ಕೇತನ್​ ಸಾವಿನ ಕೇಸ್​​ನ ಈ ಸಾಕ್ಷಿ ಪ್ರಕರಣವನ್ನು ಇನ್ನಷ್ಟು ಜಟಿಲಗೊಳಿಸಿದೆ. ಜೂನ್ 18 ರಂದು ಲೋಹಗಢ ಕೋಟೆಯ ಬಳಿ ಕೇತನ್ ಕಂದಕಕ್ಕೆ ಬಿದ್ದು ಸಾವನ್ನಪ್ಪಿದ್ದಾಗ ಅಲ್ಲಿದ್ದ ಸಿಬ್ಬಂದಿ ಸಿಯಾ ಬಗ್ಗೆ ಕೆಲವು ಅಚ್ಚರಿ ಹೇಳಿಕೆಗಳನ್ನು ನೀಡಿದ್ದಾರೆ.

ಕೇತನ್​ ಕಂದಕಕ್ಕೆ ಬಿದ್ದಾಗ ಆ ಸಮಯದಲ್ಲಿ ಅವರ ಭಾವಿ ಪತ್ನಿ ಸಿಯಾ ಗೋಯಲ್ ಜೊತೆಗಿದ್ದರು. 26 ವರ್ಷದ ಕೇತನ್ ಮತ್ತು 20 ವರ್ಷದ ಸಿಯಾ ಫೋಟೋ ತೆಗೆಯುತ್ತಿದ್ದಾಗ ಅಪಘಾತ ಸಂಭವಿಸಿತು ಎಂದು ಸಿಯಾ ಪೊಲೀಸರಿಗೆ ಹೇಳಿದ್ದರು. ಆದರೆ ಈಗ ಈ ಕಥೆ ಬೇರೆಯಾಗಿದೆ. ಕೋಟೆಯ ಸಿಬ್ಬಂದಿ ರಾಹುಲ್ ಪೊಲೀಸರಿಗೆ ನೀಡಿದ ಹೇಳಿಕೆಯು ತನಿಖೆಯಲ್ಲಿ ತಿರುವು ಕೊಟ್ಟಿದೆ. ಕೇತನ್ ಬಿದ್ದ ನಂತರ ಸಿಯಾ ಕಿರುಚಾಡಿದ್ದನ್ನು ಕೇಳಿ ಸಿಬ್ಬಂದಿ ಮತ್ತು ಪೊಲೀಸರು ಸ್ಥಳಕ್ಕೆ ಧಾವಿಸಿದ್ದಾರೆ. ರಾಹುಲ್ ಮತ್ತು ಇತರರು ಕಂದಕದ ಕೆಳಗೆ ಹೋಗಿ ನೋಡಿದಾಗ ಕೇತನ್ ರಕ್ತದ ಮಡುವಿನಲ್ಲಿ ಬಿದ್ದಿರುವುದು ಕಂಡುಬಂದಿದೆ. ಆಗಲೇ ಕೇತನ್​ ಸತ್ತಿದ್ದಾರೆ ಎಂದು ರಾಹುಲ್‌ಗೆ ತಕ್ಷಣ ಅರಿವಾದರೂ,ಸಿಯಾ ಆಘಾತಗೊಳ್ಳಬಹುದು ಎಂದು ಭಯದಿಂದ ಅವರು ಸಿಯಾಗೆ ‘ಕೇತನ್ ಜೀವಂತವಾಗಿದ್ದಾರೆ’ ಎಂದು ಹೇಳಿದ್ದರಂತೆ.

ಕೇತನ್ ಕುಟುಂಬ ಸಿಯಾ ನಡವಳಿಕೆಯನ್ನು ಪ್ರಶ್ನಿಸಿದೆ. ಕೇತನ್ ಅವರ ತಂದೆ ವಿಶಾಲ್ ಅಗರ್ವಾಲ್ ಅವರು ಮಾಧ್ಯಮಗಳಿಗೆ ಹೇಳಿದಂತೆ, ಮಗ ಸತ್ತ ನಂತರ ಸಿಯಾಳಲ್ಲಿ ದುಃಖ ಕಾಣಲಿಲ್ಲ. ಶವವನ್ನು ಮನೆಗೆ ತಂದಾಗಲೂ ಅವಳು ಶಾಂತವಾಗಿದ್ದಳು ಎಂದು ಆರೋಪಿಸಿದ್ದಾರೆ.

ಪೊಲೀಸ್ ತನಿಖೆ ಪ್ರಕಾರ ಇದು ಒಂದು ದಿನದ ಸಂಚು ಅಲ್ಲ. ಹಲವು ತಿಂಗಳುಗಳಿಂದ ಯೋಜನೆ ರೂಪುಗೊಂಡಿತ್ತು. ಸಿಯಾ ಕೇತನ್‌ನ್ನು ಲೋಹಗಢ ಕೋಟೆಗೆ ಹಲವು ಬಾರಿ ಕರೆದೊಯ್ದಿದ್ದಳು. ಕೊಲ್ಲುವ ಪ್ರಯತ್ನ ಕನಿಷ್ಠ ಮೂರು ಬಾರಿ ವಿಫಲವಾಗಿತ್ತು. ಒಮ್ಮೆ ಕೇತನ್ ಪೊದೆ ಹಿಡಿದು ಬದುಕುಳಿದಿದ್ದ ಎಂದು ವರದಿಯಾಗಿದೆ. ಪ್ರಮುಖ ಸುಳಿವು ಕೋಟೆಯ ಸಿಸಿಟಿವಿ ದೃಶ್ಯಗಳಿಂದ ಬಂದಿದೆ. ಕೇತನ್ ಮತ್ತು ಸಿಯಾ ಹಿಂದೆ ಒಬ್ಬ ವ್ಯಕ್ತಿ ಹೂಡಿ ಧರಿಸಿ ಹಿಂಬಾಲಿಸುತ್ತಿರುವುದು ಕಂಡುಬಂದಿದೆ. ಬಿಸಿಲಿನಲ್ಲಿ ಕೂಡ ಹೂಡಿ ಧರಿಸಿದ್ದ ಅವನನ್ನು ಸಿಯಾ ಪ್ರೇಮಿ ಚೇತನ್ ಚೌಧರಿ ಎಂದು ಗುರುತಿಸಲಾಗಿದೆ.