ವರದಿಗಳ ಪ್ರಕಾರ ಡೊನಾಲ್ಡ್ ಟ್ರಂಪ್ ಜೂನಿಯರ್ ಮತ್ತು 39 ವರ್ಷದ ಬೆಟ್ಟಿನಾ ಮೇ 21ರಂದು ಫ್ಲೋರಿಡಾದ ಪಾಮ್ ಬೀಚ್ ಕೌಂಟಿಯಲ್ಲಿ ವಿವಾಹವಾಗಿದ್ದಾರೆ. ನಂತರ ಮೇ 24ರ ಶನಿವಾರ ಬಹಾಮಾಸ್​ನ ಖಾಸಗಿ ದ್ವೀಪದಲ್ಲಿ ಆಪ್ತರೊಂದಿಗೆ ಪಾರ್ಟಿ ಕೂಡ ಮಾಡಿದ್ದಾರೆ. ಆದರೆ, ಕೆಲ ಕಾರಣಗಳಿಂದ ಡೊನಾಲ್ಡ್ ಟ್ರಂಪ್ ಅವರೇ ತಮ್ಮ ಮಗನ ವಿವಾಹದಲ್ಲಿ ಭಾಗವಹಿಸಲು ಸಾಧ್ಯವಾಗಿಲ್ಲ ಎನ್ನಲಾಗಿದೆ.

ಮುಂದುವರೆದು, ಟೈಮ್ಸ್​ ನೌ ವರದಿಯ ಪ್ರಕಾರ, ಬೆಟ್ಟಿನಾ ಆ್ಯಂಡರ್ಸನ್ ಅವರ ತಂದೆ ಎಚ್. ಲಾಯ್ ಆ್ಯಂಡರ್ಸನ್ ಅವರು ಪಾಮ್ ಬೀಚ್ ನ್ಯಾಷನಲ್ ಬ್ಯಾಂಕ್‌ನಲ್ಲಿ ಪ್ರಮುಖ ಹುದ್ದೆಯಲ್ಲಿದ್ದಾಗ ಜೆಫ್ರಿ ಎಪ್ಸ್ಟೀನ್ ಅವರ ಹಣಕಾಸಿನ ಖಾತೆಗಳನ್ನು ನಿರ್ವಹಿಸುತ್ತಿದ್ದರು ಎಂದು ಹೇಳಲಾಗಿದೆ. ಕೇವಲ ವ್ಯವಹಾರ ಅಷ್ಟೇ ಅಲ್ಲದೆ ವೈಯಕ್ತಿಕವಾಗಿಯೂ ಅವರು ಎಪ್ಸ್ಟೀನ್ ಅವರೊಂದಿಗೆ ಉತ್ತಮ ಸ್ನೇಹ ಹೊಂದಿದ್ದರು ಎಂಬ ಮಾಹಿತಿ ಈಗ ಇಂಟರ್ನೆಟ್‌ನಲ್ಲಿ ಹರಿದಾಡುತ್ತಿದೆ. ಅದರಂತೆ, ವಿವಾದಿತ ವ್ಯಕ್ತಿಯೊಬ್ಬನ ಹಣಕಾಸು ವ್ಯವಹಾರಗಳನ್ನು ನಿಭಾಯಿಸುತ್ತಿದ್ದ ಬ್ಯಾಂಕರ್ ಮಗಳು ಈಗ ಅಮೆರಿಕದ ಅಧ್ಯಕ್ಷರ ಕುಟುಂಬದ ಸೊಸೆಯಾಗಿರುವುದು ನೆಟ್ಟಿಗರ ತೀವ್ರ ಕುತೂಹಲಕ್ಕೆ ಕಾರಣವಾಗಿದೆ.

