ಪಾಟೀದಾರ್ ಜ್ಯೂಸ್ ಸೆಂಟರ್‌ನ ಗೋದಾಮಿನಲ್ಲಿ ಅತ್ಯಂತ ಕಳಪೆ ಗುಣಮಟ್ಟದ ಮತ್ತು ಕೊಳೆತು ನಾರುತ್ತಿದ್ದ ಮಾವಿನ ಹಣ್ಣುಗಳಿಂದ ರಸವನ್ನು ತಯಾರಿಸಿ ಮಾರುಕಟ್ಟೆಗೆ ಸಪ್ಲೈ ಮಾಡಲಾಗುತ್ತಿದೆ ಎಂಬ ಖಚಿತ ಮಾಹಿತಿ ಆಹಾರ ಸುರಕ್ಷತಾ ಇಲಾಖೆಗೆ ಲಭ್ಯವಾಗಿತ್ತು. ಈ ಹಿನ್ನೆಲೆಯಲ್ಲಿ ಆಹಾರ ಸುರಕ್ಷತಾ ಅಧಿಕಾರಿ ವಿ. ಜೆ. ಚೌಧರಿ ನೇತೃತ್ವದ ವಿಶೇಷ ತಂಡವು ನುಗರ್ ಗ್ರಾಮದ ಬಳಿಯಿರುವ ಗೋಡೌನ್ ಮೇಲೆ ಸಡನ್ ರೈಡ್ ಮಾಡಿತು. ಅದರಂತೆ, ಅಲ್ಲಿ ರಸ ತೆಗೆಯಲು ಸಂಗ್ರಹಿಸಿಡಲಾಗಿದ್ದ ಹಣ್ಣುಗಳ ಸ್ಥಿತಿಯನ್ನು ಕಂಡು ಸ್ವತಃ ತನಿಖಾಧಿಕಾರಿಗಳೇ ಒಂದು ಕ್ಷಣ ದಿಗ್ಭ್ರಮೆಗೊಂಡರು.

ಹೌದು, ಅಧಿಕಾರಿಗಳ ತಂಡ ಪಾಟೀದಾರ್ ಜ್ಯೂಸ್ ಸೆಂಟರ್ ಪ್ರವೇಶಿಸಿ ಅಲ್ಲಿ ಗೋಡೌನ್ನಲ್ಲಿ ಇಡಲಾಗಿದ್ದ ಮಾವಿನ ಹಣ್ಣುಗಳನ್ನು ಪರಿಶೀಲಿಸಿದಾಗ ಸ್ವತಃ ಅಧಿಕಾರಿಗಳೇ ದಂಗಾಗುವಂತಹ ಆಘಾತಕಾರಿ ದೃಶ್ಯ ಕಂಡುಬಂದಿದೆ. ಅದರಂತೆ, ಜ್ಯೂಸ್ ಮಾಡಲು ಇರಿಸಲಾಗಿದ್ದ ಮಾವಿನ ಹಣ್ಣುಗಳು ಸಂಪೂರ್ಣವಾಗಿ ಕೊಳೆತು ವಾಸನೆ ಬೀರಲಾರಂಭಿಸಿದ್ದವು.

ಮಾಧ್ಯಮ ವರದಿಗಳ ಪ್ರಕಾರ, ದಾಳಿಯ ವೇಳೆ ಕೇವಲ ಕಚ್ಚಾ ಹಣ್ಣು ಮಾತ್ರವಲ್ಲ, ಈಗಾಗಲೇ ತಯಾರಿಸಿ ಡ್ರಮ್‌ಗಳಲ್ಲಿ ಸಂಗ್ರಹಿಸಿಟ್ಟಿದ್ದ ಸುಮಾರು 230 ಕೆಜಿ ಮಾವಿನ ರಸವೂ ಪತ್ತೆಯಾಗಿದೆ. ಈ ರಸವನ್ನು ಯಾವುದೇ ಸ್ವಚ್ಛತೆಯಿಲ್ಲದ ಪಾತ್ರೆಗಳಲ್ಲಿ ಇಡಲಾಗಿತ್ತು ಮತ್ತು ಅದರ ಬಣ್ಣ ಹಾಗೂ ವಾಸನೆ ಬದಲಾಗಿತ್ತು. ಆಹಾರ ಸುರಕ್ಷತಾ ಮಾನದಂಡಗಳ ಪ್ರಕಾರ ಇದು ವಿಷಕಾರಿ ಎಂದು ಅಧಿಕಾರಿಗಳು ಹೇಳಿದ್ದಾರೆ. ಇಂತಹ ರಸ ಕುಡಿದರೆ ವಾಂತಿ, ಭೇದಿ, ಫುಡ್ ಪಾಯ್ಸನ್ ಮತ್ತು ದೀರ್ಘಕಾಲದ ಹೊಟ್ಟೆ ಸಮಸ್ಯೆಗಳು ಉಂಟಾಗುವ ಸಾಧ್ಯತೆ ಹೆಚ್ಚು.

ಮುಂದುವರೆದು, ಆಹಾರ ಅಧಿಕಾರಿ ವಿ ಜೆ ಚೌಧರಿ ಅವರ ಸೂಚನೆಯ ಮೇರೆಗೆ ತಂಡವು ಜೆಸಿಬಿ ಯಂತ್ರದ ಸಹಾಯದಿಂದ ದೊಡ್ಡ ಗುಂಡಿ ತೋಡಿತು. ವಶಪಡಿಸಿಕೊಂಡ 2025 ಕೆಜಿ ಕೊಳೆತ ಮಾವು ಮತ್ತು 230 ಕೆಜಿ ರಸವನ್ನು ಅದರಲ್ಲಿ ಹಾಕಿ ರಾಸಾಯನಿಕ ಸಿಂಪಡಿಸಿ ಸಂಪೂರ್ಣ ನಾಶಪಡಿಸಲಾಯಿತು.