ಸೌತ್ ಚೈನಾ ಮಾರ್ನಿಂಗ್ ಪೋಸ್ಟ್ (South China Morning Post) ವರದಿಯ ಪ್ರಕಾರ, ಕಿಮ್ ಜೊಂಗ್ ಉನ್ ನೇತೃತ್ವದ ಆಡಳಿತಾರೂಢ ವರ್ಕರ್ಸ್ ಪಾರ್ಟಿಯ ಅಧಿಕೃತ ಪತ್ರಿಕೆಯಾದ ‘ರೊಡಾಂಗ್ ಸಿನ್ಮುನ್’ (Rodong Sinmun) ಭಾನುವಾರ ಈ ಸಲಹೆಯನ್ನು ಪ್ರಕಟಿಸಿದೆ. ಉಷ್ಣಗಾಳಿಯನ್ನು ಎದುರಿಸುವ ಮಾರ್ಗದರ್ಶನದ ಭಾಗವಾಗಿ ಈ ಲೇಖನ ಪ್ರಕಟವಾಗಿದ್ದು, ಇದರಲ್ಲಿ ಬಿಸಿಲಿನ ಬೇಗೆಯಿಂದ ಬರುವ ಕಾಯಿಲೆಗಳಿಗೆ ಪ್ರಥಮ ಚಿಕಿತ್ಸಾ ಕ್ರಮಗಳನ್ನು ಸಹ ವಿವರಿಸಲಾಗಿದೆ. ಸ್ಥಳೀಯವಾಗಿ ‘ದಂಗೋಗಿ ಗುಕ್’ (ಸಿಹಿ ಮಾಂಸದ ಸೂಪ್) ಎಂದು ಕರೆಯಲಾಗುವ ಈ ಖಾದ್ಯವನ್ನು ಸೇವಿಸುವುದರಿಂದ ಬೇಸಿಗೆಯ ತಾಪವನ್ನು ತಡೆದುಕೊಳ್ಳಬಹುದು ಮತ್ತು ದೇಹಕ್ಕೆ ಹೆಚ್ಚಿನ ಶಕ್ತಿ ಸಿಗುತ್ತದೆ ಎಂದು ಅಲ್ಲಿನ ಮಾಧ್ಯಮಗಳು ಪ್ರಚಾರ ಮಾಡುತ್ತಿವೆ.

ಪ್ಯೊಂಗ್ಯಾಂಗ್ ಜನರಲ್ ಆಸ್ಪತ್ರೆಯ ಹಿರಿಯ ವೈದ್ಯರ ಹೇಳಿಕೆಗಳನ್ನು ಉಲ್ಲೇಖಿಸಿರುವ ಈ ವರದಿಯಲ್ಲಿ, ಉಷ್ಣಗಾಳಿಯನ್ನು ಎದುರಿಸಲು ವಿಶೇಷ ಆರೋಗ್ಯ ಮಾರ್ಗಸೂಚಿಯನ್ನು ಪ್ರಕಟಿಸಿದೆ. ತೀವ್ರವಾದ ಉಷ್ಣತೆಯು ಹೃದಯ ಸಂಬಂಧಿ ಕಾಯಿಲೆಗಳು ಮತ್ತು ಮಧುಮೇಹವನ್ನು ಉಲ್ಬಣಗೊಳಿಸಬಹುದು ಎಂದು ಎಚ್ಚರಿಸಿರುವ ಪತ್ರಿಕೆಯು, ದೇಹವನ್ನು ತಂಪಾಗಿಸಲು ಮೀನಿನ ಗಂಜಿ, ಕರಬೂಜ ಹಣ್ಣುಗಳೊಂದಿಗೆ ನಾಯಿ ಮಾಂಸದ ಸೂಪ್ ಅತ್ಯಂತ ಪೌಷ್ಟಿಕಯುಕ್ತ ಆಹಾರ ಎಂದು ಶಿಫಾರಸು ಮಾಡಿದೆ.

ಉತ್ತರ ಕೊರಿಯಾದ ಸರ್ವಾಧಿಕಾರಿ ಸರ್ಕಾರವು ನಾಯಿ ಮಾಂಸವನ್ನು ಕೇವಲ ಆರೋಗ್ಯ ಟಾನಿಕ್ ಮಾತ್ರವಲ್ಲದೆ, ದೇಶದ ಹೆಮ್ಮೆಯ ಸಾಂಪ್ರದಾಯಿಕ ಆಹಾರ ಎಂದು ಬಿಂಬಿಸುತ್ತಿದೆ. ಇದಕ್ಕಾಗಿಯೇ ರಾಜಧಾನಿ ಪ್ಯೊಂಗ್ಯಾಂಗ್‌ನಲ್ಲಿ ಪ್ರತಿವರ್ಷ ರಾಷ್ಟ್ರೀಯ ಮಟ್ಟದ ನಾಯಿ ಮಾಂಸದ ಅಡುಗೆ ಸ್ಪರ್ಧೆಗಳನ್ನು ಆಯೋಜಿಸಲಾಗುತ್ತದೆ. ಆದರೆ, ಸರ್ಕಾರದ ಇಷ್ಟೆಲ್ಲಾ ಪ್ರಚಾರದ ಹೊರತಾಗಿಯೂ, ದೇಶದ ಆರ್ಥಿಕ ಬಿಕ್ಕಟ್ಟಿನಿಂದಾಗಿ ಇದು ಸಾಮಾನ್ಯ ನಾಗರಿಕರಿಗೆ ಕೈಗೆಟುಕದ ದುಬಾರಿ ಐಷಾರಾಮಿ ಆಹಾರವಾಗಿದೆ.

