ಇನ್ನು, ಆರೋಪಿ ರಾಜ್‌ಕುಮಾರ್ ಫೋನ್ ವಶಕ್ಕೆ ಪಡೆದು ತನಿಖೆ ನಡೆಸಿದ ಸಂದರ್ಭದಲ್ಲಿ ಸೆಲ್ಫಿ ವಿಡಿಯೋ ಒಂದು ಪತ್ತೆಯಾಗಿದೆ. ಆರೋಪಿ ಆರು ಮಂದಿಯನ್ನು ಕೊಲೆ ಮಾಡುವ ತನ್ನ ಕೃತ್ಯಕ್ಕೆ ಕಾರಣವೇನು ಎಂದು ತಿಳಿಸಿದ್ದಾನೆ. ವಿಡಿಯೋದಲ್ಲಿ ತನ್ನ ಸಾವಿಗೆ ಈ ನಾಲ್ವರು ಕಾರಣ ಎಂದು ಆರೋಪಿ, ನಾಲ್ವರ ಹೆಸರನ್ನು ಉಲ್ಲೇಖಿಸಿದ್ದಾನೆ ಎಂದು ನ್ಯೂಸ್​18 ತೆಲುಗು ವರದಿ ಮಾಡಿದೆ.

ಕೃತ್ಯ ಎಸಗುವ ಮುನ್ನ ರಾಜ್‌ಕುಮಾರ್ ಸೆಲ್ಫಿ ವಿಡಿಯೋ ಮಾಡಿರೋದಾಗಿ ಪೊಲೀಸರು ಗುರುತಿಸಿದ್ದಾರೆ. ರಾಜ್‌ಕುಮಾರ್ ಮೃತದೇಹ ಪರಿಶೀಲನೆ ನಡೆಸಿದ ಸಂದರ್ಭದಲ್ಲಿ ಆತನ ಜೇಬಿನಲ್ಲಿ ಮೊಬೈಲ್ ಸಿಕ್ಕಿದೆ. ಇದರಲ್ಲಿ ಸುಮಾರು 2.26 ನಿಮಿಷದ ವಿಡಿಯೋ ಪತ್ತೆಯಾಗಿದೆ. ಹತ್ಯೆ ನಡೆದ ದಿನ ಸುಮಾರು 4:45ರ ಸಮಯದಲ್ಲಿ ವಿಡಿಯೋ ರೆಕಾರ್ಡ್ ಮಾಡಲಾಗಿದ್ದು, ಜೊತೆಗೆ ನಾಲ್ಕು ಪುಟಗಳ ಡೆತ್​ ನೋಟ್ ಕೂಡ ಪತ್ತೆಯಾಗಿದೆ.

ಸೆಲ್ಫಿ ವಿಡಿಯೋದಲ್ಲಿ ಮತ್ತು ಸೂಸೈಡ್ ನೋಟ್‌ನಲ್ಲಿ, ನಾನು ಬಾಲಕಿಯ ಕುಟುಂಬವನ್ನು ನಂಬಿ ಮೋಸ ಹೋಗಿದ್ದೇನೆ. ಇದರಿಂದ ನನ್ನ ಜೀವನ ನಾಶ ಆಗಿದೆ. ನನ್ನನ್ನು ನನ್ನ ಕುಟುಂಬವನ್ನು ಯೂಸ್ ಮಾಡಿಕೊಂಡು ಈಗ ಪೊಲೀಸ್ ಕೇಸ್ ಹಾಕುತ್ತಿದ್ದಾರೆ. ಬಾಲಕಿಯೇ ನನ್ನನ್ನು ಪ್ರೀತಿ ಮಾಡುತ್ತಿದ್ದೀನಿ ಅಂತ ನನ್ನ ಹಿಂದೆ ಬಿದ್ದಳು. ನಾನು ಒಪ್ಪಿಲ್ಲ ಅಂದಿದ್ದಕ್ಕೆ ಸಾಯೋದಾಗಿ ಬೆದರಿಕೆ ಹಾಕಿದ್ದಳು. ಇದರಿಂದ ನಾನು ಪ್ರೀತಿಗೆ ಸರಿ ಅಂತ ಹೇಳಿದ್ದೆ, ಒಮ್ಮೆ ಆಕೆಯನ್ನು ಭೇಟಿ ಮಾಡಲು ತೆರಳಿದ ಸಂದರ್ಭದಲ್ಲಿ ಆಕೆಯ ತಾಯಿ, ಅಜ್ಜಿ ನೋಡಿ ನನಗೆ ಹಣ ನೀಡಲು ಬೆದರಿಕೆ ಹಾಕಿದ್ದರು. ಅವರು ಕೇಳಿದಾಗ ಎಲ್ಲಾ ಸಮಯದಲ್ಲೂ ಹಣ ಕೊಟ್ಟಿದ್ದೀನಿ. ಇದರಿಂದ ನನಗೆ ಇದ್ದ ಎರಡು ಎಕರೆ ಭೂಮಿಯನ್ನು ಮಾರಾಟ ಮಾಡಿ, ನನ್ನ ಕುಟುಂಬ-ಮಕ್ಕಳಿಗೆ ಏನು ಇಲ್ಲದಂತೆ ಮಾಡಿದ್ದೀನಿ. ಕೊನೆಗೆ ಈಗ ಪೊಲೀಸ್ ಕೇಸ್ ಹಾಕಿ ಜೈಲಿಗೆ ಕಳುಹಿಸುವ ಕೆಲಸ ಮಾಡಿದ್ದಾರೆ ಎಂದು ಆರೋಪಿಸಿದ್ದಾನೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.