Last Updated:
ಪಾಕಿಸ್ತಾನ ಕ್ರಿಕೆಟ್ ತಂಡ ಮತ್ತೆ ಸಂಕಷ್ಟದಲ್ಲಿ ಸಿಲುಕಿಕೊಂಡಿದೆ. ಡೋಪಿಂಗ್ ಮಾಡಿದ್ದಕ್ಕೆ ಪಾಕಿಸ್ತಾನ ಆಟಗಾರ ಸಿಕ್ಕಿಬಿದ್ದಿದ್ದಾರೆ. ಇದರಿಂದಾಗಿ ಐಸಿಸಿ ಆ ಆಟಗಾರನನ್ನು ಬ್ಯಾನ್ ಮಾಡಿದೆ.
ಪಾಕಿಸ್ತಾನ (Pakistan) ಕ್ರಿಕೆಟ್ (Cricket) ತಂಡಕ್ಕೆ ಮತ್ತೊಮ್ಮೆ ನಾಚಿಕೆಯ ಸಂಗತಿ ನಡೆದಿದೆ. ಪಾಕಿಸ್ತಾನದ ಆಲ್ರೌಂಡರ್ ಮೊಹಮ್ಮದ್ ನವಾಜ್ (Mohammad Nawaz) ಅವರು ಯಾವುದೇ ಪ್ರದರ್ಶನ ಹೆಚ್ಚಿಸುವ ಔಷಧಗಳನ್ನು ತೆಗೆದುಕೊಂಡಿಲ್ಲವಾದರೂ, ಡೋಪಿಂಗ್ (Doping) ನಿಯಮಗಳನ್ನು ಮೀರಿದ್ದಕ್ಕಾಗಿ ತಪ್ಪಿತಸ್ಥರೆಂದು ಕಂಡುಬಂದಿದೆ. ಐಸಿಸಿ (ICC) ಇದನ್ನು ಗಮನಿಸಿ, ನವಾಜ್ ಕಳೆದ ಸುಮಾರು ಮೂರು ತಿಂಗಳ ಅಂತಾರಾಷ್ಟ್ರೀಯ ಕ್ರಿಕೆಟ್ ಪಂದ್ಯಗಳ ಎಲ್ಲಾ ದಾಖಲೆಗಳನ್ನು ಅಳಿಸಿ ಹಾಕುವುದಾಗಿ ತಿಳಿಸಿದೆ.
ಮೊಹಮ್ಮದ್ ನವಾಜ್ ಡೋಪಿಂಗ್ ನಿಯಮ ಉಲ್ಲಂಘಿಸಿದ್ದಕ್ಕಾಗಿ ತಪ್ಪಿತಸ್ಥ ಎಂದು ಕಂಡುಬಂದಿದ್ದಾರೆ. ಇದಕ್ಕಾಗಿ ಐಸಿಸಿ ಅವರನ್ನು ಮೂರು ತಿಂಗಳ ಕಾಲ ನಿಷೇಧಿಸಿದೆ. ಐಸಿಸಿ ಇಂದು (ಜುಲೈ 17, ಶುಕ್ರವಾರ) ಈ ಮಾಹಿತಿಯನ್ನು ಅಧಿಕೃತವಾಗಿ ಘೋಷಿಸಿದೆ.
ಇನ್ನಷ್ಟು ಆಘಾತಕಾರಿ ಸಂಗತಿ ಏನೆಂದರೆ, ಭಾರತ-ಶ್ರೀಲಂಕಾ ಜಂಟಿ ಆಯೋಜನೆಯ ಐಸಿಸಿ ಟಿ20 ವಿಶ್ವಕಪ್ 2026 ಪಂದ್ಯಾವಳಿಯಲ್ಲಿ ಡೋಪಿಂಗ್ ಪರೀಕ್ಷೆ ಮಾಡಿದಾಗ ನವಾಜ್ ತಪ್ಪಿತಸ್ಥ ಎಂದು ತಿಳಿದುಬಂದಿದೆ. ಅವರು ಇಡೀ ಟೂರ್ನಿಯಲ್ಲಿ ಪಾಕಿಸ್ತಾನ ತಂಡದಲ್ಲೇ ಆಡಿದ್ದರು.
