Last Updated:
Actor Dino Morea: ಬೆಂಗಳೂರು ಮೂಲದ ಮಾಡೆಲ್ ಕಂ ಆ್ಯಕ್ಟರ್ ಡಿನೋ ಮೊರೆಯಾ ಹಲವು ಬಾಲಿವುಡ್ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಕನ್ನಡದಲ್ಲಿ ನಟಿ ರಮ್ಯಾ ಅಭಿನಯಿಸಿದ್ದ ಜೂಲಿ ಸಿನಿಮಾದಲ್ಲಿ ನಾಯಕನಾಗಿ ಡಿನೋ ಮೊರಿಯಾ ನಟಿಸಿದ್ದರು.
ಮುಂಬೈ: ಖ್ಯಾತ ಬಾಲಿವುಡ್ ನಟ (Bollywood actor), ಬೆಂಗಳೂರು (Bengaluru) ಮೂಲದ ಡಿನೋ ಮೊರಿಯಾ (Dino Morea) ಅರೆಸ್ಟ್ ಆಗಿದ್ದಾರೆ. ಮುಂಬೈ ಪೊಲೀಸಕ ಆರ್ಥಿಕ ಅಪರಾಧ ವಿಭಾಗದ (EOW) ಅಧಿಕಾರಿಗಳು ಡಿನೋ ಮೊರಿಯಾ ಅವರನ್ನು ಬಂಧಿಸಿದ್ದಾರೆ. ಮಿಥಿ ನದಿ (Mithi River) ಡಿಸಿಲ್ಟಿಂಗ್ (ಮರಳು ಮತ್ತು ಕೆಸರು ತೆಗೆಯುವ) ಹಗರಣದಲ್ಲಿ ಬಾಲಿವುಡ್ ನಟನನ್ನು ಬಂಧಿಸಲಾಗಿದೆ. ಬೆಂಗಳೂರು ಮೂಲದ ಮಾಡೆಲ್ ಕಂ ಆ್ಯಕ್ಟರ್ ಡಿನೋ ಮೊರೆಯಾ ಹಲವು ಬಾಲಿವುಡ್ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಕನ್ನಡದಲ್ಲಿ ನಟಿ ರಮ್ಯಾ (Ramya) ಅಭಿನಯಿಸಿದ್ದ ಜೂಲಿ (Julie) ಸಿನಿಮಾದಲ್ಲಿ ನಾಯಕನಾಗಿ ಡಿನೋ ಮೊರಿಯಾ ನಟಿಸಿದ್ದರು.
ಮಿಡ್-ಡೇ ವರದಿಯ ಪ್ರಕಾರ, ಅಕ್ಟೋಬರ್ 2, 2026ರಂದು ಚಾಲ್ತಿಯಲ್ಲಿರುವ ತನಿಖೆಯ ಭಾಗವಾಗಿ ಅವರನ್ನು ಬಂಧಿಸಲಾಗಿದೆ. ಈ ಪ್ರಕರಣ ಮುಂಬೈನ ಮಿಥಿ ನದಿಯ ಶುದ್ಧೀಕರಣ ಮತ್ತು ನವೀಕರಣ ಕಾಮಗಾರಿಗೆ ಸಂಬಂಧಿಸಿದ ಹಣಕಾಸಿನ ಅಕ್ರಮಗಳ ಬಗ್ಗೆ ಸಂಬಂಧಿಸಿದೆ.
ವರದಿಗಳ ಪ್ರಕಾರ, ಬಂಧನಕ್ಕೂ ಮುನ್ನ ಅಧಿಕಾರಿಗಳು ಮುಂಬೈನ ಬಾಂದ್ರಾದಲ್ಲಿರುವ ಡಿನೋ ಮೊರಿಯಾ ಅವರ ಮನೆಯಲ್ಲೇ ಸುಮಾರು ಎಂಟು ಗಂಟೆಗಳ ಕಾಲ ಅವರನ್ನು ವಿಚಾರಣೆ ನಡೆಸಿದ್ದಾರೆ.
ಬೃಹನ್ಮುಂಬೈ ಮಹಾನಗರ ಪಾಲಿಕೆಗೆ (BMC) ಈ ಅಕ್ರಮಗಳಿಂದ ಸುಮಾರು ₹65.54 ಕೋಟಿ ನಷ್ಟವಾಗಿದೆ ಎಂದು ತನಿಖೆಯಲ್ಲಿ ಆರೋಪಿಸಲಾಗಿದೆ. EOW ಗುತ್ತಿಗೆದಾರರು, ಮಧ್ಯವರ್ತಿಗಳು ಮತ್ತು ನಾಗರಿಕ ಅಧಿಕಾರಿಗಳ ಪಾತ್ರವನ್ನು ಪರಿಶೀಲಿಸುತ್ತಿದೆ. ಗುತ್ತಿಗೆಗಳನ್ನು ಹೇಗೆ ನೀಡಲಾಯಿತು, ಹಣವನ್ನು ಹೇಗೆ ಪಾವತಿಸಲಾಯಿತು ಎಂಬುದನ್ನು ತನಿಖೆ ಮಾಡಲಾಗುತ್ತಿದೆ.
