ಪಂದ್ಯದಲ್ಲಿ ಟಾಸ್ ಗೆದ್ದ ಜಿಟಿ ನಾಯಕ ಶಭ್​ಮನ್​​ ಗಿಲ್ ಬೌಲಿಂಗ್ ಮಾಡಲು ನಿರ್ಧರಿಸಿದರು. ಹೀಗಾಗಿ ಕೆಕೆಆರ್ ತಂಡ ಮೊದಲು ಬ್ಯಾಟಿಂಗ್ ಆರಂಭಿಸಿತು. ಕೆಕೆಆರ್ ತಂಡಕ್ಕೆ ಇನ್ನಿಂಗ್ಸ್ ತೆರೆದ ನಾಯಕ ಅಜಿಂಕ್ಯ ರಹಾನೆ ಮತ್ತು ಫಿನ್ ಅಲೆನ್ ಉತ್ತಮ ಆರಂಭವನ್ನು ನೀಡಿದರು. ತಾಳ್ಮೆಯುತ ಆಟವಾಡುತ್ತಿದ್ದ ರಹಾನೆ 14 ರನ್ ಗಳಿಸಿ ಔಟಾದರು.

ರಹಾನೆ ವಿಕೆಟ್ ಕಳೆದುಕೊಂಡ ಬಳಿಕ ಯಂಗ್ ಅಂಗ್‌ಕ್ರಿಶ್ ರಘುವಂಶಿ ಅಬ್ಬರ ಶುರುವಾಯಿತು. ಒಂದೆಡೆ ಅಲೆನ್ ಸಿಡಿಲಬ್ಬರದ ಬ್ಯಾಟಿಂಗ್ ಪ್ರದರ್ಶನ ಮಾಡಿದರೆ, ಅಂಗ್‌ಕ್ರಿಶ್ ರಘುವಂಶಿ ತಮ್ಮ ಪರಾಕ್ರಮ ತೋರಿಸಿದರು. ಎರಡನೇ ವಿಕೆಟ್​​ಗೆ ಈ ಜೋಡಿ 41 ಎಸೆತಗಳಲ್ಲಿ 95 ರನ್ ಜೊತೆಯಾಟವಾಡಿದರು. ಈ ಜೊತೆಯಾಟಕ್ಕೆ ಅಲೆನ್ ಕೊಡುಗೆ ಮಹತ್ವದ್ದಾಗಿತ್ತು. ಅಲೆನ್ ಕೇವಲ 35 ಎಸೆತಗಳಲ್ಲಿ 10 ಸಿಕ್ಸರ್‌ಗಳು ಮತ್ತು 4 ಬೌಂಡರಿಗಳನ್ನು ಒಳಗೊಂಡಂತೆ 93 ರನ್ ಗಳಿಸಿದರು. ಅವರನ್ನು ಸ್ಪಿನ್ನರ್ ಆರ್ ಸಾಯಿ ಕಿಶೋರ್ ಔಟ್ ಮಾಡಿದರು.

ಅಲೆನ್ ಬಳಿಕ ಬಂದ ಗ್ರೀನ್ ಕೂಡ ಅಂಗ್‌ಕ್ರಿಶ್ ಜೊತೆಗೆ ಭರ್ಜರಿ ಬ್ಯಾಟಿಂಗ್ ಮಾಡಿದರು. ಎಲ್ಲಿಯೂ ಕೆಕೆಆರ್ ಇನ್ನಿಂಗ್ಸ್ ಹಳಿ ತಪ್ಪಲು ಈ ಕಿಲಾಡಿ ಜೋಡಿ ಬಿಡಲಿಲ್ಲ. ಗುಜರಾತ್ ಬೌಲರ್​​ಗಳಿಗೆ ಬೆವರಿಳಿಸಿದ ಗ್ರೀನ್ ಮತ್ತು ಅಂಗ್‌ಕ್ರಿಶ್ ಅರ್ಧಶತಕಗಳನ್ನು ಬಾರಿಸಿ ಮಿಂಚಿದರು.