ಆ ದಿನ ತಾಯಿಯ ಒಡವೆ ಅಡವಿಟ್ಟು ಹೊರಟಿದ್ದ ಬಾಲಕ ಜಾನಕಿ ಅವರ ಕೊನೆಯ ದಿನಗಳಲ್ಲಿ ಮಗುವಿನಂತೆ ಆರೈಕೆ ಮಾಡಿ ನೋಡಿಕೊಂಡರು. ಎಂಥಾ ರಕ್ತ ಸಂಬಂಧ, ಎಂಥಾ ಬಂಧುಗಳು.. ಅಭಿಮಾನ ಹಾಗೂ ಮಮತೆಯಿಂದಲೇ ಹುಟ್ಟಿಕೊಂಡ ಇಂಥಹ ಅಮ್ಮ-ಮಗನ ಬಂಧವನ್ನು ಪದಗಳಲ್ಲಿ ಹೇಳೋಕೆ ಸಾಧ್ಯವೇ?

ಜಾನಕಿ ಅವರ ಅಂತ್ಯಸಂಸ್ಕಾರ ಅಭಿಮಾನಿಯ ಮಣ್ಣಿನಲ್ಲೇ ನೆರವೇರಿತು. ಜಾನಕಿ ಅವರು ಮೈಸೂರಿನ ಪ್ರೀಮಿಯರ್ ಸ್ಟುಡಿಯೋಗೆ ಬರುತ್ತಿರುತ್ತಾರೆ ಎಂದು ತಿಳಿದುಕೊಂಡಿದ್ದ ನವೀನ್ ಅವರು ಸ್ಟುಡಿಯೋ ಗೇಟ್ ಬಳಿ ಕಾಯುತ್ತಿದ್ದರು.

ನಿರ್ಮಾಪಕ ಎಂ.ಪಿ. ಶಂಕರ್ ಬಾಲಕನನ್ನು ಗಮನಿಸಿ ಒಂದು ದಿನ ಆತನನ್ನು ಹತ್ತಿರ ಕರೆದು ವಿಚಾರಿಸಿದರು. ನವೀನ್‌ನ ಅಭಿಮಾನಕ್ಕೆ ಬೆರಗಾಗಿ ಜಾನಕಿ ಅವರ ಚೆನ್ನೈ ನಿವಾಸದ ಫೋನ್ ನಂಬರ್ ಕೊಟ್ಟಿದ್ದರು.

ದಿನವೂ ತಾನು ಭೇಟಿ ಮಾಡಬೇಕು ಎಂದುಕೊಂಡಿದ್ದ ವ್ಯಕ್ತಿ ಬನ್ನಿ ಭೇಟಿ ಮಾಡಿ ಅಂತ ಹೇಳಿದ್ರೂ 13 ವರ್ಷದ ಹುಡುಗನಲ್ಲಿ ಮದ್ರಾಸ್​ಗೆ ಹೋಗೋ ದುಡ್ಡು ಎಲ್ಲಿಂದ ತಾನೇ ಇರುತ್ತೆ? ಚೆನ್ನೈಗೆ ಹೋಗಲು ಆ ಪುಟ್ಟ ಹುಡುಗರ ಬಳಿ ಹಣವಿರಲಿಲ್ಲ. ಆಗ ನವೀನ್ ಸದ್ದಿಲ್ಲದೆ ತಾಯಿಯ ಚಿನ್ನ ಅಡವಿಟ್ಟು ಹಣ ಹೊಂದಿಸಿದ್ದ.

ಮೈಸೂರಿಗೆ ಬಂದಾಗಲೆಲ್ಲ ಜಾನಕಮ್ಮ ಆತನನ್ನು ಭೇಟಿಯಾಗುತ್ತಿದ್ದರು. ಪುಟ್ಟ ಹುಡುಗನನ್ನು ಮಗನೆಂದೇ ಪರಿಗಣಿಸಿದ ಅವರ ಮಧ್ಯೆ ರಕ್ತಸಂಬಂಧವನ್ನೂ ಮೀರಿದ ಅಮ್ಮ-ಮಗನ ಬಾಂಧವ್ಯ ಗಟ್ಟಿಯಾಗಿತ್ತು.

ಜಾನಕಮ್ಮನವರ ಇಳಿ ವಯಸ್ಸಿನಲ್ಲಿ ಅವರ ಸಂಪೂರ್ಣ ಜವಾಬ್ದಾರಿ ಹೊತ್ತಿದ್ದು ನವೀನ್. ನವೀನ್ ಆರಂಭದಲ್ಲಿ ಎನ್.ಆರ್. ಮೊಹಲ್ಲಾದ ತಮ್ಮ ಮನೆಯಲ್ಲೇ ಇರಿಸಿಕೊಂಡು ಉಪಚರಿಸಿದರು. ಬಳಿಕ ಸ್ನೇಹಿತನ ಮಹದೇವಪುರ ರಸ್ತೆಯ ತೋಟದ ಮನೆಯಲ್ಲಿ ಪ್ರಶಾಂತ ವಾತಾವರಣ ಕಲ್ಪಿಸಿದರು. ಜಾನಕಿ ಅವರ ಆರೈಕೆಯನ್ನು ನವೀನ್ ಅವರ ತಾಯಿ ಶಾಂತಾ ಅವರು ಸ್ವಂತ ಸಹೋದರಿಯಂತೆ ಮಮತೆಯಿಂದ ಮಾಡಿದರು.