ಅಮೆರಿಕ ಅಧ್ಯಕ್ಷ ಟ್ರಂಪ್ ಮತ್ತು ಲೈಂಗಿಕ ಅಪರಾಧಿ ಎಪ್ಸ್ಟೀನ್ 1980ರಲ್ಲಿ ಪರಿಚಿತರಾದರು. ಅವರ ಸ್ನೇಹ ಎಷ್ಟರಮಟ್ಟಿಗಿತ್ತು ಅಂದ್ರೆ, 2002ರಲ್ಲಿ ಸಂದರ್ಶನವೊಂದರಲ್ಲಿ ಟ್ರಂಪ್, ಎಪ್ಸ್ಟೀನ್‌ನನ್ನು ಅದ್ಭುತ ವ್ಯಕ್ತಿ ಎಂದು ಕರೆದು, ಆತನಿಗೂ ನನ್ನಂತೆಯೇ ಸುಂದರ ಹಾಗೂ ವಯಸ್ಸಿನಲ್ಲಿ ಚಿಕ್ಕವರಾದ ಮಹಿಳೆಯರೆಂದರೆ ಇಷ್ಟ ಎಂದು ಹೇಳಿಕೆ ನೀಡಿದ್ದರು. ಆದ್ರೆ, 2004ರ ಸುಮಾರಿಗೆ, ಫ್ಲೋರಿಡಾದ ಪಾಮ್ ಬೀಚ್‌ನಲ್ಲಿರುವ ಐಷಾರಾಮಿ ಬಂಗಲೆಯೊಂದನ್ನು ಹರಾಜಿನಲ್ಲಿ ಖರೀದಿಸಲು ಇಬ್ಬರ ನಡುವೆ ತೀವ್ರ ಪೈಪೋಟಿ ನಡೆದಿತ್ತು, ಹಾಗಾಗಿ, ಅವರ ಸ್ನೇಹ ಮುರಿದುಬಿದ್ದಿತು.

ಏತನ್ಮಧ್ಯೆ, ಕೆಲ ತಿಂಗಳ ಹಿಂದೆ ಅಮೆರಿಕದ ಕಾಂಗ್ರೆಸ್ ಅಂಗೀಕರಿಸಿದ ಎಪ್ಸ್ಟೀನ್ ಫೈಲ್ಸ್ ಪಾರದರ್ಶಕತೆ ಕಾಯ್ದೆ ಅಡಿಯಲ್ಲಿ ನ್ಯಾಯಾಂಗ ಇಲಾಖೆಯು ಲಕ್ಷಾಂತರ ರಹಸ್ಯ ದಾಖಲೆಗಳು, ಇಮೇಲ್‌ಗಳು ಮತ್ತು ಫ್ಲೈಟ್ ಲಾಗ್‌ಗಳನ್ನು ಬಿಡುಗಡೆ ಮಾಡಿದೆ. ಅದರಂತೆ, ಈ ಅಧಿಕೃತ ದಾಖಲೆಗಳಲ್ಲಿ ಡೊನಾಲ್ಡ್ ಟ್ರಂಪ್ ಅವರ ಹೆಸರು ಸಾವಿರಾರು ಬಾರಿ ಉಲ್ಲೇಖಿಸಲಾಗಿದೆ. ಅದರಲ್ಲೂ, ಎಪ್ಸ್ಟೀನ್‌ನ ಸಂತ್ರಸ್ತೆಯೊಬ್ಬರು ತಮಗೆ 14 ವರ್ಷವಾಗಿದ್ದಾಗ ಎಪ್ಸ್ಟೀನ್ ತಮಗೆ ಟ್ರಂಪ್‌ನನ್ನು ಪರಿಚಯಿಸಿದ್ದರು ಎಂದು ಸಾಕ್ಷ್ಯ ನುಡಿದಿದ್ದಾರೆ. ಆದ್ರೆ, ಡೊನಾಲ್ಡ್ ಟ್ರಂಪ್ ಈ ಎಲ್ಲಾ ಆರೋಪಗಳನ್ನು ನಿರಾಕರಿಸಿ, “ತಮಗೆ ಎಪ್ಸ್ಟೀನ್‌ನ ಕಾನೂನುಬಾಹಿರ ಲೈಂಗಿಕ ದಂಧೆಗಳ ಬಗ್ಗೆ ಯಾವುದೇ ಮಾಹಿತಿ ಇರಲಿಲ್ಲ ಮತ್ತು ಕಳೆದ 15 ವರ್ಷಗಳಿಂದ ತಮಗೂ ಆತನಿಗೂ ಯಾವುದೇ ಸಂಬಂಧವಿರಲಿಲ್ಲ” ಎಂದು ಸ್ಪಷ್ಟಪಡಿಸಿದ್ದಾರೆ. ಆದರೆ, ಇದೀಗ ಎಪ್ಸ್ಟೀನ್ ಮಾಜಿ ಸಹಾಯಕನ ಮಗಳನ್ನೇ ಈಗ ಟ್ರಂಪ್​ ಮದುವೆ ಆಗಿರುವುದರಿಂದ, ಈ ವಿವಾದ ಮತ್ತೆ ಮುನ್ನಲೆಗೆ ಬಂದಿದೆ.