Last Updated:
FIFA World Cup 2026: ಜಾಗತಿಕ ಕ್ರೀಡಾ ಲೋಕವೇ ಕಾತರದಿಂದ ಕಾಯುತ್ತಿರುವ ಬಹುನಿರೀಕ್ಷಿತ ಫಿಫಾ ವಿಶ್ವಕಪ್ ಫೈನಲ್ ಪಂದ್ಯಕ್ಕೆ ಕ್ಷಣಗಣನೆ ಆರಂಭವಾಗಿದೆ. ಬಲಿಷ್ಠ ಅರ್ಜೆಂಟೀನಾ ಮತ್ತು ಸ್ಪೇನ್ ತಂಡಗಳ ನಡುವೆ ನ್ಯೂಜೆರ್ಸಿಯಲ್ಲಿ ನಡೆಯಲಿರುವ ಈ ಮಹಾಕಳಗದ ರೋಚಕ ವಿವರ ಇಲ್ಲಿದೆ ನೋಡಿ!
ಪ್ರಪಂಚದಾದ್ಯಂತದ ಕೋಟ್ಯಂತರ ಫುಟ್ಬಾಲ್ ಅಭಿಮಾನಿಗಳು ಕಾತರದಿಂದ ಕಾಯುತ್ತಿರುವ ಬಹುನಿರೀಕ್ಷಿತ ಫಿಫಾ ವಿಶ್ವಕಪ್ 2026 ರ ಮಹಾ ಫೈನಲ್ (Final Match) ಪಂದ್ಯಕ್ಕೆ ವೇದಿಕೆ ಸಜ್ಜಾಗಿದೆ. ಭಾರತೀಯ ಕಾಲಮಾನದ ಪ್ರಕಾರ ಭಾನುವಾರ ಮಧ್ಯರಾತ್ರಿ 12.30 ಕ್ಕೆ ನ್ಯೂಜೆರ್ಸಿಯ ಪ್ರಸಿದ್ಧ ಮೆಟ್ಲೈಫ್ ಕ್ರೀಡಾಂಗಣದಲ್ಲಿ ಈ ಬೃಹತ್ ಫೈನಲ್ ಪಂದ್ಯವು ಅದ್ಧೂರಿಯಾಗಿ ಜರುಗಲಿದೆ. ಹಾಲಿ ವಿಶ್ವ ಚಾಂಪಿಯನ್ ಅರ್ಜೆಂಟೀನಾ ಮತ್ತು ಯುರೋಪಿಯನ್ ಚಾಂಪಿಯನ್ (European Champion) ಸ್ಪೇನ್ ಈ ಮಹಾ ಯುದ್ಧದಲ್ಲಿ ಪರಸ್ಪರ ಮುಖಾಮುಖಿಯಾಗುತ್ತಿವೆ. ಈ ಬಾರಿ ವಿಶ್ವಕಪ್ನಲ್ಲಿ ಅತಿ ಹೆಚ್ಚು ಗೋಲುಗಳನ್ನು ಗಳಿಸಿರುವ ಅರ್ಜೆಂಟೀನಾದ ದಾಳಿ ಹಾಗೂ ಅತ್ಯಂತ ಕಡಿಮೆ ಗೋಲುಗಳನ್ನು ಬಿಟ್ಟುಕೊಟ್ಟಿರುವ ಸ್ಪ್ಯಾನಿಷ್ ರಕ್ಷಣಾ ಪಡೆಯ ನಡುವೆ ಈ ರೋಚಕ ಹೋರಾಟ ನಡೆಯಲಿದೆ.
ಇಡೀ ಜಗತ್ತಿನ ಕಣ್ಣು ಈಗ 39 ವರ್ಷದ ಅರ್ಜೆಂಟೀನಾದ ನಾಯಕ ಲಿಯೋನೆಲ್ ಮೆಸ್ಸಿ (Lionel Messi) ಮತ್ತು 19 ವರ್ಷದ ಸ್ಪ್ಯಾನಿಷ್ ಯುವ ಸಂವೇದನೆ ಲ್ಯಾಮಿನ್ ಯಮಲ್ ನಡುವಿನ ಜಿದ್ದಾಜಿದ್ದಿನ ಸ್ಪರ್ಧೆಯ ಮೇಲೆ ನೆಟ್ಟಿದೆ.
ಲಿಯೋನೆಲ್ ಮೆಸ್ಸಿ ತಮ್ಮ ಸುದೀರ್ಘ ವೃತ್ತಿಜೀವನದ ಕೊನೆಯ ವಿಶ್ವಕಪ್ (World Cup) ಪಂದ್ಯವನ್ನು ಆಡುತ್ತಿದ್ದು, ಸತತ ಎರಡನೇ ಬಾರಿಗೆ ವಿಶ್ವಕಪ್ ಗೆಲ್ಲುವ ಮೂಲಕ ಇತಿಹಾಸ ಸೃಷ್ಟಿಸಲು ಅರ್ಜೆಂಟೀನಾ ದೃಢನಿಶ್ಚಯ ಮಾಡಿದೆ. ಮತ್ತೊಂದೆಡೆ, ಭರ್ಜರಿ ಫಾರ್ಮ್ನಲ್ಲಿರುವ ಸ್ಪೇನ್ ತಂಡವು 2010 ರ ನಂತರ ಮತ್ತೆ ವಿಶ್ವಕಪ್ ಮುಕುಟವನ್ನು ಮುಡಿಗೇರಿಸಿಕೊಳ್ಳುವ ಮಹತ್ವಾಕಾಂಕ್ಷೆಯೊಂದಿಗೆ ಮೈದಾನಕ್ಕಿಳಿಯುತ್ತಿದೆ.
