Last Updated:
ವೈಭವ್ ಇದುವರೆಗೆ ಭಾರತಕ್ಕಾಗಿ ಕೇವಲ ಆರು ಟಿ20 ಅಂತರರಾಷ್ಟ್ರೀಯ ಪಂದ್ಯಗಳನ್ನು ಆಡಿದ್ದಾರೆ. ಕೇವಲ 6 ಪಂದ್ಯಗಳನ್ನಾಡಿದರೂ ಹಲವಾರು ದಾಖಲೆಗಳನ್ನ ಮುರಿದಿದ್ದಾರೆ. ವೈಭವ್ರನ್ನ ವಿಂಡೀಸ್ ದಿಗ್ಗಜ ಕ್ರಿಸ್ ಗೇಲ್ಗೆ ಹೋಲಿಕೆ ಮಾಡಲಾಗುತ್ತದೆ. ಹಾಗಾಗಿ ಅವರನ್ನ ಬೇಬಿ ಬಾಸ್ ಎಂದೇ ಕರೆಯಲಾಗುತ್ತದೆ.
ಇತ್ತೀಚಿನ ದಿನಗಳಲ್ಲಿ ಅಂತರರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಹೆಚ್ಚು ಚರ್ಚೆಯಾಗುತ್ತಿರುವ ಒಂದು ಹೆಸರು ಇದ್ದರೆ, ಅದು ವೈಭವ್ ಸೂರ್ಯವಂಶಿ (Vaibhav Sooryavanshi). ಈ 15 ವರ್ಷದ ಬ್ಯಾಟ್ಸ್ಮನ್ ತಮ್ಮ ಸ್ಫೋಟಕ ಬ್ಯಾಟಿಂಗ್ ಮೂಲಕ ವಿಶ್ವ ಕ್ರಿಕೆಟ್ ಅನ್ನು ಬಿರುಗಾಳಿಯಂತೆ ಆವರಿಸಿಕೊಂಡಿದ್ದಾರೆ. ಅತ್ಯಂತ ಕಿರಿಯ ವಯಸ್ಸಿನಲ್ಲಿ ಭಾರತಕ್ಕೆ ಪದಾರ್ಪಣೆ ಮಾಡುವ ಮೂಲಕ ಇತಿಹಾಸ ನಿರ್ಮಿಸಿದ ವೈಭವ್ ಸೂರ್ಯವಂಶಿ ಇತ್ತೀಚೆಗೆ ಜಿಂಬಾಬ್ವೆ ವಿರುದ್ಧದ ಟಿ20 ಸರಣಿಯಲ್ಲಿ ತಮ್ಮ ಸ್ಫೋಟಕ ಬ್ಯಾಟಿಂಗ್ ಮೂಲಕ ಸಂಚಲನ ಮೂಡಿಸಿದ್ದರು, ಹಲವಾರು ವಿಶ್ವ ದಾಖಲೆಗಳನ್ನು ಮುರಿದ್ದರು.
ವೈಭವ್ ಇದುವರೆಗೆ ಭಾರತಕ್ಕಾಗಿ ಕೇವಲ ಆರು ಟಿ20 ಅಂತರರಾಷ್ಟ್ರೀಯ ಪಂದ್ಯಗಳನ್ನು ಆಡಿದ್ದಾರೆ. ಕೇವಲ 6 ಪಂದ್ಯಗಳನ್ನಾಡಿದರೂ ಹಲವಾರು ದಾಖಲೆಗಳನ್ನ ಮುರಿದಿದ್ದಾರೆ. ವೈಭವ್ರನ್ನ ವಿಂಡೀಸ್ ದಿಗ್ಗಜ ಕ್ರಿಸ್ ಗೇಲ್ಗೆ ಹೋಲಿಕೆ ಮಾಡಲಾಗುತ್ತದೆ. ಹಾಗಾಗಿ ಅವರನ್ನ ಬೇಬಿ ಬಾಸ್ ಎಂದೇ ಕರೆಯಲಾಗುತ್ತದೆ. ಆದ್ದರಿಂದ ಇಂದು, ವೈಭವ್ ಸೂರ್ಯವಂಶಿ ಮತ್ತು ಕ್ರಿಸ್ ಗೇಲ್ ಅವರನ್ನು ಹೋಲಿಸಿ ಅವರ ಮೊದಲ ಆರು ಟಿ20 ಅಂತರರಾಷ್ಟ್ರೀಯ ಪಂದ್ಯಗಳ ನಂತರ ಯಾರು ಉತ್ತಮ ಅಂಕಿಅಂಶಗಳನ್ನು ಹೊಂದಿದ್ದಾರೆಂದು ನೋಡೋಣ.
