ವಿದ್ಯಾರ್ಥಿನಿ ಸುಪರ್ಣಾ ರಾಯ್ ಅವರ ಬ್ಯಾಂಕ್​ ಖಾತೆಯಲ್ಲಿ ₹900 ತೆಗೆದುಕೊಳ್ಳಲು ಹೋದಾಗ ಬ್ಯಾಂಕ್​ ಬ್ಯಾಲೆನ್ಸ್​​ ಬರೋಬ್ಬರಿ 759 ಕೋಟಿ ರೂಪಾಯಿ ಕಂಡಿದೆ. ಇದನ್ನು ಕಂಡು ವಿದ್ಯಾರ್ಥಿ ಮತ್ತು ಅವರ ಕುಟುಂಬ ಆಘಾತಗೊಂಡಿದೆ.

ಹೌದು, ವಿದ್ಯಾರ್ಥಿ ಬ್ಯಾಂಕ್​ ಖಾತೆ ಪರಿಶೀಲಿಸಿದಾಗ ₹759,69,51,951 ಎಂದು ತೋರಿಸಿದೆ. ಅಂದರೆ ಸುಮಾರು 759 ಕೋಟಿ ರೂಪಾಯಿಗಳು. ಈ ಸುದ್ದಿ ಕ್ಷಣದಲ್ಲಿ ಗ್ರಾಮದಾದ್ಯಂತ ಹರಡಿದೆ ಮತ್ತು ಜನರು ದಿಗ್ಭ್ರಮೆಗೊಂಡಿದ್ದಾರೆ. ಅಷ್ಟೇ ಅಲ್ಲದೇ ಈ ಸುಪರ್ಣಾ ರಾಯ್ ಮತ್ತು ಅವರ ಕುಟುಂಬಕ್ಕೂ ಕೂಡ ಈ ಹಣದ ಬಗ್ಗೆ ಯಾವುದೇ ಮಾಹಿತಿ ಇಲ್ಲ. ಬ್ಯಾಂಕ್​ ಬ್ಯಾಲೆನ್ಸ್​ ನೋಡಿ ಖುದ್ದು ಅವರೇ ಶಾಕ್​ ಆಗಿದ್ದಾರೆ.

ಇನ್ನೂ ಸುಪರ್ಣಾ ಅವರ ಕುಟುಂಬ ತುಂಬಾ ಬಡತನದಲ್ಲಿದೆ. ತಂದೆ ಕೇರಳದಲ್ಲಿ ಕೂಲಿ ಕೆಲಸ ಮಾಡುತ್ತಿದ್ದಾರೆ. ಮನೆಯಲ್ಲಿ ಆರ್ಥಿಕ ಸಂಕಷ್ಟ ತುಂಬಾ ಇದೆ. ಸುಪರ್ಣಾ ಅವರ ಹಳೆಯ ಶಾಲಾ ಶೂಗಳು ಕೂಡ ಸವೆದುಹೋಗಿದ್ದವು. ಆದ್ದರಿಂದ ವಿದ್ಯಾರ್ಥಿವೇತನದ ಹಣ ಬಂದಾಗ ಹೊಸ ಶೂಗಳನ್ನು ಖರೀದಿಸಬೇಕು ಎಂದು ಕುಟುಂಬ ಸದಸ್ಯರು ಯೋಚಿಸಿದ್ದರು. ಇದನ್ನು ತೆಗೆಯಲು ಹೋದಾಗ ಈ ಘಟನೆ ಬೆಳಕಿಗೆ ಬಂದಿದೆ.

ಶನಿವಾರ ಸುಪರ್ಣಾ ತನ್ನ ಅಣ್ಣನೊಂದಿಗೆ ಸ್ಥಳೀಯ ಗ್ರಾಹಕ ಸೇವಾ ಕೇಂದ್ರಕ್ಕೆ ಹೋಗಿದ್ದಾಳೆ. ಖಾತೆಯಿಂದ ₹900 ಹಿಂತೆಗೆಯಲು ಕೇಳಿದ್ದಾಳೆ. ಆಪರೇಟರ್ ಬ್ಯಾಲೆನ್ಸ್ ಪರಿಶೀಲಿಸಿದಾಗ ಶಾಕ್​ ಆಗಿದ್ದಾರೆ. ಸ್ಕ್ರೀನ್​ ಮೇಲೆ 759 ಕೋಟಿ ರೂಪಾಯಿಗಳು ಕಾಣಿಸಿದೆ. ಮೊದಲು ಎಲ್ಲರೂ ತಪ್ಪು ತೋರಿಸುತ್ತಿದೆ ಎಂದು ಭಾವಿಸಿದ್ದಾರೆ. ಆದರೆ ಮತ್ತೆ ಮತ್ತೆ ಪರಿಶೀಲಿಸಿದರೂ ಅದೇ ಮೊತ್ತವೇ ಕಾಣಿಸುತ್ತಿತ್ತು. ತಕ್ಷಣ ಈ ಸುದ್ದಿ ಭಾರೀ ವೈರಲ್​ ಆಗಿದೆ.

ಬ್ಯಾಂಕ್ ಅಧಿಕಾರಿಗಳು ಮತ್ತು ಪೊಲೀಸರು ಈ ಘಟನೆಯ ತನಿಖೆ ಆರಂಭಿಸಿದ್ದಾರೆ. ಇದು ಬ್ಯಾಂಕಿಂಗ್ ವ್ಯವಸ್ಥೆಯಲ್ಲಿ ತಾಂತ್ರಿಕ ದೋಷವಾಗಿರಬಹುದು ಎಂದು ಅಂದಾಜಿಸಲಾಗಿದೆ. ಸಾಫ್ಟ್‌ವೇರ್ ತೊಂದರೆ, ಡೇಟಾ ಸಿಂಕ್ ಸಮಸ್ಯೆ ಅಥವಾ ಯಾವುದೋ ತಪ್ಪು ನಡೆದಿರಬಹುದು ಎಂದು ನಂಬಲಾಗಿದೆ. ತನಿಖೆ ಪೂರ್ಣಗೊಂಡ ನಂತರ ನಿಜವಾದ ಕಾರಣ ತಿಳಿಯಲಿದೆ.