ಈ ಘಟನೆಯು ಅಹಮದಾಬಾದ್‌ನ ನಿಕೋಲ್ ಪ್ರದೇಶದ ಚಾಣಕ್ಯ ಶಾಲೆಯಲ್ಲಿ ನಡೆದಿದೆ. ಕ್ಷುಲ್ಲಕ ಕಾರಣಕ್ಕೆ ಶಿಕ್ಷಕ ವಿದ್ಯಾರ್ಥಿಗೆ ಕಪಾಳಮೋಕ್ಷ ಮಾಡಿದ್ದಾನೆ, ಇದರಿಂದ ಇಯರ್​ಡಮ್​(ಕಿವಿಗೆ) ಡ್ಯಾಮೇಜ್​ ಆಗಿದೆ.

10ನೇ ತರಗತಿಯ ಗುಜರಾತಿ ಮಾಧ್ಯಮ ವಿಭಾಗದ ವಿದ್ಯಾರ್ಥಿ ದೈಹಿಕ ತರಬೇತಿ (ಪಿಟಿ) ಅವಧಿಗೆ ಹಾಜರಾಗಿದ್ದ. ಆ ಸಮಯದಲ್ಲಿ ಅವನು ಸ್ನೇಹಿತರೊಂದಿಗೆ ಮೈದಾನದಲ್ಲಿ ಕುಳಿತು ಮಾತನಾಡುತ್ತಿದ್ದ. ಅಲ್ಲಿಗೆ ಲಕ್ಷ್ಮಣ್ ಎಂಬ ಇಂಗ್ಲಿಷ್ ಶಿಕ್ಷಕ ಬಂದು ವಿದ್ಯಾರ್ಥಿಯ ಮುಖಕ್ಕೆ ಬಲವಾಗಿ ಕಪಾಳಮೋಕ್ಷ ಮಾಡಿದ್ದಾನೆ ಎಂದು ಆರೋಪವಿದೆ. ಕಪಾಳಮೋಕ್ಷದ ಪರಿಣಾಮ ತುಂಬಾ ತೀವ್ರವಾಗಿತ್ತು. ಶಿಕ್ಷಕ ಹೊಡೆದ ತಕ್ಷಣ ವಿದ್ಯಾರ್ಥಿಯ ಎಡ ಕಿವಿ ಊದಿಕೊಂಡು ರಕ್ತಸ್ರಾವವಾಗಲು ಪ್ರಾರಂಭವಾಗಿದೆ. ಅವನಿಗೆ ಕಿವಿ ಕೇಳದಂತಾಗಿದೆ.

ಆರೋಪಿ ಶಿಕ್ಷಕ ಲಕ್ಷ್ಮಣ್ ಶಾಲಾ ಟ್ರಸ್ಟ್ ಮತ್ತು ವಿದ್ಯಾರ್ಥಿಯ ಕುಟುಂಬದ ಮುಂದೆ ತನ್ನ ತಪ್ಪನ್ನು ಒಪ್ಪಿಕೊಂಡಿದ್ದಾನೆ ಎಂದು ವರದಿಯಾಗಿದೆ. ಆದರೆ ಗಾಯದ ಗಂಭೀರತೆಯನ್ನು ಉಲ್ಲೇಖಿಸಿ ವಿದ್ಯಾರ್ಥಿಯ ತಂದೆ ಶಿಕ್ಷಕನನ್ನು ಕ್ಷಮಿಸಲು ನಿರಾಕರಿಸಿದ್ದಾರೆ. ‘ನನ್ನ ಮಗನಿಗೆ ಶಾಶ್ವತ ಕಿವುಡುತನ ಸಮಸ್ಯೆ ಉಂಟಾದರೆ ಅಥವಾ ಶಸ್ತ್ರಚಿಕಿತ್ಸೆ ಅಗತ್ಯವಾದರೆ ಜವಾಬ್ದಾರಿ ಶಾಲಾ ಟ್ರಸ್ಟ್ ಮತ್ತು ಶಿಕ್ಷಕರ ಮೇಲಿರುತ್ತದೆ’ ಎಂದು ಹೇಳಿದ್ದಾರೆ. ಕಾನೂನು ಕ್ರಮ ಕೈಗೊಳ್ಳುವುದಾಗಿ ತಿಳಿಸಿದ್ದಾರೆ.

ವಿದ್ಯಾರ್ಥಿಯ ತಂದೆ ನೀಡಿದ ದೂರಿನ ಮೇರೆಗೆ ಕೃಷ್ಣನಗರ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದ್ದಾರೆ. ಶಿಕ್ಷಕನನ್ನು ವಿಚಾರಣೆಗೆ ವಶಕ್ಕೆ ಪಡೆದಿದ್ದಾರೆ. ಪೊಲೀಸ್ ಇನ್ಸ್‌ಪೆಕ್ಟರ್ ‘ವಿದ್ಯಾರ್ಥಿಗೆ ಸರಿಯಾಗಿ ಕಿವಿ ಕೇಳಿಸುತ್ತಿಲ್ಲ ಎಂಬ ಮಾಹಿತಿ ಬಂದಿದೆ. ನಾವು ತನಿಖೆ ನಡೆಸುತ್ತಿದ್ದೇವೆ’ ಎಂದು ಹೇಳಿದ್ದಾರೆ.