ಚೆನ್ನೈ ಸೂಪರ್ ಕಿಂಗ್ಸ್‌ನ ಉನ್ನತ ಮಟ್ಟದ ನಾಯಕತ್ವ ತಂಡ ಪ್ರಸ್ತುತ ಅಮೆರಿಕದ ಡಲ್ಲಾಸ್‌ನಲ್ಲಿದೆ. ಸಿಎಸ್​ಕೆ ಹಾಗೂ ಅದರ ಸಹೋದರ ಫ್ರಾಂಚೈಸಿಗಳು ಕಳೆದ ಕೆಲವು ಋತುಗಳ ಪ್ರದರ್ಶನ ಕೆಟ್ಟದಾಗಿದೆ. ಇದರಿಂದ ಫ್ರಾಂಚೈಸಿಯಲ್ಲಿ ಸಂಪೂರ್ಣ ವಿಮರ್ಶೆ ನಡೆಯುತ್ತಿದೆ ಮತ್ತು ಭವಿಷ್ಯದಲ್ಲಿ ಹೊಸ ತಂಡ ರೂಪಿಸಲು ಕಠಿಣ ಕ್ರಮಗಳನ್ನು ತೆಗೆದುಕೊಳ್ಳಲಾಗುತ್ತಿದೆ. ಕೋಚಿಂಗ್ ಸಿಬ್ಬಂದಿ ಮಾತ್ರವಲ್ಲದೆ ಆಟಗಾರರ ಬಗ್ಗೆಯೂ ಫ್ರಾಂಚೈಸಿಯೊಳಗೆ ಗಂಭೀರ ಚರ್ಚೆಗಳು ನಡೆಯುತ್ತಿವೆ. ಮುಂದಿನ ದಿನಗಳಲ್ಲಿ ಇಡೀ ಕೋಚಿಂಗ್ ಘಟಕದ ಬಗ್ಗೆ ಪ್ರಮುಖ ನಿರ್ಧಾರವನ್ನು ತೆಗೆದುಕೊಳ್ಳಬಹುದು. ಎನ್. ಶ್ರೀನಿವಾಸನ್ ಅವರ ಪುತ್ರಿ ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ ಕ್ರಿಕೆಟ್ ಲಿಮಿಟೆಡ್‌ನ ಪೂರ್ಣ ಸಮಯದ ನಿರ್ದೇಶಕಿ ರೂಪಾ ಗುರುನಾಥ್ ಪ್ರಸ್ತುತ ಎಲ್ಲಾ ಪ್ರಮುಖ ತಂಡದ ನಿರ್ಧಾರಗಳನ್ನು ನೋಡಿಕೊಳ್ಳುತ್ತಿದ್ದಾರೆ.

ಸ್ಟೀಫನ್ ಫ್ಲೆಮಿಂಗ್ ಅವರ ಕೊಡುಗೆಯನ್ನು ಶ್ಲಾಘಿಸುತ್ತಾ, ಬಿಡುಗಡೆ ಮಾಡಿರುವ ಅಧಿಕೃತ ಪತ್ರಿಕಾ ಪ್ರಕಟಣೆಯಲ್ಲಿ ರೂಪಾ ಗುರುನಾಥ್, “ಸ್ಟೀಫನ್ ಫ್ಲೆಮಿಂಗ್ ಈ ಫ್ರಾಂಚೈಸಿಯ ಬಹುತೇಕ ಸಂಪೂರ್ಣ ಪ್ರಯಾಣದಲ್ಲಿ ನಮ್ಮ ತರಬೇತಿ ಘಟಕದ ಹೃದಯ ಬಡಿತವಾಗಿದ್ದಾರೆ. ಸುಮಾರು ಎರಡು ದಶಕಗಳಿಂದ, ಅವರು ನಮ್ಮ ಗುರುತು, ದೃಷ್ಟಿಕೋನ ಮತ್ತು ಶ್ರೇಷ್ಠತೆಯನ್ನು ರೂಪಿಸಲು ಸಹಾಯ ಮಾಡಿದ್ದಾರೆ. ಸೂಪರ್ ಕಿಂಗ್ಸ್ ಫ್ರಾಂಚೈಸಿಯ ಪ್ರತಿಯೊಬ್ಬ ಸದಸ್ಯರ ಪರವಾಗಿ, ಅವರ ಅಚಲ ಬದ್ಧತೆ, ಉತ್ಸಾಹ ಮತ್ತು ನಾಯಕತ್ವಕ್ಕಾಗಿ ನಾವು ನಮ್ಮ ಆಳವಾದ ಕೃತಜ್ಞತೆಯನ್ನು ವ್ಯಕ್ತಪಡಿಸುತ್ತೇವೆ. ಮೈದಾನದಲ್ಲಿ ನಮ್ಮ ಪ್ರಯಾಣ ಇಲ್ಲಿಗೆ ಕೊನೆಗೊಳ್ಳುತ್ತಿದ್ದರೂ, ಅವರು ಯಾವಾಗಲೂ ತಂಡದ ಪರಂಪರೆಯ ಅವಿಭಾಜ್ಯ ಅಂಗವಾಗಿರುತ್ತಾರೆ” ಎಂದು ಹೇಳಿದ್ದಾರೆ.

