ದಿ ಪ್ಯಾರಡೈಸ್ ಚಿತ್ರದಲ್ಲಿ ನಾನಿ ಜಾದಲ್ ಎಂಬ ಪಾತ್ರದಲ್ಲಿ ನಟಿಸಿದ್ದಾರೆ. 1980ರ ದಶಕದ ಸಿಕಂದರಾಬಾದ್ ಹಿನ್ನೆಲೆಯ ಕಥೆಯಲ್ಲಿ ಸಾಮಾಜಿಕ ಅಸಮಾನತೆ ಹಾಗೂ ಹಕ್ಕುಗಳಿಗಾಗಿ ನಡೆಯುವ ಹೋರಾಟದ ಸುತ್ತ ಸಿನಿಮಾ ಸಾಗುತ್ತದೆ. ಈ ಪಾತ್ರಕ್ಕಾಗಿ ನಾನಿ ತಮ್ಮ ಲುಕ್ನಲ್ಲಿಯೂ ಸಾಕಷ್ಟು ಬದಲಾವಣೆ ಮಾಡಿಕೊಂಡಿದ್ದಾರೆ.
I have seen all your reactions and responses. I’ve received all your love and equally enjoyed your hilarious trolls. I’m heartwarmed by the way audience have owned the film, and also learnt from the flaws that critics and reviewers have pointed out.
Thank you for everything is…
— Nani (@NameisNani) September 25, 2026
ಈ ಹಿಂದೆ ನಾನಿಯನ್ನು ಹೆಚ್ಚಾಗಿ ಕೌಟುಂಬಿಕ ಪಾತ್ರಗಳಲ್ಲಿ ನೋಡಿದ್ದ ಪ್ರೇಕ್ಷಕರಿಗೆ ದಿ ಪ್ಯಾರಡೈಸ್ನಲ್ಲಿನ ಅವರ ಆಕ್ಷನ್ ಅವತಾರ ಹೊಸ ಅನುಭವವಾಗಿದೆ. ಚಿತ್ರದಲ್ಲಿ ಹಿಂಸಾತ್ಮಕ ಆಕ್ಷನ್ ದೃಶ್ಯಗಳು ಹೆಚ್ಚಾಗಿದ್ದು, ಮಾಸ್ ಪ್ರೇಕ್ಷಕರನ್ನು ಗಮನದಲ್ಲಿಟ್ಟುಕೊಂಡು ಸಿನಿಮಾ ರೂಪಿಸಲಾಗಿದೆ.
ಚಿತ್ರ ಬಿಡುಗಡೆಯಾದ ಬಳಿಕ ಸಾಮಾಜಿಕ ಜಾಲತಾಣಗಳಲ್ಲಿ ಪ್ರೇಕ್ಷಕರ ಪ್ರತಿಕ್ರಿಯೆಗಳು ವಿಭಿನ್ನವಾಗಿವೆ. ಕೆಲವರು ನಾನಿ ಅವರ ಅಭಿನಯ ಮತ್ತು ಚಿತ್ರದ ಆಕ್ಷನ್ ದೃಶ್ಯಗಳನ್ನು ಮೆಚ್ಚಿಕೊಂಡಿದ್ದರೆ, ಇನ್ನೂ ಕೆಲವರು ಚಿತ್ರಕಥೆ, ಎರಡನೇ ಭಾಗದ ನಿರೂಪಣೆ, ಸಂಪಾದನೆ ಹಾಗೂ ಭಾವನಾತ್ಮಕ ದೃಶ್ಯಗಳ ಕುರಿತು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ವಿಶೇಷವಾಗಿ ಚಿತ್ರದ ಎರಡನೇ ಭಾಗ ನಿರೀಕ್ಷಿತ ಮಟ್ಟದಲ್ಲಿ ಪರಿಣಾಮ ಬೀರಿಲ್ಲ ಎಂಬ ಅಭಿಪ್ರಾಯಗಳು ಕೆಲವು ಪ್ರೇಕ್ಷಕರಿಂದ ವ್ಯಕ್ತವಾಗಿವೆ. ಅತಿಯಾದ ನಿಧಾನಗತಿಯ ದೃಶ್ಯಗಳು, ಜೋರಾದ ಹಿನ್ನೆಲೆ ಸಂಗೀತ, ಹಿಂಸಾತ್ಮಕ ದೃಶ್ಯಗಳು ಮತ್ತು ಕೆಲವು ದೃಶ್ಯಗಳ ನಿರೂಪಣೆಯ ಬಗ್ಗೆಯೂ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆ ನಡೆದಿದೆ.
ಸಿನಿಮಾದ ಬಗ್ಗೆ ಬಂದ ಪ್ರತಿಕ್ರಿಯೆಗಳಿಗೆ ನಾನಿ ಸಾಮಾಜಿಕ ಜಾಲತಾಣದ ಮೂಲಕ ಪ್ರತಿಕ್ರಿಯಿಸಿದ್ದಾರೆ. ಪ್ರೇಕ್ಷಕರಿಂದ ಬಂದ ಎಲ್ಲ ಪ್ರತಿಕ್ರಿಯೆಗಳು ಮತ್ತು ಅಭಿಪ್ರಾಯಗಳನ್ನು ತಾವು ಗಮನಿಸಿರುವುದಾಗಿ ಹೇಳಿದ್ದಾರೆ.
