ಕೇರಳಂ ಸರ್ಕಾರದ 2026ರ ತಿರುವೋಣಂ ಬಂಪರ್ ಲಾಟರಿಯ 30 ಕೋಟಿ ರೂ. ಪ್ರಥಮ ಬಹುಮಾನ ವಿಜೇತರ ಘೋಷಣೆಯಾಗಿದೆ. ಶನಿವಾರ ತಿರುವನಂತಪುರದ ಗೋರ್ಕಿ ಭವನದಲ್ಲಿ ನಡೆದ ತಿರುವೋಣಂ ಬಂಪರ್ ಲಾಟರಿ ಡ್ರಾದಲ್ಲಿ ವಿಜೇತ ಸಂಖ್ಯೆಯನ್ನು ಪ್ರಕಟಿಸಲಾಯಿತು.

ತಿರುವನಂತಪುರದ ಗೋರ್ಕಿ ಭವನದಲ್ಲಿ ಡ್ರಾ ನಡೆಯಿತು. 5,34,470 ಜನರು 30 ಕೋಟಿ ರೂ.ಗಳಿಂದ 500 ರೂ.ಗಳವರೆಗಿನ ಬಹುಮಾನಗಳನ್ನು ಪಡೆಯಲಿದ್ದಾರೆ. ಒಟ್ಟು ಬಹುಮಾನದ ಮೊತ್ತ 125.54 ಕೋಟಿ ರೂಪಾಯಿಗಳಾಗಿವೆ. ಈ ಬಾರಿ ಪಾಲಕ್ಕಾಡ್ ಜಿಲ್ಲೆಯಲ್ಲಿ ಅತಿ ಹೆಚ್ಚು ಟಿಕೆಟ್‌ಗಳು ಮಾರಾಟವಾಗಿತ್ತು.

ಕಳೆದ ವರ್ಷದ 75 ಲಕ್ಷ ಟಿಕೆಟ್‌ಗಳು ಮಾರಾಟವಾಗಿದ್ದ ದಾಖಲೆಯನ್ನು ಲಾಟರಿ ಇಲಾಖೆ ಈ ಬಾರಿ ಮುರಿದಿದೆ. 500 ರೂಪಾಯಿ ಮುಖಬೆಲೆಯ 90 ಲಕ್ಷ ಟಿಕೆಟ್‌ ಮಾರಾಟವಾಗಿ ಈ ಬಾರಿ ದಾಖಲೆ ಬರೆದಿತ್ತು. ಇನ್ನು ಲಾಟರಿ ಟಿಕೆಟ್ ಮಾರಾಟದಿಂದಲೇ ಕೇರಳಂ ಸರ್ಕಾರ ಬರೋಬ್ಬರಿ 450 ಕೋಟಿ ರೂಪಾಯಿ ಗಳಿಸಿತ್ತು ಎನ್ನಲಾಗಿದೆ.

ತಿರುವೋಣಂ ಬಂಪರ್‌ನಲ್ಲಿ ಒಬ್ಬರಿಗೆ 30 ಕೋಟಿ ಬಂಪರ್ ಬಹುಮಾನ ಸಿಗಲಿದೆ. ಎರಡನೇ ಬಹುಮಾನ 1 ಕೋಟಿ ರೂಪಾಯಿ, ಇದನ್ನು 20 ಜನರಿಗೆ ನೀಡಲಾಗುವುದು. ಮೂರನೇ ಬಹುಮಾನ 25 ಲಕ್ಷ ರೂಪಾಯಿ, ಇದನ್ನು 20 ಜನರಿಗೆ ನೀಡಲಾಗುವುದು. ನಾಲ್ಕನೇ ಬಹುಮಾನ 5 ಲಕ್ಷ ರೂಪಾಯಿ, ಇದನ್ನು 10 ಜನರಿಗೆ ನೀಡಲಾಗುವುದು. ಐದನೇ ಬಹುಮಾನ 2 ಲಕ್ಷ ರೂಪಾಯಿ, ಇದನ್ನು 10 ಜನರಿಗೆ ನೀಡಲಾಗುವುದು. 5,000, 2,000, 1,000 ಮತ್ತು 500 ರೂಪಾಯಿಗಳ ಬಹುಮಾನಗಳೂ ಇವೆ.

ಅಂದಹಾಗೆ ಮೂಲಗಳ ಪ್ರಕಾರ ಕಣ್ಣೂರು ಜಿಲ್ಲೆಯ ಚಕ್ಕರಕ್ಕಲ್‌ನಲ್ಲಿರುವ ಲಾಟರಿ ಏಜೆನ್ಸಿ ಮೂಲಕ ಮಾರಾಟವಾದ TL 360615 ಎಂಬ ಸಂಖ್ಯೆಯ ಟಿಕೆಟ್‌ಗೆ 30 ಕೋಟಿ ರೂಪಾಯಿ ಬಂಪರ್ ಬಹುಮಾನ ಲಭಿಸಿದೆ.

ಮೂಲಗಳ ಪ್ರಕಾರ 30 ಕೋಟಿ ರೂಪಾಯಿ ಬಂಪರ್ ಬಹುಮಾನ ಪಡೆದವರು ಯಾರು ಎಂಬ ಮಾಹಿತಿ ಇದುವರೆಗೂ ಲಭ್ಯವಾಗಿಲ್ಲ. ಪ್ರಥಮ ಬಹುಮಾನ ಪಡೆದ ಟಿಕೆಟ್‌ದಾರರು ಕೇರಳಂ ಲಾಟರಿ ಇಲಾಖೆಯ ನಿಯಮಾನುಸಾರ ಮೂಲ ಟಿಕೆಟ್ ಹಾಗೂ ಅಗತ್ಯ ಗುರುತಿನ ದಾಖಲೆಗಳೊಂದಿಗೆ ಬಹುಮಾನ ಮೊತ್ತವನ್ನು ಕ್ಲೇಮ್ ಮಾಡಬೇಕಾಗುತ್ತದೆ. ಬಹುಮಾನ ಮೊತ್ತಕ್ಕೆ ಅನ್ವಯವಾಗುವ ತೆರಿಗೆ ಹಾಗೂ ಇತರ ಕಡಿತಗಳ ಬಳಿಕ ವಿಜೇತರಿಗೆ ಹಣ ಪಾವತಿಯಾಗಲಿದೆ.