ಸಿನಿಮಾಗೆ ಬರುವ ಮುನ್ನ ಮೋಹನ್ ಬಾಬು ಪಿಟಿ ಟೀಚರ್ ಆಗಿದ್ದರು. ಆಗ ಅವರ ತಿಂಗಳ ಸಂಬಳ ಕೇವಲ 40 ರೂಪಾಯಿ ಆಗಿತ್ತು. ಇತ್ತೀಚೆಗೆ ನೀಡಿದ ಸಂದರ್ಶನವೊಂದರಲ್ಲಿ ಅವರು ತಮ್ಮ ಹಳೆಯ ದಿನಗಳನ್ನು ನೆನಪಿಸಿಕೊಂಡಿದ್ದಾರೆ.

ಹಳೆಯ ದಿನಗಳ ಬಗ್ಗೆ ಮೋಹನ್ ಬಾಬು ಭಾವುಕರಾಗಿ ಮಾತನಾಡಿದ್ದಾರೆ. ‘ನಾನು ಬಾಡಿಗೆ ಕಾರು ಶೆಡ್‌ನಲ್ಲಿ ವಾಸವಾಗಿದ್ದೆ. ಅದಕ್ಕೆ ತಿಂಗಳಿಗೆ 30 ರೂಪಾಯಿ ಬಾಡಿಗೆ ಕಟ್ಟುತ್ತಿದ್ದೆ. ಅಲ್ಲಿ ಶೌಚಾಲಯ ಅಥವಾ ಸ್ನಾನದ ಗೃಹ ಇರಲಿಲ್ಲ. ಆಗ ನನ್ನನ್ನು ನೋಡಲು ಯಾರೂ ಬರುತ್ತಿರಲಿಲ್ಲ. ನಾನು ತುಂಬಾ ಕಷ್ಟಪಟ್ಟಿದ್ದೇನೆ. ತಿನ್ನಲು ಊಟ ಇಲ್ಲದೆ ಬರೀ ನೀರು ಕುಡಿದು ಮಲಗಿದ ದಿನಗಳಿವೆ’ ಎಂದು ಮೋಹನ್ ಬಾಬು ಹೇಳಿದ್ದಾರೆ.

ಇಂದು ಮೋಹನ್ ಬಾಬು ಅವರ ಜೀವನ ಸಂಪೂರ್ಣ ಬದಲಾಗಿದೆ. ಹೈದರಾಬಾದ್‌ನ ಜಲ್ಪಳ್ಳಿಯಲ್ಲಿ ಅವರು ಬೃಹತ್ ಬಂಗಲೆ ಹೊಂದಿದ್ದಾರೆ. ಇದು 10 ಎಕರೆ ಪ್ರದೇಶದಲ್ಲಿದೆ. ಸುತ್ತಲೂ ಹಸಿರಿನಿಂದ ಕೂಡಿದೆ. ಇದು ನೋಡಲು ಒಂದು ಐಷಾರಾಮಿ ರೆಸಾರ್ಟ್‌ನಂತೆ ಕಾಣುತ್ತದೆ.

ಮೋಹನ್ ಬಾಬು ಅವರ ತಂದೆ ರಂಗಭೂಮಿ ಕಲಾವಿದರಾಗಿದ್ದರು. ಅವರನ್ನು ನೋಡಿಯೇ ಮೋಹನ್ ಬಾಬು ಅವರಿಗೆ ನಟನೆಯಲ್ಲಿ ಆಸಕ್ತಿ ಬಂತು. 10ನೇ ತರಗತಿಯಲ್ಲಿದ್ದಾಗ ಜಾಹೀರಾತು ನೋಡಿ ಸಿನಿಮಾಗೆ ಅರ್ಜಿ ಹಾಕಿದರು. ಆಗ ಅವರ ತಂದೆಯ ಸಂಬಳ ಕೇವಲ 180 ರೂಪಾಯಿ ಇತ್ತು. ಆದರೂ ಮಗನಿಗಾಗಿ 50 ರೂಪಾಯಿ ಖರ್ಚು ಮಾಡಿ ಅರ್ಜಿ ಕಳುಹಿಸಿದ್ದರು.