ಹೌದು, ತಂದೆ ಸಾಯುವ ಮುನ್ನ ನೀಡಿದ್ದ ಒಂದೇ ಒಂದು ಮಾತನ್ನು ಉಳಿಸಿಕೊಳ್ಳಲು ಹೋಗಿ ತನ್ನ ಸ್ವಂತ ಭವಿಷ್ಯ, ಯೌವನ ಹಾಗೂ ನೆಮ್ಮದಿಯನ್ನೇ ಪಣಕ್ಕಿಟ್ಟ ಯುವಕನೊಬ್ಬನ ಕರುಣಾಜನಕ ಕಥೆಯೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದೆ. ಇದು ಕೇವಲ ಒಂದು ಕುಟುಂಬದ ಕಥೆಯಲ್ಲ, ಬದಲಾಗಿ ಕೌಟುಂಬಿಕ ಜವಾಬ್ದಾರಿಗಳಿಗಾಗಿ ತಮ್ಮ ಕನಸುಗಳನ್ನು ಸಾಯಿಸಿಕೊಳ್ಳುವ ಅಸಂಖ್ಯಾತ ಯುವಕರ ವಾಸ್ತವದ ಕನ್ನಡಿಯಾಗಿದೆ.

ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿರುವ ವಿಡಿಯೋದಲ್ಲಿ ಯುವಕನೊಬ್ಬ ತನ್ನ ಜೀವನದ ಕಟು ಸತ್ಯವನ್ನು ಬಿಚ್ಚಿಟ್ಟಿದ್ದಾನೆ. ಆತನ ಕುಟುಂಬದಲ್ಲಿ ಒಟ್ಟು 10 ಜನ ಸಹೋದರಿಯರಿದ್ದಾರೆ. ಬಹಳ ವರ್ಷಗಳಿಂದ ಗಂಡು ಮಗನಿಗಾಗಿ ಹಂಬಲಿಸುತ್ತಿದ್ದ ತಂದೆಗೆ ಕೊನೆಗೂ ಈತ ಜನಿಸಿದ್ದ. ಮಗ ಹುಟ್ಟಿದನೆಂಬ ಕುಟುಂಬದ ಸಂತೋಷ ಹೆಚ್ಚು ದಿನ ಉಳಿಯಲಿಲ್ಲ. ಯಾಕಂದ್ರೆ, ಮಗನಿಗೆ ಸ್ವಲ್ಪ ವಯಸ್ಸಾಗುತ್ತಿದ್ದಂತೆಯೇ ತಂದೆಗೆ ಕ್ಯಾನ್ಸರ್‌ನಂತಹ ಗಂಭೀರ ಕಾಯಿಲೆ ಆವರಿಸಿತು. ತನ್ನ ಅಂತ್ಯ ಹತ್ತಿರವಾಗಿದೆ ಎಂದು ಅರಿತ ತಂದೆ, ಸಾವಿಗೂ ಮುನ್ನ ಮಗನನ್ನು ಬಳಿ ಕರೆದು ಭಾಷೆಯೊಂದನ್ನು ತೆಗೆದುಕೊಂಡರು.

ತಂದೆಗೆ ಕೊಟ್ಟ ಮಾತಿನಂತೆ ಈ ಯುವಕ ಈಗಾಗಲೇ ತನ್ನ ಮೂವರು ಸಹೋದರಿಯರ ವಿವಾಹವನ್ನು ಅದ್ಧೂರಿಯಾಗಿಯೇ ನೆರವೇರಿಸಿದ್ದಾನೆ. ಆದರೆ ಈ ಜವಾಬ್ದಾರಿ ಆತನನ್ನು ಆರ್ಥಿಕವಾಗಿ ಸಂಪೂರ್ಣ ಹೈರಾಣಾಗಿಸಿದೆ. ಮೂರು ಮದುವೆಗಳ ಸಮಾರಂಭ, ಉಡುಗೊರೆ ಹಾಗೂ ಇತರ ಖರ್ಚುಗಳಿಂದಾಗಿ ಆತ ಈಗಾಗಲೇ ಬರೋಬ್ಬರಿ 35 ಲಕ್ಷ ರೂಪಾಯಿ ಸಾಲದ ಸುಳಿಯಲ್ಲಿ ಸಿಲುಕಿದ್ದಾನೆ. ಇದಕ್ಕಿಂತ ಆತಂಕದ ವಿಚಾರವೆಂದರೆ, ಇನ್ನೂ ಏಳು ಜನ ಸಹೋದರಿಯರ ಮದುವೆ ಬಾಕಿ ಇದೆ. ಮುಂಬರುವ ವರ್ಷಗಳಲ್ಲಿ ಈ ಎಲ್ಲಾ ಮದುವೆಗಳನ್ನು ಮುಗಿಸಲು ಆತನಿಗೆ ಇನ್ನೂ 20 ರಿಂದ 30 ಲಕ್ಷ ರೂಪಾಯಿಗಳ ಅಗತ್ಯವಿದೆ. ತಂದೆಯ ಮಾತನ್ನು ಈಡೇರಿಸುವ ಛಲದಲ್ಲಿ ಆತನ ಸಾಲದ ಹೊರೆ ಬೆಟ್ಟದಷ್ಟು ಬೆಳೆಯುತ್ತಲೇ ಇದೆ.

ವಿಡಿಯೋದಲ್ಲಿ ನಗುತ್ತಲೇ ತನ್ನ ಕಷ್ಟಗಳನ್ನು ಹೇಳಿಕೊಳ್ಳುವ ಈ ಯುವಕ, ಸಹೋದರಿಯರ ಮದುವೆ ಮುಗಿದ ಬಳಿಕ ನನ್ನ ಮದುವೆಯ ಬಗ್ಗೆ ಯೋಚಿಸುತ್ತೇನೆ ಎಂದಿದ್ದಾನೆ. ಅಷ್ಟೆಲ್ಲಾ ಸಾಲ ತೀರಿಸಿ ನಾನು ಮದುವೆಯಾಗುವಷ್ಟರಲ್ಲಿ ನನಗೆ 60 ರಿಂದ 70 ವರ್ಷ ವಯಸ್ಸಾಗಿರುತ್ತದೆ ಎಂದು ಆತ ತಮಾಷೆಯಾಗಿ ಹೇಳಿದರೂ, ಆ ನಗುವಿನ ಹಿಂದೆ ಅಡಗಿರುವ ನೋವು ನೋಡುಗರ ಕಣ್ಣಂಚು ಒದ್ದೆಯಾಗುವಂತೆ ಮಾಡುತ್ತದೆ. ಈ ವಿಡಿಯೋ ನೋಡಿದ ನೆಟ್ಟಿಗರು ಮಿಶ್ರ ಪ್ರತಿಕ್ರಿಯೆ ನೀಡುತ್ತಿದ್ದಾರೆ. ಕೆಲವರು ಆತನ ಜವಾಬ್ದಾರಿಯನ್ನು ಕೊಂಡಾಡಿದರೆ, ಇನ್ನು ಕೆಲವರು ಕುಟುಂಬಕ್ಕಾಗಿ ಸ್ವಂತ ಜೀವನವನ್ನೇ ಹಾಳುಮಾಡಿಕೊಳ್ಳುವುದು ಎಷ್ಟರಮಟ್ಟಿಗೆ ಸರಿ ಎಂದು ಪ್ರಶ್ನಿಸುತ್ತಿದ್ದಾರೆ.