ವಿಶ್ವ ಆರೋಗ್ಯ ಸಂಸ್ಥೆ (WHO) ಮತ್ತು ವೈದ್ಯಕೀಯ ಸಂಶೋಧನೆಗಳ ಪ್ರಕಾರ, ನಾಯಿ ಮಾಂಸ ಸೇವನೆ ಆರೋಗ್ಯಕ್ಕೆ ಅತ್ಯಂತ ಅಪಾಯಕಾರಿ ಮತ್ತು ಕೆಟ್ಟದ್ದು. ಸಾಂಪ್ರದಾಯಿಕ ನಂಬಿಕೆಗಳ ಪ್ರಕಾರ ಇದು ದೇಹಕ್ಕೆ ಶಕ್ತಿ ನೀಡುತ್ತದೆ ಎನ್ನಲಾದರೂ, ವೈಜ್ಞಾನಿಕವಾಗಿ ಇದರ ಸೇವನೆಯಿಂದ ಪ್ರಾಣಾಪಾಯ ತಂದೊಡ್ಡುವ ರೋಗಗಳು ಹರಡುವ ಸಾಧ್ಯತೆ ತುಂಬಾ ಹೆಚ್ಚಿರುತ್ತದೆ. ನಾಯಿ ಮಾಂಸ ಸೇವನೆಯಿಂದ ರೇಬಿಸ್, ಜಂತುಹುಳುಗಳ ಹೆಚ್ಚಳ, ಆಂಟಿಬಯೋಟಿಕ್ ರೆಸಿಸ್ಟೆನ್ಸ್ ಹಾಗೂ ಕಾಲರಾ ಮತ್ತು ಬ್ಯಾಕ್ಟೀರಿಯಾ ಸೋಂಕುಗಳು ಹರಡುವ ಭೀತಿಯಿದೆ.

ಉತ್ತರ ಕೊರಿಯಾದ ಈ ನಿಲುವಿಗೆ ತದ್ವಿರುದ್ಧವಾಗಿ, ನೆರೆಯ ದಕ್ಷಿಣ ಕೊರಿಯಾ ದೇಶವು ನಾಯಿ ಮಾಂಸದ ಉದ್ಯಮಕ್ಕೆ ಶಾಶ್ವತವಾಗಿ ಬ್ರೇಕ್ ಹಾಕಿದೆ. ಪ್ರಾಣಿ ದಯಾ ಸಂಘಟನೆಗಳ ತೀವ್ರ ಹೋರಾಟ ಮತ್ತು ಜಾಗತಿಕ ಒತ್ತಡಕ್ಕೆ ಮಣಿದ ದಕ್ಷಿಣ ಕೊರಿಯಾ ಸರ್ಕಾರವು 2024ರಿಂದಲೇ ನಾಯಿಗಳ ತಳಿ ಅಭಿವೃದ್ಧಿ, ಹತ್ಯೆ, ಮಾಂಸದ ವಿತರಣೆ ಮತ್ತು ಮಾರಾಟವನ್ನು ಸಂಪೂರ್ಣವಾಗಿ ನಿಷೇಧಿಸುವ ಐತಿಹಾಸಿಕ ಕಾನೂನನ್ನು ಜಾರಿಗೆ ತಂದಿದೆ.

ದಕ್ಷಿಣ ಕೊರಿಯಾ ಸಂಸತ್ತು ಅಂಗೀಕರಿಸಿರುವ ಈ ಹೊಸ ಕಾನೂನಿನ ಅಡಿಯಲ್ಲಿ, ನಾಯಿ ಮಾಂಸದ ಉದ್ಯಮದಲ್ಲಿ ತೊಡಗಿರುವ ವ್ಯಾಪಾರಿಗಳಿಗೆ ಪರ್ಯಾಯ ಉದ್ಯೋಗ ಕಂಡುಕೊಳ್ಳಲು ಕಾಲಾವಕಾಶ ನೀಡಲಾಗಿದೆ. ಈ ಪರಿವರ್ತನಾ ಅವಧಿಯು ಮುಕ್ತಾಯಗೊಂಡು, ಮುಂಬರುವ ಫೆಬ್ರವರಿ 2027 ರಿಂದ ನಾಯಿ ಮಾಂಸ ಮಾರಾಟ ಮಾಡುವವರ ವಿರುದ್ಧ ಕಟ್ಟುನಿಟ್ಟಿನ ಕ್ರಿಮಿನಲ್ ಮೊಕದ್ದಮೆ ಮತ್ತು ಕಠಿಣ ಶಿಕ್ಷೆ ವಿಧಿಸುವ ಪ್ರಕ್ರಿಯೆ ಜಾರಿಗೆ ಬರಲಿದೆ. ಒಂದೇ ಸಾಂಸ್ಕೃತಿಕ ಹಿನ್ನೆಲೆ ಹೊಂದಿರುವ ಎರಡು ದೇಶಗಳು ಪ್ರಾಣಿ ಕಲ್ಯಾಣ ಮತ್ತು ಸಂಪ್ರದಾಯದ ವಿಷಯದಲ್ಲಿ ಈಗ ಸಂಪೂರ್ಣ ವಿಭಿನ್ನ ಹಾದಿಯಲ್ಲಿ ಸಾಗುತ್ತಿರುವುದು ಜಗತ್ತಿನ ಗಮನ ಸೆಳೆದಿದೆ.