ಆದರೂ, ಕೆಲವು ನದಿಗಳು ತಮ್ಮ ಅಸಾಧಾರಣ ಸೌಂದರ್ಯ ಮತ್ತು ಶುದ್ಧತೆಗಾಗಿ ಹೆಸರಾಗಿವೆ. ಇವು ಪ್ರವಾಸಿಗರನ್ನು ಆಕರ್ಷಿಸುತ್ತವೆ ಮತ್ತು ಸುಸ್ಥಿರ ಅಭ್ಯಾಸಗಳಿಗೆ ಉತ್ತಮ ಉದಾಹರಣೆಗಳಾಗಿವೆ. ಅದರಲ್ಲೂ ನಮ್ಮ ದೇಶದಲ್ಲಿರುವ ಒಂದು ನದಿಯು ಸ್ವಚ್ಛತೆಗೆ ಗುರುತಿಸಲ್ಪಟ್ಟಿದ್ದು, ದೇಶದಲ್ಲಿಯೇ ಅತ್ಯಂತ ಸ್ವಚ್ಛ ನದಿ ಎಂಬ ಖ್ಯಾತಿಗೆ ಪಾತ್ರವಾಗಿದೆ.

ಭಾರತವು ತನ್ನ ಕೃಷಿ, ಆರ್ಥಿಕತೆ ಮತ್ತು ಸಂಸ್ಕೃತಿಗೆ ಪ್ರಮುಖವಾದ ನದಿಗಳ ವಿಶಾಲ ಜಾಲಕ್ಕೆ ನೆಲೆಯಾಗಿದೆ. ಗಂಗಾ, ಯಮುನಾ, ಬ್ರಹ್ಮಪುತ್ರ ಮತ್ತು ಗೋದಾವರಿ ಮುಂತಾದ ಪ್ರಮುಖ ನದಿಗಳು ಜನ ಜೀವನವನ್ನು ಬೆಂಬಲಿಸುವಲ್ಲಿ ನಿರ್ಣಾಯಕ ಪಾತ್ರವನ್ನು ವಹಿಸುತ್ತವೆ.

ಡವ್ಕಿ ನದಿ ಎಂದೂ ಕರೆಯಲ್ಪಡುವ ಉಮ್ಗೋಟ್ ನದಿಯು ಭಾರತದ ಸ್ವಚ್ಛ ನದಿ ಎಂಬ ಹೆಗ್ಗಳಿಕೆಗೆ ಭಾಜನವಾಗಿದೆ. ಭಾರತದ ಮೇಘಾಲಯದಲ್ಲಿರುವ ಈ ಒಂದು ನದಿ ಸ್ಫಟಿಕ-ಶುದ್ಧ ನೀರಿಗೆ ಹೆಸರುವಾಸಿಯಾಗಿದೆ. ಇಲ್ಲಿಗೆ ಬರುವ ಪ್ರವಾಸಿಗರಿಗೆ ಮರೆಯಲಾಗದ ಅನುಭವವನ್ನು ನೀಡುತ್ತದೆ. ಇದರ ನೈಸರ್ಗಿಕ ಸೌಂದರ್ಯ, ಪ್ರಶಾಂತ ಪರಿಸರ ಮತ್ತು ಪ್ರಾಚೀನ ಸ್ಥಿತಿಯು ಇದನ್ನು ವಿಶ್ವದ ಅತ್ಯಂತ ಸ್ವಚ್ಛ ನದಿಗಳಲ್ಲಿ ಒಂದಾಗಿಸಿದೆ.

ಉಮ್ಗೋಟ್ ನದಿಯು ಭಾರತ-ಬಾಂಗ್ಲಾದೇಶದ ಗಡಿಯ ಸಮೀಪವಿರುವ ಪಶ್ಚಿಮ ಜೈನ್ತಿಯಾ ಹಿಲ್ಸ್ ಜಿಲ್ಲೆಯ ದಾಕಿ ಎಂಬ ಸಣ್ಣ ಪಟ್ಟಣದಲ್ಲಿ ಹರಿಯುತ್ತದೆ. ಇದು ಮೇಘಾಲಯದ ಖಾಸಿ ಬೆಟ್ಟಗಳು ಮತ್ತು ಜೈನ್ತಿಯಾ ಬೆಟ್ಟಗಳ ನಡುವೆ ನೈಸರ್ಗಿಕ ವಿಭಜಕವಾಗಿ ಕಾರ್ಯನಿರ್ವಹಿಸುತ್ತದೆ.

ಉಮ್ಗೋಟ್ ನದಿಯು ಮೂರು ಪ್ರಮುಖ ಪ್ರವಾಸಿ ತಾಣಗಳ ಮೂಲಕ ಹರಿಯುತ್ತದೆ. ಹೀಗಾಗಿ ಇದರ ಸುತ್ತಮುತ್ತಲು ಪ್ರವಾಸಿಗರು ನೋಡಬಹುದಾದ ಪ್ರವಾಸಿ ತಾಣಗಳು ಕೂಡ ಇವೆ.

ಇದು ತುಂಬಾ ಪ್ರಾಚೀನ ನದಿ, ಯಾವುದೇ ಮಾನವ ತ್ಯಾಜ್ಯ ಅಥವಾ ವಸಾಹತುಗಳ ಕಸವು ಅದನ್ನು ಕಲುಷಿತಗೊಳಿಸುವುದಿಲ್ಲ. ಗಣಿಗಾರಿಕೆ ಚಟುವಟಿಕೆಗಳಿಂದ ಬರುವ ಯಾವುದೇ ಹಾನಿಕಾರಕ ರಾಸಾಯನಿಕಗಳು ನದಿಗೆ ಹರಿದು ಬರುವುದಿಲ್ಲ. ಸ್ಥಳೀಯ ಗ್ರಾಮಸ್ಥರು ಕೂಡ ನದಿಯನ್ನು ಸ್ವಚ್ಛವಾಗಿಡಲು ಎಲ್ಲಾ ಕ್ರಮಗಳನ್ನು ತೆಗೆದುಕೊಳ್ಳುತ್ತಾರೆ. ಏಕೆಂದರೆ ಇದು ಕುಡಿಯುವ ನೀರನ್ನು ಒದಗಿಸುತ್ತದೆ ಮತ್ತು ಮೂರು ಗ್ರಾಮಗಳಿಗೆ ಪ್ರಮುಖ ಜಲ ಸಂಪನ್ಮೂಲವೇ ಈ ನದಿಯಾಗಿದೆ.