“ನಾಯಕತ್ವದ ದೃಷ್ಟಿಯಿಂದ ಪ್ರಧಾನಿ ನರೇಂದ್ರ ಮೋದಿ ಅವರು ಅತ್ಯಂತ ಟೆಕ್-ಸ್ಯಾವಿ. ಅನೇಕರಿಗಿಂತ ಬೇಗನೆ ತಾಂತ್ರಿಕ ನಾವೀನ್ಯತೆಗಳನ್ನು ಗುರುತಿಸುತ್ತಾರೆ. ಆದರೆ ಇದು ಯಾವುದೇ ಒಬ್ಬ ವ್ಯಕ್ತಿಯ ಮೇಲೆ ಅವಲಂಬಿತವಾಗಿರಬಾರದು. ದೇಶವು ತಾಂತ್ರಿಕ ಬದಲಾವಣೆಗಳನ್ನು ವೇಗವಾಗಿ ಗುರುತಿಸಿ ಪ್ರತಿಕ್ರಿಯಿಸುವಂತೆ ಇದನ್ನು ಸಂಸ್ಥಾತ್ಮಕಗೊಳಿಸಬೇಕು,” ಎಂದೂ ಈ ಸಂದರ್ಭದಲ್ಲಿ ಅವರು ತಿಳಿಸಿದರು.

ಎರಡನೇ ಮಹಾಯುದ್ಧದ ನಂತರದ ಅತ್ಯಧಿಕ ಭೂರಾಜಕೀಯ ಸಂಘರ್ಷಗಳ ಕಾಲದಲ್ಲಿ ನಾವಿದ್ದೇವೆ. ಯುದ್ಧಭೂಮಿಯಿಂದ ನಿರಂತರವಾಗಿ ಪಾಠ ಕಲಿಯುವ ಅಗತ್ಯವಿದೆ. ಆಪರೇಷನ್ ಸಿಂದೂರ್ ಸೇರಿದಂತೆ ಭಾರತದ ಇತ್ತೀಚಿನ ಅನುಭವಗಳೂ ಇದಕ್ಕೆ ಸೇರುತ್ತವೆ ಎಂದು ಅವರು ಈ ಸಂದರ್ಭದಲ್ಲಿ ಉಲ್ಲೇಖಿಸಿದರು. ಈ ಪಾಠಗಳು ವಹಿವಾಟು, ಉದ್ಯಮ ಮತ್ತು ಸಾರ್ವಜನಿಕ ವಲಯ, ಖಾಸಗಿ ಸಂಸ್ಥೆಗಳು ಹಾಗೂ ಸ್ಟಾರ್ಟ್‌ಅಪ್‌ಗಳನ್ನು ಒಳಗೊಂಡ ವೈವಿಧ್ಯಮಯ ರಕ್ಷಣಾ ಉತ್ಪಾದನಾ ವ್ಯವಸ್ಥೆಯ ನಿರ್ಮಾಣಕ್ಕೆ ಸಹಾಯ ಮಾಡುತ್ತಿವೆ ಎಂದು ಅವರು ಹೇಳಿದರು.

ರಕ್ಷಣಾ ಖರೀದಿ ಬಗ್ಗೆ ಮಾತನಾಡುತ್ತಾ, ಏಕೈಕ ಖರೀದಿದಾರ ಮಾರುಕಟ್ಟೆಯಾದ್ದರಿಂದ ಸರ್ಕಾರದ ಖರೀದಿ ಶಕ್ತಿಯು ಉದ್ಯಮವನ್ನು ಉಳಿಸಿಕೊಳ್ಳಬಲ್ಲದು. ಈ ನಿಟ್ಟಿನಲ್ಲಿ ಪೂರೈಕೆದಾರರಿಗೆ ಭವಿಷ್ಯದ ಬಗ್ಗೆ ಚಿತ್ರಣ ನೀಡಲಾಗುತ್ತಿದೆ ಎಂದು ಅವರು ತಿಳಿಸಿದರು. ಅಲ್ಲದೇ ಕಳೆದ ಎರಡು ವರ್ಷಗಳಲ್ಲಿ ರಕ್ಷಣಾ ಆದೇಶಗಳ ವೇಗವನ್ನು ಎರಡು ಪಟ್ಟು ಹೆಚ್ಚಿಸಲಾಗಿದೆ . ಹಿಂದಿನ ಪ್ರವೃತ್ತಿಯ ಪ್ರಕಾರ ವಾರ್ಷಿಕ ₹50,000–80,000 ಕೋಟಿ ಇದ್ದ ಸ್ಥಾನದಲ್ಲಿ, ಈಗ ₹2 ಲಕ್ಷ ಕೋಟಿ ಆದೇಶಗಳನ್ನು ನೀಡಲಾಗಿದೆ. ಡ್ರೋನ್‌ಗಳಂತಹ ಹೊಸ ತಂತ್ರಜ್ಞಾನಗಳಿಗೆ ಖರೀದಿ ಚಕ್ರವನ್ನು ವೇಗಗೊಳಿಸಬೇಕು ಎಂದು ಸರ್ಕಾರ ಬಯಸುತ್ತಿದೆ. 6–8 ತಿಂಗಳಲ್ಲಿ ಒಪ್ಪಂದಗಳು, ಎರಡು ವರ್ಷಗಳೊಳಗೆ ಪೂರೈಕೆ ಎಂಬ ಗುರಿ ಇದೆ ಎಂದು ಅವರು ಹೇಳಿದರು.

ಇನ್ನು ಇದೇ ಸಂದರ್ಭದಲ್ಲಿ ಮಾತನಾಡಿದ ರಾಜೇಶ್ ಸಿಂಗ್ ₹3,000 ಕೋಟಿಗಿಂತ ಹೆಚ್ಚಿನ ಒಪ್ಪಂದಗಳು ಕ್ಯಾಬಿನೆಟ್ ಅನುಮೋದನೆಗೆ ಹೋಗುತ್ತವೆ. ಆದ್ದರಿಂದ ರಕ್ಷಣಾ ಸಚಿವಾಲಯದ ಹಣಕಾಸು ನಿಯೋಗವನ್ನು ಹೆಚ್ಚಿಸುವ ಅಗತ್ಯವಿದೆ, ಆಮದು ಅವಲಂಬನೆ ದುರ್ಬಲತೆ ಎಂದು ಹೇಳಿದ ಅವರು, ದೇಶದೊಳಗೇ ಸಂಪೂರ್ಣ ರಕ್ಷಣಾ ಪರಿಸರ ವ್ಯವಸ್ಥೆಯನ್ನು ನಿರ್ಮಿಸಿ, ಮಿತ್ರ ರಾಷ್ಟ್ರಗಳೊಂದಿಗೆ ಪರಸ್ಪರ ಅವಲಂಬನೆಯ ಚಕ್ರವನ್ನು ಸ್ಥಾಪಿಸಬೇಕು ಎಂದು ಒತ್ತಿ ಹೇಳಿದರು.