ಡಿನೋ ಮೊರಿಯಾ ಈ ಪ್ರಕರಣದಿಂದಾಗಿ ಬಹುಕಾಲದಿಂದ ಸುದ್ದಿಯಲ್ಲಿದ್ದಾರೆ. ಕಳೆದ ವರ್ಷ ಜೂನ್‌ನಲ್ಲಿ ಎನ್‌ಫೋರ್ಸ್‌ಮೆಂಟ್ ಡೈರೆಕ್ಟರೇಟ್ (ED) ಅವರ ಮನೆಯಲ್ಲಿ ಸುಮಾರು 14 ಗಂಟೆಗಳ ಶೋಧ ನಡೆಸಿತ್ತು. ನಟರ ಮುಂಬೈ ಮನೆಯ ಜೊತೆಗೆ ಮುಂಬೈ ಮತ್ತು ಕೊಚ್ಚಿಯಲ್ಲಿ ಒಟ್ಟು 14 ಸ್ಥಳಗಳಲ್ಲಿ ಏಕಕಾಲದಲ್ಲಿ ಶೋಧ ನಡೆಸಲಾಗಿತ್ತು. ಡಿನೋ ಅವರ ಸಹೋದರರ ಮನೆಗಳು ಹಾಗೂ ಗುತ್ತಿಗೆದಾರರ ಮತ್ತು ಮಧ್ಯವರ್ತಿಗಳ ಕಚೇರಿಗಳನ್ನೂ ಶೋಧಿಸಲಾಗಿತ್ತು.
EOW ಮೊದಲೇ ಕಂಡುಕೊಂಡ ವಿಷಯವೆಂದರೆ, ಪ್ರಕರಣದ ಮುಖ್ಯ ಆರೋಪಿ ಕೇತನ್ ಕದಮ್ ಅವರು UBO Ridez ಎಂಬ ಕಂಪನಿಗೆ ₹18 ಲಕ್ಷ ವರ್ಗಾಯಿಸಿದ್ದಾರೆ. ಈ ಕಂಪನಿಯಲ್ಲಿ ಡಿನೋ ಮೊರಿಯಾ ಅವರ ಸಹೋದರ ಸ್ಯಾಂಟಿನೋ ಮೊರಿಯಾ ನಿರ್ದೇಶಕರಾಗಿದ್ದಾರೆ. ಕೇತನ್ ಕದಮ್ Vodar India LLP ಗೆ ಸಂಬಂಧಿಸಿದವರು. ಮಿಥಿ ನದಿ ಡಿಸಿಲ್ಟಿಂಗ್ ಹಗರಣದಲ್ಲಿ ಭಾಗಿಯಾಗಿದ್ದಾರೆ ಎಂಬ ಆರೋಪದ ಮೇಲೆ 2025ರಲ್ಲಿ ಅವರನ್ನು ಬಂಧಿಸಲಾಗಿತ್ತು. ತನಿಖಾಧಿಕಾರಿಗಳ ಪ್ರಕಾರ, Vodar India LLP ಮತ್ತು ವಿದ್ಯುತ್ ಕಾರ್ಟ್ ಕಂಪನಿಯಾದ UBO Ridez ಎರಡೂ ಮುಂಬೈನ ವರ್ಲಿಯ ಫೇಮಸ್ ಸ್ಟುಡಿಯೋ ಹತ್ತಿರದ ಒಂದೇ ವಿಳಾಸದಿಂದ ಕಾರ್ಯನಿರ್ವಹಿಸುತ್ತಿದ್ದವು.
ಮಿಥಿ ನದಿ ಮುಂಬೈನ ಪ್ರಮುಖ ನದಿಗಳಲ್ಲಿ ಒಂದು. ಮಳೆಗಾಲದಲ್ಲಿ ನಗರದ ನೀರು ಹರಿದು ಹೋಗಲು ಇದು ಮುಖ್ಯ. ನದಿಯಲ್ಲಿ ಸೇರುವ ಮರಳು, ಕೆಸರು ಮತ್ತು ಕಸವನ್ನು ತೆಗೆಯುವ ಕೆಲಸವನ್ನು ಡಿಸಿಲ್ಟಿಂಗ್ ಎನ್ನುತ್ತಾರೆ. ಈ ಕೆಲಸಕ್ಕೆ BMC ಗುತ್ತಿಗೆ ನೀಡುತ್ತದೆ. ಆದರೆ ಗುತ್ತಿಗೆ ನೀಡಿಕೆ, ಕೆಲಸದ ಗುಣಮಟ್ಟ ಮತ್ತು ಪಾವತಿಯಲ್ಲಿ ಅಕ್ರಮ ನಡೆದಿದೆ ಎಂದು ಆರೋಪಿಸಲಾಗಿದೆ. ಇದರಿಂದ ಸಾರ್ವಜನಿಕ ಹಣದ ದುರುಪಯೋಗವಾಗಿದೆ ಎಂಬುದು ತನಿಖೆಯಿಂದ ತಿಳಿದು ಬಂದಿದೆ.
ನದಿ ಸ್ವಚ್ಛಗೊಳಿಸುವ ಕೆಲಸದ ಹೆಸರಿನಲ್ಲಿ ಹಣ ತಪ್ಪಾಗಿ ಹರಿದಿದೆ ಎಂದು ಪೊಲೀಸರು ಹೇಳುತ್ತಿದ್ದಾರೆ. ಆ ಹಣದ ಕೆಲವು ಭಾಗ ನಟರ ಸಹೋದರರ ಕಂಪನಿಗೆ ಹೋಗಿದೆ ಎಂಬುದು ತನಿಖೆಯಲ್ಲಿ ಕಂಡುಬಂದಿದೆ. ಆದ್ದರಿಂದ ಡಿನೋ ಮೊರಿಯಾ ಅವರನ್ನು ವಿಚಾರಣೆ ನಡೆಸಿ ಬಂಧಿಸಲಾಗಿದೆ. ಇದು ಇನ್ನೂ ತನಿಖೆಯ ಹಂತದಲ್ಲಿದೆ ಎಂದು ನ್ಯೂಸ್ 18 ಇಂಗ್ಲಿಷ್ ವರದಿ ಮಾಡಿದೆ.
