ದೇವಿಯಾಗಿ ಕನ್ನಡ ಕಿರುತೆರೆ ಲೋಕಕ್ಕೆ ಎಂಟ್ರಿ ಕೊಟ್ಟಿದ್ದ ವೈಷ್ಣವಿ ಗೌಡ, ಅಲ್ಲಿಂದಲೇ ಮಹಿಳೆಯರ ಮನಗೆದ್ದಿದ್ದರು. ಆದಾದ ಬಳಿಕ ಅವ್ರಿಗೆ ಬ್ರೇಕ್ ಕೊಟ್ಟಿದ್ದು ಕಲರ್ಸ್ ಕನ್ನಡದ ಅಗ್ನಿಸಾಕ್ಷಿ ಸೀರಿಯಲ್. ಸನ್ನಿಧಿಯಾಗಿ ನಟಿಸಿದ್ದ ವೈಷ್ಣವಿ ಗೌಡ, ಕರ್ನಾಟಕದ ಮನೆಮಗಳೇ ಆಗಿದ್ದರು. ಸಿದ್ಧಾರ್ಥ್ ಆಗಿ ನಟಿಸಿದ್ದ ವಿಜಯ್ ಸೂರ್ಯ ಹಾಗೂ ವೈಷ್ಣವಿ ಗೌಡ ಜೋಡಿ ಕರ್ನಾಟಕದ ಮನೆಮಾತಾಗಿತ್ತು.

ಅದಾದ ಬಳಿಕ ಬಿಗ್‌ ಬಾಸ್‌ಗೆ ಬಂದು, ವೀಕ್ಷಕರ ನೆಚ್ಚಿನ ಸ್ಪರ್ಧಿಯಾಗಿದ್ದ ವೈಷ್ಣವಿ ಗೌಡ, ಒಳ್ಳೆ ಹುಡ್ಗಿ ಅಂತ ಫುಲ್ ಮಾರ್ಕ್ಸ್ ಪಡೆದಿದ್ದರು. ಅದಾದ ಮೇಲೆ ಕನ್ನಡ ಕಿರುತೆರೆ ವೀಕ್ಷಕರು ಅವ್ರನ್ನು ಮಿಸ್ ಮಾಡಿಕೊಳ್ಳೋಕೆ ಶುರು ಮಾಡಿದ್ದರು. ಅದಾದ ಮೇಲೆ ಜೀ ಕನ್ನಡದಲ್ಲಿ ಸೀತಾರಾಮ ಧಾರಾವಾಹಿ ಮೂಲಕ ವೈಷ್ಣವಿ ಗೌಡ ರೀ ಎಂಟ್ರಿ ಆಗಿತ್ತು.

ಸೀತಾ ಆಗಿ ಎಲ್ಲಾ ಅಮ್ಮಂದಿರ ಫೇವರೇಟ್ ಆದ ವೈಷ್ಣವಿ ಗೌಡ, ಆ ಸೀರಿಯಲ್ ಮುಗಿಯುತ್ತಿದ್ದಂತೆ ಮದುವೆಯಾದರು. ಇದೀಗ ಗಂಡ, ಸಂಸಾರ ಅಂತ ಸುಖವಾಗಿರುವಾಗಲೇ ಮತ್ತೆ ಕಿರುತೆರೆಗೆ ವೈಷ್ಣವಿ ಗೌಡ ಗ್ರ್ಯಾಂಡ್ ಎಂಟ್ರಿ ಕೊಡುತ್ತಿದ್ದಾರೆ.

ಹೌದು, ಹೊಸ ಧಾರಾವಾಹಿಯಲ್ಲಿ ವೈಷ್ಣವಿ ಗೌಡ ನಟಿಸುತ್ತಿದ್ದಾರೆ. ‘ಗೆಳತಿ ಗಾಯತ್ರಿ’ ಎಂಬ ಮಹಿಳಾ ಪ್ರಧಾನ ಕಥೆ ಹೊಂದಿರುವ ಧಾರಾವಾಹಿ ಮೂಲಕ ವೈಷ್ಣವಿ ಗೌಡ ಕಿರುತೆರೆಗೆ ಕಮ್ ಬ್ಯಾಕ್ ಮಾಡ್ತಿದ್ದಾರೆ. ಅಂದಹಾಗೆ ಈ ಧಾರಾವಾಹಿಯಲ್ಲಿ ವೈಷ್ಣವಿ ಗೌಡ ಪಾತ್ರದ ಹೆಸರು ಗಾಯತ್ರಿಯಲ್ಲ, ಪಾರ್ವತಿ!