ಫಿಫಾ ವಿಶ್ವಕಪ್ ಇತಿಹಾಸದಲ್ಲಿ ಉಭಯ ತಂಡಗಳು ಒಮ್ಮೆ ಮಾತ್ರ ಮುಖಾಮುಖಿಯಾಗಿದ್ದು, 1966 ರ ವಿಶ್ವಕಪ್ನಲ್ಲಿ ಅರ್ಜೆಂಟೀನಾ 2-1 ಅಂತರದಲ್ಲಿ ಸ್ಪೇನ್ ವಿರುದ್ಧ ಗೆದ್ದಿತ್ತು. ಆದರೆ ಅಂತರರಾಷ್ಟ್ರೀಯ ಪಂದ್ಯಗಳ (International Matches) ಒಟ್ಟು ಇತಿಹಾಸ ನೋಡಿದರೆ, ಇವೆರಡೂ ತಂಡಗಳು 14 ಬಾರಿ ಪೈಪೋಟಿ ನಡೆಸಿದ್ದು, ತಲಾ 6 ಪಂದ್ಯಗಳನ್ನು ಗೆದ್ದುಕೊಂಡು ಸಮಬಲ ಸಾಧಿಸಿವೆ. ಉಳಿದ 2 ಪಂದ್ಯಗಳು ಡ್ರಾದಲ್ಲಿ ಕೊನೆಗೊಂಡಿವೆ.
ಆಧುನಿಕ ದತ್ತಾಂಶ ವಿಶ್ಲೇಷಣೆಯ ಪ್ರಕಾರ ಈ ಪಂದ್ಯದಲ್ಲಿ ಸ್ಪೇನ್ ಪರ ಒಲವು ಹೆಚ್ಚಿರುವುದು ಕಂಡುಬರುತ್ತಿದೆ. ಪ್ರಸಿದ್ಧ ಕ್ರೀಡಾ ವಿಶ್ಲೇಷಣಾ ಸಂಸ್ಥೆ ‘ಆಪ್ಟಾ’ದ ಸೂಪರ್ಕಂಪ್ಯೂಟರ್ (Supercomputer) ಅಂದಾಜಿನ ಪ್ರಕಾರ, ಸ್ಪೇನ್ ಗೆಲ್ಲುವ ಸಾಧ್ಯತೆ ಶೇ. 59.46 ರಷ್ಟಿದ್ದರೆ, ಅರ್ಜೆಂಟೀನಾ ಪ್ರಶಸ್ತಿಯನ್ನು ಉಳಿಸಿಕೊಳ್ಳುವ ಸಾಧ್ಯತೆ ಶೇ. 40.54 ರಷ್ಟಿದೆ. ಆದರೆ ಮೈದಾನದಲ್ಲಿ ಮೆಸ್ಸಿಯ ಮ್ಯಾಜಿಕ್ ಯಾವುದೇ ಕ್ಷಣದಲ್ಲೂ ಪಂದ್ಯವನ್ನು ತಿರುಗಿಸಬಲ್ಲದು.
1962 ರಲ್ಲಿ ಬ್ರೆಜಿಲ್ ತಂಡದ ನಂತರ ಸತತ ಎರಡು ಬಾರಿ ವಿಶ್ವಕಪ್ ಗೆದ್ದ ಮೊದಲ ತಂಡವಾಗುವ ಸುವರ್ಣಾವಕಾಶ ಅರ್ಜೆಂಟೀನಾಗೆ ಇದೆ. ಇದರೊಂದಿಗೆ ಬರೋಬ್ಬರಿ 60 ವರ್ಷಗಳ ಸುದೀರ್ಘ ಅವಧಿಯ ನಂತರ ಯುರೋಪಿಯನ್ ಚಾಂಪಿಯನ್ ಮತ್ತು ದಕ್ಷಿಣ ಅಮೆರಿಕಾದ ಚಾಂಪಿಯನ್ (South American Champion) ತಂಡಗಳು ವಿಶ್ವಕಪ್ನ ಮಹಾ ಫೈನಲ್ ಪಂದ್ಯದಲ್ಲಿ ಪರಸ್ಪರ ಮುಖಾಮುಖಿಯಾಗುತ್ತಿರುವುದು ವಿಶಿಷ್ಟ ಇತಿಹಾಸವಾಗಿದೆ.
Jul 19, 2026 11:18 AM IST
