ತಮ್ಮ ಅದ್ಭುತ ಪ್ರದರ್ಶನಗಳಿಂದಾಗಿ ಭಾರತೀಯ ಕ್ರಿಕೆಟ್‌ನ ಹೊಸ ಮುಖವಾಗಿ ಏರುತ್ತಿರುವ ವೈಭವ್ ಸೂರ್ಯವಂಶಿ ಅಂತರರಾಷ್ಟ್ರೀಯ ಮಟ್ಟದಲ್ಲಿ ಪಾದಾರ್ಪಣೆ ಮಾಡಲು ಸಜ್ಜಾಗಿದ್ದಾರೆ. ಈ ಶುಕ್ರವಾರ ಐರ್ಲೆಂಡ್ ವಿರುದ್ಧದ ಮೊದಲ ಟಿ20 ಪಂದ್ಯದಲ್ಲಿ ಅವರು ಪಾದಾರ್ಪಣೆ ಮಾಡುವ ಸಾಧ್ಯತೆಯಿದೆ. ಇತ್ತೀಚಿನ ಶ್ರೀಲಂಕಾ ಪ್ರವಾಸದಲ್ಲಿ ತಮ್ಮ ಸ್ಫೋಟಕ ಬ್ಯಾಟಿಂಗ್ ಮೂಲಕ ವಿಮರ್ಶಕರ ಬಾಯಿ ಮುಚ್ಚಿಸಿದ ವೈಭವ್, ಬಿಸಿಸಿಐನಿಂದ ತಮ್ಮ ಟೀಮ್ ಇಂಡಿಯಾ ಜೆರ್ಸಿಯನ್ನು ಪಡೆದಿದ್ದಾರೆ. ಜೆರ್ಸಿ ಸಂಖ್ಯೆ 3 ಅನ್ನ ಧರಿಸಿ ಮೈದಾನಕ್ಕೆ ಇಳಿಯಲು ಸಜ್ಜಾಗಿದ್ದಾರೆ.

ಕ್ಲೈವ್ ಲಾಯ್ಡ್ ಸಂದರ್ಶನವೊಂದರಲ್ಲಿ ಮಾತನಾಡುತ್ತಾ, ವೈಭವ್ ಸೂರ್ಯವಂಶಿ ಅವರ ಬ್ಯಾಟಿಂಗ್ ಅನ್ನು ಹೊಗಳಿದ್ದು, ಕೆಲವು ಮಹತ್ವದ ಸಲಹೆಗಳನ್ನು ನೀಡಿದ್ದಾರೆ. 1975 ಮತ್ತು 1979 ರಲ್ಲಿ ವಿಶ್ವಕಪ್ ವಿಜೇತ ಲಾಯ್ಡ್, ವೈಭವ್ ಕೇವಲ ಚೆಂಡನ್ನು ಬಲವಾಗಿ ಹೊಡೆಯುವುದಲ್ಲದೆ, ಅತ್ಯುತ್ತಮ ಟೈಮಿಂಗ್​​ನಲ್ಲಿ ಕ್ಲಾಸಿಕ್ ಹೊಡೆತಗಳನ್ನು ಸಹ ಆಡುತ್ತಾರೆ ಎಂದು ಗಮನಿಸಿದ್ದಾರೆ.

