ಇದೀಗ ಈಗ ಪ್ರಧಾನಿ ಮೋದಿಯವರ ವಿಡಿಯೋ ಮತ್ತೆ ಕಾಣಿಸಿಕೊಂಡಿದೆ. ಆದರೆ ಆ ವಿಡಿಯೋವನ್ನು ಫೇಸ್‌ಬುಕ್‌ನಿಂದ ತಾತ್ಕಾಲಿಕವಾಗಿ ತೆಗೆದುಹಾಕಿದ್ದಕ್ಕಾಗಿ Meta ಕಂಪನಿ ಕ್ಷಮೆಯಾಚಿಸಿದೆ. ಈ ತಪ್ಪಿನ ಹಿಂದಿನ ಕಾರಣವನ್ನು Meta ವಿವರಿಸಿದೆ. ಹಾಗಾದರೆ, PM ಮೋದಿಯವರ ವೀಡಿಯೊದ ಹಿಂದಿನ ಅಸಲಿತ್ತೇನು? Facebook ಡಿಲೀಟ್ ಮಾಡಿದ್ದೇಕೆ? ಈ ಕುರಿತ ವಿವರ ಇಲ್ಲಿದೆ.

ಅಂದಹಾಗೆ, ಪ್ರಧಾನಿ ನರೇಂದ್ರ ಮೋದಿ ಅವರ ವಿಡಿಯೋವನ್ನು ಫೇಸ್‌ಬುಕ್‌ನಿಂದ ತಾತ್ಕಾಲಿಕವಾಗಿ ತೆಗೆದುಹಾಕಿರುವುದು ವ್ಯಾಪಕ ವಿವಾದಕ್ಕೆ ಕಾರಣವಾಗಿದೆ. ಆದರೆ, ಮೆಟಾ ಈ ಘಟನೆಗೆ ಕ್ಷಮೆಯಾಚಿಸಿದೆ ಮತ್ತು ಕಂಪನಿಯ ವಕ್ತಾರರು ವೀಡಿಯೊವನ್ನು ತೆಗೆದುಹಾಕಲು ತಾಂತ್ರಿಕ ದೋಷ ಕಾರಣ, ಇದು ಬೇಕಂತಲೇ ಅಥವಾ ಉದ್ದೇಶಪೂರ್ವಕ ಕೃತ್ಯವಲ್ಲ ಎಂದು ಹೇಳಿದ್ದಾರೆ.

ಮೂಲಗಳ ಪ್ರಕಾರ, ಕೇಂದ್ರ ಸರ್ಕಾರ ಈ ವಿಷಯವನ್ನು ಬಹಳ ಗಂಭೀರವಾಗಿ ಪರಿಗಣಿಸಿದೆ ಮತ್ತು ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯವು ಮೆಟಾ ಮತ್ತು ಇನ್‌ಸ್ಟಾಗ್ರಾಮ್‌ನ ಜಾಗತಿಕ ಮುಖ್ಯಸ್ಥರಿಗೆ ಸಮನ್ಸ್ ಜಾರಿ ಮಾಡಿದೆ.

ಜುಲೈ 28 ರ ಮುಂಜಾನೆ ಮೆಟಾ ಒಡೆತನದ ಫೇಸ್‌ಬುಕ್‌ನಲ್ಲಿರುವ ಭಾರತೀಯ ಬಳಕೆದಾರರು ತಾತ್ಕಾಲಿಕವಾಗಿ ಪ್ರಧಾನಿ ನರೇಂದ್ರ ಮೋದಿಯವರ ವೀಡಿಯೊವನ್ನು ವೀಕ್ಷಿಸಲು ಸಾಧ್ಯವಾಗದಿದ್ದಾಗ ಈ ಸಮಸ್ಯೆ ಬೆಳಕಿಗೆ ಬಂದಿತು. ಬಳಕೆದಾರರು ವೀಡಿಯೊವನ್ನು ತೆರೆಯಲು ಪ್ರಯತ್ನಿಸಿದಾಗ, ಕಾನೂನು ಕಾರಣದಿಂದ ಭಾರತದಲ್ಲಿ ಈ ವೀಡಿಯೊಗೆ ಪ್ರವೇಶವನ್ನು ನಿರ್ಬಂಧಿಸಲಾಗಿದೆ ಎಂದು ಹೇಳುವ ಸ್ವಯಂಚಾಲಿತ ಸಂದೇಶ ಕಾಣಿಸಿಕೊಂಡಿದೆ. ಇದು ಸಾಮಾಜಿಕ ಮಾಧ್ಯಮದಲ್ಲಿ ವ್ಯಾಪಕ ಚರ್ಚೆಗೆ ಕಾರಣವಾಯಿತು, ಜೊತೆಗೆ ಫೇಸ್‌ಬುಕ್ ಟೀಕೆಗೆ ಗುರಿಯಾಯಿತು.

ಈ ಇಡೀ ಘಟನೆಯ ಹಿನ್ನೆಲೆಯಲ್ಲಿ ಕೇಂದ್ರ ಸರ್ಕಾರವು ಈಗ ಮೆಟಾದ ಕಾರ್ಯಾಚರಣೆಗಳನ್ನು ಸೂಕ್ಷ್ಮವಾಗಿ ಗಮನಿಸುತ್ತಿದೆ ಮತ್ತು ಕಂಪನಿಯ ಅಧಿಕಾರಿಗಳಿಂದ ವಿವರವಾದ ವಿವರಣೆಯನ್ನು ಪಡೆಯಬಹುದು ಎಂದು ನಂಬಲಾಗಿದೆ.