್​ ಬೇಯಿಸಿ ಊಟ ಮಾಡಿದ್ದರು. ಅದರ ಜೊತೆಗೆ ಮೊಸರೂ ಸೇರಿಸಿದ್ದರು. ಊಟ ಮಾಡಿದ ಸ್ವಲ್ಪ ಸಮಯದ ನಂತರ ಇಬ್ಬರಿಗೂ ವಾಂತಿ, ಅತಿಸಾರ ಮತ್ತು ತೀವ್ರ ಹೊಟ್ಟೆ ನೋವು ಕಾಣಿಸಿಕೊಂಡಿದೆ. ಅವರ ಸ್ಥಿತಿ ಹದಗೆಡುತ್ತಿರುವುದನ್ನು ಕಂಡು ಕುಟುಂಬಸ್ಥರು ತಕ್ಷಣವೇ ಹತ್ತಿರದ ಆಸ್ಪತ್ರೆಗೆ ಕರೆದೊಯ್ದಿದ್ದಾರೆ. ವೈದ್ಯರು ತಕ್ಷಣ ಚಿಕಿತ್ಸೆ ನೀಡಿದ್ದಾರೆ.

ವೈದ್ಯರು ಇಬ್ಬರನ್ನೂ ಉಳಿಸಲು ತಮ್ಮ ಕೈಲಾದಷ್ಟು ಪ್ರಯತ್ನ ಮಾಡಿದ್ದಾರೆ. ಆದರೆ ದ್ವಾರಕಾಬಾಯಿ ಅವರು ಚಿಕಿತ್ಸೆ ಫಲಕಾರಿಯಾಗದೇ ನಿಧನರಾಗಿದ್​ದಾರೆ. ಶಾಂತಾರಾಮ್ ಅವರ ಸ್ಥಿತಿ ಇನ್ನೂ ಗಂಭೀರವಾಗಿದ್ದು, ಅವರನ್ನು ಮಾಲೆಗಾಂವ್‌ನ ಖಾಸಗಿ ಆಸ್ಪತ್ರೆಯ ಐಸಿಯು ವಿಭಾಗದಲ್ಲಿ ವೆಂಟಿಲೇಟರ್‌ನಲ್ಲಿ ಇರಿಸಿ ನಿಕಟ ನಿಗಾವಹಿಸಲಾಗಿದೆ.

ಈ ಘಟನೆಯ ನಂತರ ಮಟನ್ ಜೊತೆ ಮೊಸರು ತಿಂದರೆ ವಿಷವಾಗುತ್ತದೆ ಎಂಬ ಚರ್ಚೆ ಸ್ಥಳೀಯರಲ್ಲಿ ತೀವ್ರಗೊಂಡಿದೆ. ಆದರೆ ವೈದ್ಯರು ಮತ್ತು ಆಹಾರ ತಜ್ಞರು ಹೇಳುವಂತೆ, ಮಟನ್ ಮತ್ತು ಮೊಸರನ್ನು ಒಟ್ಟಿಗೆ ತಿನ್ನುವುದರಿಂದ ನೇರವಾಗಿ ಸಾವಿಗೆ ಕಾರಣವಾಗುವ ಸಾಧ್ಯತೆ ಇಲ್ಲ. ನಿಜವಾದ ಕಾರಣ ಆಹಾರ ವಿಷ (ಫುಡ್ ಪಾಯ್ಸನಿಂಗ್) ಆಗಿರಬಹುದು ಎಂದು ಶಂಕಿಸಲಾಗಿದೆ. ಮಟನ್​ ಹಳಸಿರಬಹುದು ಅಥವಾ ಮೊಸರಿನಲ್ಲಿ ಅಪಾಯಕಾರಿ ಬ್ಯಾಕ್ಟೀರಿಯಾಗಳು ಬೆಳೆದಿರಬಹುದು. ಆರ್ದ್ರ ಮತ್ತು ಬಿಸಿ ವಾತಾವರಣದಲ್ಲಿ ತಯಾರಿಸಿದ ಆಹಾರ ಬೇಗನೆ ಕಲುಷಿತವಾಗುವ ಸಾಧ್ಯತೆ ಇದೆ ಎಂದು ತಜ್ಞರು ಹೇಳಿದ್ದಾರೆ.

ಘಟನೆಯ ಗಂಭೀರತೆಯನ್ನು ಗಮನಿಸಿದ ಪೊಲೀಸರು ತಕ್ಷಣವೇ ಕ್ರಮ ಕೈಗೊಂಡಿದ್ದಾರೆ. ಮೃತರ ಮನೆಯಿಂದ ಆ ರಾತ್ರಿ ತಯಾರಿಸಲಾದ ಮಟನ್​, ಪಾತ್ರೆಗಳು ಮತ್ತು ಮೊಸರಿನ ಮಾದರಿಗಳನ್ನು ಸೀಲ್ ಮಾಡಿ ವಶಪಡಿಸಿಕೊಂಡಿದ್ದಾರೆ. ಈ ಮಾದರಿಗಳನ್ನು ರಾಸಾಯನಿಕ ವಿಶ್ಲೇಷಣೆಗಾಗಿ ಪುಣೆಯ ವಿಧಿವಿಜ್ಞಾನ ಪ್ರಯೋಗಾಲಯಕ್ಕೆ ಕಳುಹಿಸಲಾಗಿದೆ.