“ಭಾರತದ ಸೇನಾ ಪಡೆಗಳು ನಮ್ಮ ಗಡಿಗಳ ರಕ್ಷಣೆ ಮಾಡುವ ಸಂಪೂರ್ಣ ಸಾಮರ್ಥ್ಯ ಹೊಂದಿವೆ. ಇವತ್ತು ಇಡೀ ದೇಶ ಪ್ರಾಣ ಕಳೆದುಕೊಂಡ ಸೈನಿಕರ ಕುಟುಂಬಗಳ ಜೊತೆ ನಿಂತಿದೆ. ಒಂದು ಕಡೆ ಇಡೀ ವಿಶ್ವವನ್ನೇ ಕೊರೊನಾ ಮಹಾಮಾರಿಗೆ ಸಿಲುಕಿಸಿರುವ ಚೀನಾ, ಇನ್ನೊಂದು ಕಡೆ ಭಾರತದ ಭೂಮಿಯನ್ನು ಅತಿಕ್ರಮಣ ಮಾಡಲು ಸಂಚುಮಾಡುತ್ತಿದೆ. ಚೀನಾಕ್ಕೆ ಆರ್ಥಿಕ ಪೆಟ್ಟು ಕೂಡಲೇಬೇಕು. ಚೀನಾದ ವಸ್ತುಗಳ ಬಳಕೆ ಮತ್ತು ಆಮದನ್ನ ಕೇಂದ್ರ ಸರಕಾರ ನಿಲ್ಲಿಸಬೇಕು. ಚೀನಾದ ಕಂಪನಿಗಳಿಗೆ ಸಾವಿರಾರು ಕೋಟಿ ರೂಪಾಯಿಗಳ ಟೆಂಡರುಗಳು ಸಿಗದೇ ಇರುವ ಹಾಗೆ ಕೇಂದ್ರ ಸರಕಾರ ಕ್ರಮ ಕೈಗೊಳ್ಳಬೇಕು. ವಿಶ್ವದ ಬೇರೆ ರಾಷ್ಟ್ರಗಳು ಕೂಡ ಚೀನಾದ ಮೇಲೆ ಆರ್ಥಿಕ ಒತ್ತಡ ತರಲು ಮತ್ತು ಚೀನಾದಿಂದ ಆಮದು ಬಹಿಷ್ಕಾರ ಹಾಕಲು ಭಾರತ ಸರಕಾರ ಗಂಭೀರ ರಾಜತಾಂತ್ರಿಕ ಪ್ರಯತ್ನ ನಡೆಸಬೇಕು. ಅದೂ ಅಲ್ಲದೆ, ಗಡಿ ರಾಷ್ಟ್ರಗಳ ಕುರಿತು ಭಾರತ ಸರಕಾರ ಈಗಲಾದರೂ ಒಂದು ಸಮರ್ಪಕ ನೀತಿ ರೂಪಿಸ ಬೇಕು” ಎಂದು ಈ ಸಂದರ್ಭದಲ್ಲಿ ಮಾತನಾಡಿದ ಎಎಪಿ ಧಾರವಾಡ ಜಿಲ್ಲಾ ಅಧ್ಯಕ್ಷ ಸಂತೋಷ್ ನರಗುಂದ ಅಭಿಪ್ರಾಯಪಟ್ಟರು.

ಜೂನ್ 15, ಸೋಮವಾರ ರಾತ್ರಿ, ಲಡಾಖ್ ಪ್ರದೇಶದ ಗಾಲ್ವನ್ ಕಣಿವೆಯಲ್ಲಿ ಭಾರತ ಮತ್ತು ಚೀನಾ ದೇಶದ ಸೈನಿಕ ತುಕಡಿಗಳ ನಡುವೆ ನಡೆದ ಸಂಘರ್ಷದಲ್ಲಿ ಭಾರತದ ಇಪ್ಪತ್ತು ಸೈನಿಕರು ಸಾವನ್ನಪ್ಪಿರುವುದು ನಮಗೆಲ್ಲ ದೊಡ್ಡ ಆಘಾತ ಉಂಟು ಮಾಡಿದೆ. ಹಿಮದ ಮೈ ಕೊರೆಯುವ ಚಳಿಯನ್ನೂ ಲೆಕ್ಕಿಸದೆ ಈ ಸೈನಿಕರು ತಮ್ಮ ಪ್ರಾಣದ ಹಂಗು ತೊರೆದು ತಮ್ಮ ತಾಯ್ನಾಡಿಗಾಗಿ ಹೋರಾಡಿ ವೀರ ಸ್ವರ್ಗವನ್ನೇರಿದ್ದಾರೆ ಎಂದು ನೆರೆದಿದ್ದ ಗಣ್ಯರು ಸ್ಮರಿಸಿದ್ರು.

ಪ್ರತಿಭಾ ದಿವಾಕರ್, ಶಶಿಕುಮಾರ್ ಸುಳ್ಳದ, ತ್ಯಾಗರಾಜ ಅಲ್ಲಂಪಟ್ಟಿ, ಶಿವಲಿಂಗಪ್ಪ ಜಡೆಣ್ಣವರ, ಶಿವಕುಮಾರ, ಮೆಹಬೂಬ್ ಹರವಿ, ವಿಜಯ ಸಾಯಿ, ಲಕ್ಷ್ಮಣ ರಾಠೋಡ, ನವೀನ ರಜಪೂತ ಸೇರಿದಂತೆ ಪಕ್ಷದ ಅನೇಕ ಮುಖಂಡರು ಹಾಗು ಕಾರ್ಯಕರ್ತರು ಉಪಸ್ಥಿತರಿದ್ದರು.