ಐರ್ಲೆಂಡ್​​ ಕ್ರಿಕೆಟ್​ ತಂಡ ಭಾರತದ ವಿರುದ್ಧ ಗೆಲುವು ಸಾಧಿಸಿದ ಬೆನ್ನಲ್ಲೇ ಐರ್ಲೆಂಡ್ ಕ್ರಿಕೆಟ್ ತಂಡದ ಮುಖ್ಯ ಕೋಚ್ ಹೆನ್ರಿಕ್ ಮಲನ್ ತಮ್ಮ ಹುದ್ದೆಗೆ ರಾಜೀನಾಮೆ ನೀಡಿದ್ದಾರೆ. ಕಳೆದ ನಾಲ್ಕು ವರ್ಷಗಳಿಗೂ ಹೆಚ್ಚು ಕಾಲ ಐರ್ಲೆಂಡ್​ ತಂಡದ ಹೆಡ್​ ಕೋಚ್​ ಆಗಿದ್ದ ಮಲನ್​​. ತಂಡದ ಐತಿಹಾಸಿಕ ಗೆಲುವಿನ ನಂತರ ಮುಖ್ಯ ಕೋಚ್ ಹುದ್ದೆಗೆ ರಾಜೀನಾಮೆ ನೀಡುವುದಾಗಿ ಘೋಷಣೆ ಮಾಡಿದ್ದಾರೆ.

ತಮ್ಮ ಹೆಡ್​​ ಕೋಚ್​ ಸ್ಥಾನಕ್ಕೆ ರಾಜೀನಾಮೆ ನೀಡಿದ ನಂತರ ಮಲನ್ ಭಾವುಕರಾಗಿ ಮಾತನಾಡಿದ್ದಾರೆ. ‘ಈ ಆಟಗಾರರು, ಸಿಬ್ಬಂದಿ ಮತ್ತು ಐರಿಶ್ ಕ್ರಿಕೆಟ್‌ನೊಂದಿಗೆ ಕೆಲಸ ಮಾಡಿರೋದು ಒಳ್ಳೆಯ ಅನುಭವ.  ಮೆಲ್ಬೋರ್ನ್‌ನಲ್ಲಿ ಇಂಗ್ಲೆಂಡ್ ವಿರುದ್ಧದ ನಮ್ಮ ಐತಿಹಾಸಿಕ T20 ವಿಶ್ವಕಪ್ ಗೆಲುವು, ಅಬುಧಾಬಿಯಲ್ಲಿ ಅಫ್ಘಾನಿಸ್ತಾನ ವಿರುದ್ಧದ ನಮ್ಮ ಮೊದಲ ಟೆಸ್ಟ್ ಗೆಲುವು, ಬೆಲ್‌ಫಾಸ್ಟ್‌ನಲ್ಲಿ ಜಿಂಬಾಬ್ವೆ ವಿರುದ್ಧದ ನಮ್ಮ ಮೊದಲ ಟೆಸ್ಟ್ ಗೆಲುವು ಮತ್ತು ಭಾರತ ವಿರುದ್ಧದ T20 ಸರಣಿ ಗೆಲುವುಗಳನ್ನು ನಾವು ಹೆಮ್ಮೆಯಿಂದ ನೆನಪಿಸಿಕೊಳ್ಳಬಹುದು. ಇದಲ್ಲದೆ, ನಾವು ಪಾಕಿಸ್ತಾನ, ವೆಸ್ಟ್ ಇಂಡೀಸ್ ಮತ್ತು ದಕ್ಷಿಣ ಆಫ್ರಿಕಾದಂತಹ ವಿಶ್ವದ ಅಗ್ರ ತಂಡಗಳನ್ನು ಸೋಲಿಸಿದ್ದೇವೆ. ನಮ್ಮ ದೃಷ್ಟಿಕೋನವನ್ನು ನಂಬಿದ್ದಕ್ಕಾಗಿ ಎಲ್ಲರಿಗೂ ಧನ್ಯವಾದಗಳು. ಇದು ತುಂಬಾ ವಿಶೇಷವಾದ ಪ್ರಯಾಣವಾಗಿತ್ತು ಎಂದು ಮಲನ್​​ ಹೇಳಿದ್ದಾರೆ.

ಐರ್ಲೆಂಡ್ ಪುರುಷರ ಕ್ರಿಕೆಟ್ ತಂಡದ ಹೊಸ ಮುಖ್ಯ ಕೋಚ್ ಆಗಿ ಗ್ಯಾರಿ ವಿಲ್ಸನ್ ಅವರು ನೇಮಕಗೊಂಡಿದ್ದಾರೆ. 40 ವರ್ಷದ ವಿಲ್ಸನ್ 2020 ರಲ್ಲಿ ನಿವೃತ್ತರಾಗಿದ್ದರು. ತಮ್ಮ 15 ವರ್ಷಗಳ ಅಂತರರಾಷ್ಟ್ರೀಯ ವೃತ್ತಿಜೀವನದಲ್ಲಿ ಐರ್ಲೆಂಡ್ ಪರ 292 ಪಂದ್ಯಗಳನ್ನು ಆಡಿದ್ದ ವಿಲ್ಸನ್​​  ಮುಖ್ಯ ಕೋಚ್​​ ಹುದ್ದೆಗೇರಿದ್ದಾರೆ. ತಮ್ಮ ಹೊಸ ಪಾತ್ರದ ಕುರಿತು ಮಾತನಾಡಿರುವ ವಿಲ್ಸನ್, ‘ಒಬ್ಬ ಆಟಗಾರನಾಗಿ ಐರ್ಲೆಂಡ್ ಅನ್ನು ಪ್ರತಿನಿಧಿಸಿದ್ದಕ್ಕೆ ನನಗೆ ಯಾವಾಗಲೂ ತುಂಬಾ ಹೆಮ್ಮೆಯಾಗುತ್ತದೆ, ಆದರೆ ಈಗ ಹೆಡ್​ ಕೋಚ್​ ಪಾತ್ರವನ್ನು ವಹಿಸಿಕೊಳ್ಳುವುದು ನನಗೆ ಸಿಕ್ಕ ದೊಡ್ಡ ಗೌರವ ಎಂದು ಹೇಳಿದರು.