Last Updated:
ಲಡಾಖ್ನ ಡೇಮ್ಚೋಕ್ನಲ್ಲಿ ಭಾರತೀಯ ಸೇನೆಗೆ ಸೆರೆ ಸಿಕ್ಕಿರುವ ಪಿಎಲ್ಎ ಸೈನಿಕ, ಕಳೆದುಹೋದ ತನ್ನ ಜಾನುವಾರನ್ನು ಹುಡುಕಿಕೊಂಡು ಭಾರತದ ಭಾಗಕ್ಕೆ ಬಂದಿದ್ದಾಗಿ ಹೇಳುತ್ತಿರುವುದು ತಿಳಿದುಬಂದಿದೆ.
ನವದೆಹಲಿ(ಅ. 19): ಭಾರತ ಮತ್ತು ಚೀನಾ ಸೈನಿಕರ ಸಂಘರ್ಷದ ಬಳಿಕ ಸೂಕ್ಷ್ಮವಾಗಿರುವ ಲಡಾಖ್ನಲ್ಲಿ ಇದೀಗ ಚೀನಾದ ಪಿಎಲ್ಎ ಪಡೆಯ ಒಬ್ಬ ಸೈನಿಕ ಸೆರೆ ಸಿಕ್ಕಿದ್ದಾನೆ. ಲಡಾಖ್ನ ಡೇಮ್ಚೋಕ್ ಪ್ರದೇಶದ ಬಳಿ ಪಿಎಲ್ಎ ಸೈನಿಕನನ್ನ ಸೆರೆ ಹಿಡಿಯಲಾಗಿದೆ ಎಂದು ಭಾರತೀಯ ಸೇನೆ ಹೇಳೀದೆ. ಪಿಎಲ್ಎ ಸೇನೆಯ 6ನೇ ಇನ್ಫಾಂಟ್ರಿ ಡಿವಿಶನ್ಗೆ ಸೇರಿದ ಸೈನಿಕ ಆತನಾಗಿರುವುದ ಸದ್ಯಕ್ಕೆ ತಿಳಿದುಬಂದಿರುವ ಮಾಹಿತಿ. ಆ ಚೀನೀ ಸೈನಿಕನ ಬಳಿ ಮಿಲಿಟರಿ ಮತ್ತು ನಾಗರಿಕ ದಾಖಲೆಗಳು ಸಿಕ್ಕಿದ್ದು, ಆತ ಗೂಢಚಾರಿಕೆಗೆ ಬಂದಿದ್ದನಾ ಎಂಬುದು ಗೊತ್ತಿಲ್ಲ. ಆತನನ್ನು ವಿಚಾರಣೆ ನಡೆಸಲಾಗುತ್ತಿದೆ ಎಂದು ಭಾರತೀಯ ಸೇನಾ ಮೂಲಗಳು ತಿಳಿಸಿವೆ.
ಭಾನುವಾರ ರಾತ್ರಿ ಈ ಬೆಳವಣಿಗೆ ಆಗಿದೆ. ಆ ಚೀನೀ ಸೈನಿಕ ಹೇಳಿರುವ ಪ್ರಕಾರ ಆತ ಕಳೆದುಹೋದ ತನ್ನ ಯಾಕ್ (ಹಸು ರೀತಿಯ ಪ್ರಾಣಿ) ಅನ್ನು ಹುಡುಕುತ್ತಾ ಭಾರತದ ಭಾಗಕ್ಕೆ ಬಂದಿದ್ದನಂತೆ. ಮಿಲಿಟರಿ ಮತ್ತು ಸಿವಿಲ್ ಡಾಕ್ಯುಮೆಂಟ್ ಹೊರತುಪಡಿಸಿ ಆತನ ಬಳಿ ಯಾವುದೇ ಆಯುಧ ಕಂಡುಬಂದಿಲ್ಲ. “ಆತ ಪ್ರಮಾದವಶಾತ್ ಭಾರತದ ಭಾಗಕ್ಕೆ ಬಂದಿದ್ದರೆ ಸೇನಾ ನಿಯಮದ ಪ್ರಕಾರ ಅವರನ್ನು ಚೀನಾ ಗಡಿಭಾಗಕ್ಕೆ ವಾಪಸ್ ಕಳುಹಿಸಿಕೊಡುತ್ತೇವೆ” ಎಂದು ಸೇನಾ ಮೂಲಗಳು ಸ್ಪಷ್ಟಪಡಿಸಿವೆ. ಈ ಘಟನೆ ಸಂಬಂಧ ಸದ್ಯದಲ್ಲೇ ಭಾರತೀಯ ಸೇನೆಯಿಂದ ಅಧಿಕೃತ ಹೇಳಿಕೆ ಪ್ರಕಟವಾಗುವ ನಿರೀಕ್ಷೆ ಇದೆ.