ಪ್ರೇಕ್ಷಕರು ತೋರಿದ ಪ್ರೀತಿಯನ್ನು ಸ್ವೀಕರಿಸಿರುವುದರ ಜೊತೆಗೆ, ಸಿನಿಮಾವನ್ನು ಕುರಿತಾಗಿ ಬಂದ ಹಾಸ್ಯಮಯ ಟ್ರೋಲ್ಗಳನ್ನೂ ತಾವು ಆನಂದಿಸಿದ್ದಾಗಿ ನಾನಿ ತಿಳಿಸಿದ್ದಾರೆ. ಪ್ರೇಕ್ಷಕರು ಸಿನಿಮಾವನ್ನು ತಮ್ಮದೇ ಚಿತ್ರವೆಂದು ಭಾವಿಸಿ ಸ್ವೀಕರಿಸಿರುವುದು ತಮ್ಮ ಮನಸ್ಸಿಗೆ ಹತ್ತಿರವಾಗಿದೆ ಎಂದು ಹೇಳಿದ್ದಾರೆ.
ನಾನಿ ಪ್ರತಿಕ್ರಿಯೆಯಲ್ಲಿ ಗಮನ ಸೆಳೆದ ಮತ್ತೊಂದು ಅಂಶವೆಂದರೆ ವಿಮರ್ಶಕರ ಟೀಕೆಗಳನ್ನು ಸ್ವೀಕರಿಸಿರುವುದು. ವಿಮರ್ಶಕರು ಹಾಗೂ ವಿಮರ್ಶಕರು ಸೂಚಿಸಿದ ಚಿತ್ರದ ಲೋಪದೋಷಗಳಿಂದ ತಾವು ಪಾಠ ಕಲಿತಿರುವುದಾಗಿ ಹೇಳಿದ್ದಾರೆ.
ಚಿತ್ರ ನಿರ್ಮಾಣದ ಸಂದರ್ಭದಲ್ಲಿ ತಂಡ ಅಪಾರ ಶ್ರಮ ವಹಿಸಿದೆ ಎಂದು ತಿಳಿಸಿರುವ ನಾನಿ, ಪ್ರೇಕ್ಷಕರಿಗೆ ವಿಭಿನ್ನ ಅನುಭವ ನೀಡುವ ಉದ್ದೇಶದಿಂದ ದಿ ಪ್ಯಾರಡೈಸ್ ರೂಪಿಸಲಾಗಿದೆ ಎಂದು ಹೇಳಿದ್ದಾರೆ. ಸಿನಿಮಾವನ್ನು ಸಂಭ್ರಮಿಸುವುದಾಗಲಿ ಅಥವಾ ಅದರ ಬಗ್ಗೆ ತೀರ್ಪು ನೀಡುವುದಾಗಲಿ ಈಗ ಪ್ರೇಕ್ಷಕರ ಕೈಯಲ್ಲಿದೆ ಎಂಬ ಅರ್ಥದಲ್ಲಿ ಪ್ರತಿಕ್ರಿಯಿಸಿದ್ದಾರೆ.
ಸಿನಿಮಾದ ಬಗ್ಗೆ ಬಂದ ಟೀಕೆಗಳ ನಡುವೆಯೂ ನಾನಿ ಪ್ರೇಕ್ಷಕರ ಪ್ರೀತಿಗೆ ಧನ್ಯವಾದ ತಿಳಿಸಿದ್ದಾರೆ. ಸಿನಿಮಾ ಬಿಡುಗಡೆಯ ಮುನ್ನವೇ ಚಿತ್ರಕ್ಕೆ ಸಾಕಷ್ಟು ನಿರೀಕ್ಷೆ ನಿರ್ಮಾಣವಾಗಿತ್ತು. ಬಿಡುಗಡೆಯ ಬಳಿಕ ಪ್ರತಿಕ್ರಿಯೆಗಳು ವಿಭಿನ್ನವಾಗಿದ್ದರೂ, ಪ್ರೇಕ್ಷಕರು ತೋರಿದ ಉತ್ಸಾಹ ಮತ್ತು ತಮ್ಮ ಮೇಲಿಟ್ಟಿರುವ ಪ್ರೀತಿಯಿಂದ ಮನಸ್ಸು ಕೃತಜ್ಞತೆಯಿಂದ ತುಂಬಿದೆ ಎಂದು ನಾನಿ ಹೇಳಿದ್ದಾರೆ.
ದಿ ಪ್ಯಾರಡೈಸ್ ಚಿತ್ರವನ್ನು ಶ್ರೀಕಾಂತ್ ಒಡೆಲ ನಿರ್ದೇಶಿಸಿದ್ದಾರೆ. ಈ ಹಿಂದೆ ನಾನಿ ಮತ್ತು ಶ್ರೀಕಾಂತ್ ಒಡೆಲ ದಸರಾ ಸಿನಿಮಾದಲ್ಲಿ ಒಟ್ಟಿಗೆ ಕೆಲಸ ಮಾಡಿದ್ದರು. ಇದೀಗ ಮತ್ತೊಮ್ಮೆ ವಿಭಿನ್ನ ಕಥೆಯೊಂದಿಗೆ ಇಬ್ಬರೂ ಒಂದಾಗಿದ್ದಾರೆ.
ಚಿತ್ರದಲ್ಲಿ ನಾನಿ ಜೊತೆಗೆ ಖಯಾದು ಲೋಹರ್, ಮೋಹನ್ ಬಾಬು, ರಾಘವ್ ಜುಯಲ್ ಮತ್ತು ಸೋನಾಲಿ ಕುಲಕರ್ಣಿ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಅನಿರುದ್ಧ್ ರವಿಚಂದರ್ ಚಿತ್ರದ ಸಂಗೀತ ಸಂಯೋಜನೆ ಮಾಡಿದ್ದಾರೆ.