ಸ್ಟೀಫನ್ ಫ್ಲೆಮಿಂಗ್ ಮತ್ತು ಸಿಎಸ್‌ಕೆ ನಡುವಿನ ಸಂಬಂಧವು 2008 ರಲ್ಲಿ ನಡೆದ ಉದ್ಘಾಟನಾ ಐಪಿಎಲ್ ಋತುವಿನಿಂದಲೇ ಪ್ರಾರಂಭವಾಗಿದೆ. ಕಿವೀಸ್ ಲೆಜೆಂಡ್ ಮೊದಲು ಆಟಗಾರನಾಗಿ ತಂಡವನ್ನು ಸೇರಿದರು. ನಂತರ ಅವರು 2009 ರಲ್ಲಿ ಮುಖ್ಯ ಕೋಚ್ ಪಾತ್ರವನ್ನು ವಹಿಸಿಕೊಂಡರು. ಫ್ಲೆಮಿಂಗ್ ತರಬೇತುದಾರರಾಗಿದ್ದಾಗ, ಸಿಎಸ್‌ಕೆ ಒಟ್ಟು 11 ಫೈನಲ್‌ಗಳಲ್ಲಿ ಆಡಿದೆ. ಇದರಲ್ಲಿ 10 ಐಪಿಎಲ್ ಫೈನಲ್‌ಗಳು ಮತ್ತು ಒಂದು ಚಾಂಪಿಯನ್ಸ್ ಲೀಗ್ ಫೈನಲ್ ಸೇರಿವೆ. ಈ ಅವಧಿಯಲ್ಲಿ, ತಂಡವು ಒಟ್ಟು 6 ಪ್ರಶಸ್ತಿಗಳನ್ನು ಗೆದ್ದಿದೆ. 2016 ಮತ್ತು 2017 ರಲ್ಲಿ ಸಿಎಸ್‌ಕೆ ಎರಡು ವರ್ಷಗಳ ಕಾಲ ನಿಷೇಧಿಸಲ್ಪಟ್ಟಾಗ, ಫ್ಲೆಮಿಂಗ್ ರೈಸಿಂಗ್ ಪುಣೆ ಸೂಪರ್‌ಜೈಂಟ್ (ಆರ್‌ಪಿಎಸ್) ಗೆ ತರಬೇತಿ ನೀಡಿದ್ದರು ಮತ್ತು 2017 ರಲ್ಲಿ ತಂಡವನ್ನು ಫೈನಲ್‌ಗೆ ಕರೆದೊಯ್ದಿದ್ದರು.

ಫ್ಲೆಮಿಂಗ್ ಇಷ್ಟೊಂದು ಪ್ರಭಾವಶಾಲಿ ದಾಖಲೆಯ ಹೊರತಾಗಿಯೂ, ಕಳೆದ ಕೆಲವು ವರ್ಷಗಳಿಂದ ಚೆನ್ನೈ ಸೂಪರ್ ಕಿಂಗ್ಸ್‌ ಪ್ರದರ್ಶನ ಅತ್ಯಂತ ನಿರಾಶಾದಾಯಕವಾಗಿವೆ. ಇದು ಫ್ರಾಂಚೈಸಿ ಈ ಕಠಿಣ ಹೆಜ್ಜೆ ಇಡುವಂತೆ ಮಾಡಿದೆ. ತಂಡವು 2024ರಲ್ಲಿ ಪ್ಲೇಆಫ್‌ಗೆ ಅರ್ಹತೆ ಪಡೆಯಲಿಲ್ಲ. ಇದರ ನಂತರ, ಮುಂದಿನ ಎರಡು ಋತುಗಳಲ್ಲಿ ಸಿಎಸ್‌ಕೆಯ ಪ್ರದರ್ಶನ ಮತ್ತಷ್ಟು ಕುಸಿಯಿತು, ಕ್ರಮವಾಗಿ 10 ಮತ್ತು 8 ನೇ ಸ್ಥಾನ ಗಳಿಸಿತು. ಫ್ಲೆಮಿಂಗ್ ಐಪಿಎಲ್ ಮಾತ್ರವಲ್ಲದೆ ಸಿಎಸ್‌ಕೆಯ ಇತರ ಜಾಗತಿಕ ಫ್ರಾಂಚೈಸಿಗಳ ಉಸ್ತುವಾರಿ ವಹಿಸಿದ್ದರು, ಅಲ್ಲಿ ಫಲಿತಾಂಶಗಳು ನಿರೀಕ್ಷೆಯಂತೆ ಬಂದಿಲ್ಲ.

ಭಾರತದ ಮಾಜಿ ಕ್ರಿಕೆಟಿಗ ಹೇಮಾಂಗ್ ಬದಾನಿ ಕಳೆದ ಎರಡು ಋತುಗಳಲ್ಲಿ (2025 ಮತ್ತು 2026) ಡೆಲ್ಲಿ ಕ್ಯಾಪಿಟಲ್ಸ್ (ಡಿಸಿ) ತಂಡದ ಮುಖ್ಯ ತರಬೇತುದಾರರಾಗಿ ಸೇವೆ ಸಲ್ಲಿಸಿದ್ದಾರೆ. ಬದಾನಿ ಅವರ ಮಾರ್ಗದರ್ಶನದಲ್ಲಿ, ಡೆಲ್ಲಿ 2025 ರಲ್ಲಿ ಐದನೇ ಸ್ಥಾನ ಮತ್ತು 2026 ರಲ್ಲಿ ಆರನೇ ಸ್ಥಾನ ಗಳಿಸಿತ್ತು. ತನ್ನ ಮೊದಲ ಸೀಸನ್ (2025) ನಲ್ಲಿ, ಡೆಲ್ಲಿ ಸ್ವಲ್ಪದರಲ್ಲೇ ಪ್ಲೇಆಫ್ ಸ್ಥಾನವನ್ನು ಕಳೆದುಕೊಂಡಿತು. ಬದಾನಿ CSK ತವರು ವಾತಾವರಣದಲ್ಲಿ ತಂಡವನ್ನು ಮತ್ತೆ ಹಳಿಗೆ ತರಬಹುದೇ ಎಂದು ಕಾದು ನೋಡಬೇಕಾಗಿದೆ.