ಪಿವಿ ಸಿಂಧು ಕಳೆದ ಕೆಲವು ವರ್ಷಗಳಿಂದ ಬೆಂಗಳೂರಿನಲ್ಲಿ ವಾಸಿಸುತ್ತಿದ್ದಾರೆ ಎಂಬುದು ಎಲ್ಲರಿಗೂ ತಿಳಿದಿರುವ ವಿಷಯ. ಈ ಸಂಗತಿಯನ್ನು ಉಲ್ಲೇಖಿಸಿ, ಸಿಂಧು ತಮ್ಮ ಇನ್‌ಸ್ಟಾಗ್ರಾಮ್ ಪೋಸ್ಟ್‌ನಲ್ಲಿ ಹಾಸ್ಯಮಯ ಕಾಮೆಂಟ್ ಅನ್ನು ಹಂಚಿಕೊಂಡಿದ್ದಾರೆ. “ಎಲ್ಲಾ ಆರ್‌ಸಿಬಿ ಅಭಿಮಾನಿಗಳಿಗೆ, ನಾನು ನಿಮ್ಮ ಲಕ್ಕಿ ಚಾರ್ಮ್​​ ಎಂದು ಹೇಳುತ್ತಿಲ್ಲ, ಆದರೆ ನಾನು ಬೆಂಗಳೂರಿಗೆ ಸ್ಥಳಾಂತರಗೊಂಡಾಗಿನಿಂದ, ನೀವು ಪ್ರತಿ ವರ್ಷವೂ ಟ್ರೋಫಿಯನ್ನು ಗೆಲ್ಲುತ್ತಿದ್ದೀರಿ. ಬೇಕಾದರೆ ಲೆಕ್ಕಾ ಮಾಡಿ!” ಅವರು ನಗುವ ಎಮೋಜಿಗಳೊಂದಿಗೆ ಪೋಸ್ಟ್ ಮಾಡಿದ್ದಾರೆ.

“ಅದ್ಭುತ ಆರ್‌ಸಿಬಿ ತಂಡಕ್ಕೆ , ಆಟಗಾರರು, ಸಿಬ್ಬಂದಿ, ಮ್ಯಾನೇಜ್​ಮೆಂಟ್ ಮತ್ತು ಎಲ್ಲಾ ಅಭಿಮಾನಿಗಳಿಗೆ ನನ್ನ ಹೃತ್ಪೂರ್ವಕ ಅಭಿನಂದನೆಗಳು. ಈ ಫ್ರಾಂಚೈಸಿ ವರ್ಷಗಳಲ್ಲಿ ಹಲವು ನೋವು, ಹಾರ್ಟ್​ ಬ್ರೆಕ್​​ಗಳನ್ನ ಅನುಭವಿಸಿದೆ. ಆದರೂ ಈ ತಂಡ ನಂಬಿಕೆ ಮತ್ತು ಪ್ರೀತಿಗೆ ಸಾಕ್ಷಿಯಾಗಿದೆ. ಅಂತಹ ತಂಡವು ಸತತ ಎರಡು ವರ್ಷಗಳಲ್​ಲಿ ಚಾಂಪಿಯನ್ ಆಗಿ ಎತ್ತರಕ್ಕೆ ನಿಂತಿರುವುದನ್ನು ನೋಡುವುದು ನಿಜಕ್ಕೂ ವಿಶೇಷವಾಗಿದೆ” ಎಂದು ಪಿವಿ ಸಿಂಧು ತಮ್ಮ ಪೋಸ್ಟ್​​​​ನಲ್ಲಿ ಹೇಳಿದ್ದಾರೆ.

ಕೊನೆಗೆ, ಸಿಂಧು ಆರ್‌ಸಿಬಿ ಸಹ-ಮಾಲೀಕ ಮತ್ತು ಅವರ ಆಪ್ತ ಸ್ನೇಹಿತೆ ಅನನ್ಯ ಬಿರ್ಲಾ ಅವರಿಗೆ ವಿಶೇಷ ಅಭಿನಂದನೆಗಳನ್ನು ಸಲ್ಲಿಸಿದ್ದಾರೆ. “ನನ್ನ ಆತ್ಮೀಯ ಸ್ನೇಹಿತೆ ಅನನ್ಯಾ ಬಿರ್ಲಾ ಮತ್ತು ಅವರ ಕುಟುಂಬಕ್ಕೆ ಅಭಿನಂದನೆಗಳು. ತಂಡದ ಮಾಲೀಕತ್ವವನ್ನು ವಹಿಸಿಕೊಂಡ ತಕ್ಷಣ ಚಾಂಪಿಯನ್‌ಶಿಪ್ ಗೆದ್ದಿರುವುದು ನೈಜ ಯಶಸ್ಸು” ಎಂದು ಪಿವಿ ಸಿಂಧು ಪ್ರಶಂಸೆ ವ್ಯಕ್ತಪಡಿಸಿದ್ದಾರೆ.