ಏಷ್ಯನ್ ಗೇಮ್ಸ್ ಇತಿಹಾಸದಲ್ಲಿ ಭಾರತದ ಯಾವುದೇ ಮಹಿಳಾ ಶೂಟರ್ ಈ ಹಿಂದೆ ಟ್ರ್ಯಾಪ್ ಅಥವಾ ಸ್ಕೀಟ್ ವೈಯಕ್ತಿಕ ವಿಭಾಗದಲ್ಲಿ ಪದಕ ಗೆದ್ದಿರಲಿಲ್ಲ. ನೀರು ಈ ಸಾಧನೆ ಮಾಡಿದ ಮೊದಲ ಭಾರತೀಯ ಮಹಿಳೆಯಾಗಿದ್ದಾರೆ. ಭಾರತಕ್ಕೆ ಈ ಹಿಂದೆ ಟ್ರ್ಯಾಪ್ ಶೂಟಿಂಗ್‌ನಲ್ಲಿ ಬಂದಿದ್ದ ವೈಯಕ್ತಿಕ ಚಿನ್ನದ ಪದಕಗಳು ಪುರುಷರ ವಿಭಾಗದಲ್ಲಿ ಮಾತ್ರ ಬಂದಿದ್ದವು. 1978ರಲ್ಲಿ ರಣಧೀರ್ ಸಿಂಗ್ (ವೈಯಕ್ತಿಕ ಟ್ರ್ಯಾಪ್) ಮತ್ತು 2010ರಲ್ಲಿ ರಂಜನ್ ಸೋಧಿ (ಡಬಲ್ ಟ್ರ್ಯಾಪ್) ಚಿನ್ನ ಗೆದ್ದಿದ್ದರು.

ಮಂಗಳವಾರ ನಡೆದ ಎಂಟು ಶೂಟರ್‌ಗಳ ಫೈನಲ್ ಪಂದ್ಯಕ್ಕೂ ಮುನ್ನ ನಡೆದ ಅರ್ಹತಾ ಸುತ್ತಿನಲ್ಲಿ ನೀರೂ ಧಂಡಾ ಅವರು ಕತಾರ್‌ನ ರೇ ಬಾಸಿಲ್ ಅವರೊಂದಿಗೆ ಜಂಟಿಯಾಗಿ 118 ಅಂಕಗಳನ್ನು ಗಳಿಸಿ ಅಗ್ರಸ್ಥಾನ ಪಡೆದಿದ್ದರು. ಇದು ಏಷ್ಯನ್ ಗೇಮ್ಸ್‌ನ ಹೊಸ ಅರ್ಹತಾ ಸುತ್ತಿನ ದಾಖಲೆಯಾಗಿದೆ.

ವೈಯಕ್ತಿಕ ಚಿನ್ನದ ಪದಕ ಗೆಲ್ಲುವ ಮುನ್ನ ನೀರೂ ಧಂಡಾ ಅವರು ಮಹಿಳೆಯರ ಟ್ರ್ಯಾಪ್ ತಂಡ ವಿಭಾಗದಲ್ಲಿ ಭಾರತಕ್ಕೆ ಬೆಳ್ಳಿ ಪದಕ ತಂದುಕೊಡುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ನೀರೂ, ಆಶಿಮಾ ಅಹ್ಲಾವತ್ ಮತ್ತು ಮನೀಶಾ ಕೀರ್ ಅವರನ್ನೊಳಗೊಂಡ ಭಾರತ ತಂಡ 328 ಅಂಕಗಳನ್ನು ಗಳಿಸಿ ಎರಡನೇ ಸ್ಥಾನ ಪಡೆಯಿತು. ಈ ವಿಭಾಗದಲ್ಲಿ ಚೀನಾ ತಂಡ (346 ಅಂಕ) ಚಿನ್ನದ ಪದಕ ಗೆದ್ದುಕೊಂಡಿತು. ತಂಡದ ಇತರ ಆಟಗಾರ್ತಿಯರಾದ ಆಶಿಮಾ (16ನೇ ಸ್ಥಾನ) ಮತ್ತು ಮನೀಶಾ (23ನೇ ಸ್ಥಾನ) ವೈಯಕ್ತಿಕ ಫೈನಲ್ ತಲುಪಲು ವಿಫಲರಾಗಿದ್ದರು.