ಗೆಳತಿ ಗಾಯತ್ರಿ ಧಾರಾವಾಹಿಯಲ್ಲಿ ‘ಪಾರ್ವತಿ’ ಎಂಬ ಪಾತ್ರ ಮಾಡುತ್ತಿದ್ದು, ಶ್ರೀಮಂತ ಮನೆಯ ಹೆಣ್ಮಗಳಾಗಿ ವೈಷ್ಣವಿ ಕಾಣಿಸಿಕೊಂಡಿದ್ದಾರಂತೆ. ಇದೇ ಮೊದಲ ಬಾರಿಗೆ ಧಾರಾವಾಹಿಯ ಪ್ರಾರಂಭದಲ್ಲೇ ಈ ಪಾತ್ರ ಮದುವೆ ಆಗಲಿದ್ದು, ಇದೊಂದು ಸಂಪೂರ್ಣ ವಿಭಿನ್ನ ಪಾತ್ರ ಮತ್ತು ಕಥೆಯಾಗಿದೆ ಎನ್ನಲಾಗುತ್ತಿದೆ.

ಈ ಧಾರಾವಾಹಿಯಲ್ಲಿ ನಾಯಕಿ ಪಾರ್ವತಿಗೆ ಮದುವೆ ಆಗಿದೆ. ಒಳ್ಳೆಯ ಗುಣವಂತೆ. ಚಂದದ ಕುಟುಂಬದ ಒಡತಿ, ಮೇಲಾಗಿ ಶ್ರೀಮಂತೆ. ಇಷ್ಟೆಲ್ಲಾ ಸೌಕರ್ಯಗಳು ಇದ್ದರೂ ಕೂಡ ಅವಳಿಗೆ ಕಾಡುತ್ತಿರುವ ಕೊರತೆ ಅಂದರೆ ಆಕೆಯ ಗೆಳತನವಂಚೆ. ಪಾರ್ವತಿ ತನ್ನ ಬಾಲ್ಯದ ಗೆಳತಿ ಗಾಯತ್ರಿಯನ್ನು ಹುಡುಕುತ್ತಿರುತ್ತಾಳಂತೆ. ಸ್ನೇಹಿತೆ ಗಾಯತ್ರಿಯ ಹುಡುಕಾಟದ ಸುತ್ತ ನಡೆಯುವ ಏಳುಬೀಳುಗಳ ಕಥೆಯೇ ‘ಗೆಳತಿ ಗಾಯತ್ರಿ’ ಅಂತ ವಿಜಯ ಕರ್ನಾಟಕ ವರದಿ ಮಾಡಿದೆ.

ಗಾಯತ್ರಿ ಪಾತ್ರ ಮಾಡುತ್ತಿರೋದು ಮತ್ತೋರ್ವ ಖ್ಯಾತ ನಟಿ ಕೃತಿಕಾ ರವೀಂದ್ರ. ‘ರಾಧಾ ಕಲ್ಯಾಣ’, ‘ಭೂಮಿಗೆ ಬಂದ ಭಗವಂತ’ ಸೇರಿದಂತೆ ಹಲವು ಧಾರಾವಾಹಿಗಳಲ್ಲಿ ನಟಿಸಿ ಜನಪ್ರಿಯರಾದ ಕೃತಿಕಾ ರವೀಂದ್ರ ಗಾಯತ್ರಿ ಪಾತ್ರ ಮಾಡುತ್ತಿದ್ದಾರೆ. ಅಂದ ಹಾಗೆ ಸನ್ ಉದಯ ಟಿವಿಯಲ್ಲಿ ಈ ಧಾರಾವಾಹಿ ಪ್ರಸಾರವಾಗುತ್ತಿದ್ದು, ದಿನಾಂಕ ಹಾಗೂ ಸಮಯ ಇನ್ನಷ್ಟೇ ಘೋಷಣೆಯಾಗಬೇಕಿದೆ.