ಐಸಿಸಿ ಪ್ರಕಾರ, ಫೆಬ್ರವರಿ 7 ರಂದು ಕೊಲಂಬೊದಲ್ಲಿ ನಡೆದ ಪಾಕಿಸ್ತಾನ ಮತ್ತು ನೆದರ್ಲ್ಯಾಂಡ್ಸ್ ನಡುವಿನ ಟಿ20 ವಿಶ್ವಕಪ್ 2026 ಪಂದ್ಯದ ನಂತರ ಮೊಹಮ್ಮದ್ ನವಾಜ್ ಅವರನ್ನು ಡೋಪಿಂಗ್ ಪರೀಕ್ಷೆಗೆ ಒಳಪಡಿಸಲಾಯಿತು. ಇದು ಟೂರ್ನಮೆಂಟ್ನಲ್ಲಿ ಪಾಕಿಸ್ತಾನದ ಮೊದಲ ಪಂದ್ಯವಾಗಿತ್ತು. ಈಗ ಅವರ ಮಾದರಿಯಲ್ಲಿ ಕಾರ್ಬಾಕ್ಸಿ-ಟಿಎಚ್ಸಿ ಎಂಬ ಮಾದಕ ದ್ರವ್ಯ ಕಂಡುಬಂದಿದೆ. ವರದಿ ಬಂದ ನಂತರ 32 ವರ್ಷದ ನವಾಜ್ ತಮ್ಮ ತಪ್ಪನ್ನು ಒಪ್ಪಿಕೊಂಡಿದ್ದಾರೆ.
ಮೊಹಮ್ಮದ್ ನವಾಜ್ ಅವರು ಕ್ರಿಕೆಟ್ ಪಂದ್ಯದ ಸಮಯದಲ್ಲಿ ಯಾವುದೇ ಮಾದಕ ದ್ರವ್ಯ ಸೇವಿಸಿಲ್ಲ ಎಂದು ಹೇಳಿದ್ದಾರೆ. ಆದರೆ ಇದು ಪಂದ್ಯದ ಹೊರಗಿನ ಘಟನೆ ಎಂದು ತಿಳಿದುಬಂದಿದೆ. ಇದರ ಪರಿಣಾಮವಾಗಿ ಐಸಿಸಿ ಅವರ ಮೇಲೆ ಡೋಪಿಂಗ್ ನಿಯಮ ಉಲ್ಲಂಘನೆ ಆರೋಪದಲ್ಲಿ ಮೂರು ತಿಂಗಳ ನಿಷೇಧ ಹೇರಿದೆ. ಈ ನಿಷೇಧವು ಮೇ 1, 2026 ರಿಂದ ಜಾರಿಯಲ್ಲಿರುತ್ತದೆ.
ಐಸಿಸಿ ಡೋಪಿಂಗ್ ವಿರೋಧಿ ನಿಯಮಗಳ ಪ್ರಕಾರ, ಫೆಬ್ರವರಿ 7 ರಿಂದ ಮೇ 1, 2026ರವರೆಗೆ ನೆದರ್ಲ್ಯಾಂಡ್ಸ್ ವಿರುದ್ಧದ ಪಂದ್ಯಗಳಲ್ಲಿ ನವಾಜ್ ಅವರ ಎಲ್ಲಾ ದಾಖಲೆಗಳನ್ನು ರದ್ದುಗೊಳಿಸಲಾಗಿದೆ. ಇದರರ್ಥ, ಈ ಅವಧಿಯಲ್ಲಿ ಅವರು ಗಳಿಸಿದ ಯಾವುದೇ ರನ್ಗಳು ಮತ್ತು ವಿಕೆಟ್ಗಳನ್ನು ಅವರ ಒಟ್ಟು ವೃತ್ತಿಜೀವನದ ಅಂಕಿಅಂಶಗಳಿಂದ ತೆಗೆದುಹಾಕಲಾಗುತ್ತದೆ. ಈ ಸಮಯದಲ್ಲಿ ನವಾಜ್ ಒಟ್ಟು 7 ಅಂತಾರಾಷ್ಟ್ರೀಯ ಪಂದ್ಯಗಳನ್ನು ಆಡಿದ್ದು, 15 ರನ್ಗಳನ್ನು ಗಳಿಸಿ 7 ವಿಕೆಟ್ಗಳನ್ನು ಪಡೆದಿದ್ದಾರೆ.