ಮೈಕೆಲ್ ಹೋಲ್ಡಿಂಗ್, ಜೋಯಲ್ ಗಾರ್ನರ್, ಆಂಡಿ ರಾಬರ್ಟ್ಸ್ ಮತ್ತು ಕಾಲಿನ್ ಕ್ರಾಫ್ಟ್‌ರಂತಹ ಬೌಲರ್‌ಗಳನ್ನು ಒಳಗೊಂಡ ಅವರ ಯುಗದ ಭಯಾನಕ ವೆಸ್ಟ್ ಇಂಡೀಸ್ ವೇಗದ ದಾಳಿಯ ವಿರುದ್ಧ ವೈಭವ್ ಹೇಗೆ ಆಡುತ್ತಿದ್ದರು ಎಂದು ಕೇಳಿದಾಗ, ಇದು ಯುವ ಆಟಗಾರನಿಗೆ ಕಠಿಣ ಪರೀಕ್ಷೆಯಾಗುತ್ತಿತ್ತು ಎಂದು ಲಾಯ್ಡ್ ಅಭಿಪ್ರಾಯಪಟ್ಟರು. “ಇದು ಖಂಡಿತವಾಗಿಯೂ ವೈಭವ್ ಸೂರ್ಯವಂಶಿಗೆ ಒಂದು ದೊಡ್ಡ ಪರೀಕ್ಷೆಯಾಗುತ್ತಿತ್ತು. ಅದು ಅವರ ಮಾನಸಿಕ ಶಕ್ತಿ ಮತ್ತು ಸಾಮರ್ಥ್ಯವನ್ನು ಪ್ರಶ್ನಿಸುತ್ತಿತ್ತು. ವೈಭವ್ ಅತ್ಯುತ್ತಮ ದೃಷ್ಟಿ ಮತ್ತು ಚೆಂಡನ್ನು ಹೊಡೆಯುವ ಅದ್ಭುತ ಸಾಮರ್ಥ್ಯವನ್ನು ಹೊಂದಿದ್ದಾರೆ. ನಮ್ಮ ಬೌಲರ್‌ಗಳ ವಿರುದ್ಧದ ಸ್ಪರ್ಧೆಯು ಆಕರ್ಷಕ ಪಂದ್ಯವಾಗುತ್ತಿತ್ತು” ಎಂದು ಲಾಯ್ಡ್ ಅಭಿಪ್ರಾಯಪಟ್ಟಿದ್ದಾರೆ.

ವೈಭವ್ ಸೂರ್ಯವಂಶಿ ಶ್ರೀಲಂಕಾದ ಆಟಗಾರರೊಂದಿಗೆ ವಾಗ್ವಾದಕ್ಕೆ ಇಳಿದ ನಡೆಯನ್ನ ಲಾಯ್ಡ್ ಟೀಕಿಸಿದ್ದಾರೆ. ಎದುರಾಳಿಗಳೊಂದಿಗೆ ಘರ್ಷಣೆ ಮಾಡುವ ಬದಲು, ಆಟಗಾರ ಅಂಪೈರ್‌ಗಳಿಗೆ ದೂರು ನೀಡಬೇಕಿತ್ತು ಎಂದು ಅವರು ಭಾವಿಸಿದರು. “ಸ್ಲೆಡ್ಜಿಂಗ್ ಮತ್ತು ಮಾತಿನ ಚಕಮಕಿ ಆಟದ ಭಾಗವಾಗಿದ್ದರೂ, ಕ್ರೀಡೆಯ ಸಮಗ್ರತೆ ಅತ್ಯುನ್ನತವಾಗಿದೆ. ಎದುರಾಳಿಗಳಿಂದ ಪ್ರಚೋದಿಸಲ್ಪಟ್ಟರೆ, ಆಟಗಾರರು ಹಠಾತ್ತನೆ ಪ್ರತಿಕ್ರಿಯಿಸುವ ಬದಲು ಅಂಪೈರ್‌ಗಳಿಗೆ ವಿಷಯವನ್ನು ವರದಿ ಮಾಡಬೇಕು. ಪಂದ್ಯದ ರೆಫರಿಗಳು ಸಹ ದೃಢವಾದ ನಿಲುವನ್ನು ತೆಗೆದುಕೊಂಡು ದಂಡ ವಿಧಿಸಬೇಕು. ವೈಭವ್ ಸೂರ್ಯವಂಶಿ ಕೂಡ ಎದುರಾಳಿ ಆಟಗಾರನೊಂದಿಗೆ ವಾಗ್ವಾದಕ್ಕೆ ಇಳಿಯುವ ಬದಲು ಅಂಪೈರ್‌ಗಳಿಗೆ ಸಮಸ್ಯೆಯನ್ನು ವರದಿ ಮಾಡಬೇಕಾಗಿತ್ತು” ಎಂದು ಲಾಯ್ಡ್ ಅಭಿಪ್ರಾಯಪಟ್ಟರು.