ವೈಭವ್ ಸೂರ್ಯವಂಶಿ ಮ್ಯಾಂಚೆಸ್ಟರ್ ಮೈದಾನದಲ್ಲಿ ಇಂಗ್ಲೆಂಡ್ ವಿರುದ್ಧ ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ಪಾದಾರ್ಪಣೆ ಮಾಡಿದರು. ಆದರೆ, ಆ ಇನ್ನಿಂಗ್ಸ್ನಲ್ಲಿ 14 ರನ್ ಗಳಿಸಿದ ನಂತರ ಅವರು ಔಟಾದರು. ಇಂಗ್ಲೆಂಡ್ನಲ್ಲಿ ಆಡಿದ ಅವರ ಮುಂದಿನ ಎರಡು ಪಂದ್ಯಗಳಲ್ಲಿ, ಅವರ ಬ್ಯಾಟ್ ಉತ್ತಮವಾಗಿ ಕಾರ್ಯನಿರ್ವಹಿಸಲಿಲ್ಲ. ವೈಭವ್ ಕ್ರಮವಾಗಿ 13 ಮತ್ತು 15 ರನ್ ಗಳಿಸಿದ ನಂತರ ಔಟಾದರು. ಇದಾದ ನಂತರ ಜಿಂಬಾಬ್ವೆ ಪ್ರವಾಸ ಕೈಗೊಂಡು, ಅಲ್ಲಿ ಮೂರು ಟಿ20 ಪಂದ್ಯಗಳ ಸರಣಿಯಲ್ಲಿ ವೈಭವ್ ಬೌಲರ್ಗಳನ್ನು ಧೂಳೀಪಟ ಮಾಡಿದರು. ವೈಭವ್ ಎರಡು ಅರ್ಧಶತಕಗಳೊಂದಿಗೆ ಸರಣಿಯ ಅತಿ ಹೆಚ್ಚು ರನ್ ಗಳಿಸಿದ ಆಟಗಾರರಾದರು. ಅವರು ಮೂರು ಇನ್ನಿಂಗ್ಸ್ಗಳಲ್ಲಿ ಕ್ರಮವಾಗಿ 50, 20, 81 ರನ್ ಗಳಿಸಿ ಸರಣಿ ಶ್ರೇಷ್ಠ ಪ್ರಶಸ್ತಿ ಪಡೆದರು.
ವೆಸ್ಟ್ ಇಂಡೀಸ್ನ ದಂತಕಥೆ ಬ್ಯಾಟ್ಸ್ಮನ್ ಕ್ರಿಸ್ ಗೇಲ್ ಬಗ್ಗೆ ಹೇಳುವುದಾದರೆ, ಅವರು ತಮ್ಮ ಮೊದಲ ಟಿ20ಐ ಪಂದ್ಯವನ್ನು ನ್ಯೂಜಿಲೆಂಡ್ನ ಆಕ್ಲೆಂಡ್ನಲ್ಲಿ ಆಡಿದ್ದರು. ಮೊದಲ ಪಂದ್ಯದಲ್ಲಿ ಕೇವಲ 10 ರನ್ಗಳಿಸಿದ್ದರು. ತಮ್ಮ 2ನೇ ಪಂದ್ಯದಲ್ಲಿ ಕೇವಲ 5 ರನ್ಗಳಿಸಿದ್ದರು. ಆದರೆ ಮುಂದಿನ ಎರಡು ಪಂದ್ಯಗಳಲ್ಲಿ ದೊಡ್ಡ ಇನ್ನಿಂಗ್ಸ್ಗಳನ್ನು ಆಡುವ ಮೂಲಕ, ಅಂತರರಾಷ್ಟ್ರೀಯ ಟಿ20ಗೆ ತಾವೇ ಬಾಸ್ ಎಂದು ಗೇಲ್ ತೋರಿಸಿಕೊಟ್ಟಿದ್ದರು. ತಮ್ಮ ಮೂರನೇ ಟಿ20ಐನಲ್ಲಿ, ಗೇಲ್ ಅರ್ಧಶತಕ (61) ಮತ್ತು ನಂತರ ನಾಲ್ಕನೇ ಪಂದ್ಯದಲ್ಲಿ ಶತಕ (117) ಗಳಿಸಿದ್ದರು. ಇದು ಟಿ20 ಕ್ರಿಕೆಟ್ನ ಚೊಚ್ಚಲ ಶತಕವಾಗಿತ್ತು. ಆರನೇ ಪಂದ್ಯದಲ್ಲಿ, ಗೇಲ್ ಮತ್ತೆ ಅರ್ಧಶತಕ ಗಳಿಸಿದರು. ಅಂದರೆ ಗೇಲ್ ಅರ್ಧಶತಕಗಳ ವಿಷಯದಲ್ಲಿ ವೈಭವ್ ಸೂರ್ಯವಂಶಿಗಿಂತ ಮುಂದಿದ್ದಾರೆ. ಮೊದಲ ಆರು ಪಂದ್ಯಗಳಲ್ಲಿ, ವೈಭವ್ ಎರಡು 50+ ಸ್ಕೋರ್ಗಳನ್ನು ಗಳಿಸಿದರೆ, ಗೇಲ್ ಮೂರು ಗಳಿಸಿದ್ದರು.
ಇಬ್ಬರ ರನ್ಗಳ ಬಗ್ಗೆ ಹೇಳುವುದಾದರೆ, ಗೇಲ್ 6 ಟಿ20 ಅಂತರರಾಷ್ಟ್ರೀಯ ಪಂದ್ಯಗಳನ್ನು ಆಡಿದ ನಂತರ 260 ರನ್ ಗಳಿಸಿದ್ದರು. ಆದರೆ ವೈಭವ್ 6 ಪಂದ್ಯಗಳ ನಂತರ 193 ರನ್ ಗಳಿಸಿದ್ದಾರೆ. ಇದರರ್ಥ ವೈಭವ್ ರನ್ಗಳ ವಿಷಯದಲ್ಲಿಯೂ ಗೇಲ್ಗಿಂತ ಹಿಂದುಳಿದಿದ್ದಾರೆ. ಸಿಕ್ಸರ್ಗಳನ್ನು ಹೋಲಿಸಿದರೆ, ಇಬ್ಬರ ನಡುವೆ ನಿಕಟ ಸ್ಪರ್ಧೆಯಾಗಿದೆ. ವೈಭವ್ 6 ಪಂದ್ಯಗಳಲ್ಲಿ 14 ಸಿಕ್ಸರ್ಗಳನ್ನು ಬಾರಿಸುವಲ್ಲಿ ಯಶಸ್ವಿಯಾಗಿದ್ದಾರೆ, ಆದರೆ ಗೇಲ್ ಅದೇ ಸಂಖ್ಯೆಯ ಪಂದ್ಯಗಳ ನಂತರ 16 ಸಿಕ್ಸರ್ಗಳನ್ನು ಬಾರಿಸಿದ್ದರು. ಇದರರ್ಥ ಗೇಲ್ ಈ ವಿಷಯದಲ್ಲೂ ವೈಭವ್ಗಿಂತ ಮುಂದಿದ್ದಾರೆ.
ಮತ್ತೊಂದು ಕುತೂಹಲಕಾರಿ ಅಂಕಿಅಂಶವೆಂದರೆ ವೈಭವ್ ಎಂದಿಗೂ ಡಕ್ ಔಟ್ ಆಗಿಲ್ಲ, ಆದರೆ ಗೇಲ್ ತನ್ನ 5ನೇ ಟಿ20 ಅಂತರರಾಷ್ಟ್ರೀಯ ಪಂದ್ಯದಲ್ಲಿ ಶೂನ್ಯಕ್ಕೆ ಔಟಾಗಿದ್ದರು. ವೈಭವ್ ತಾವಾಡಿರುವ ಎಲ್ಲಾ ಪಂದ್ಯಗಳಲ್ಲೂ ಎರಡಂಕಿ ದಾಟಿದ್ದಾರೆ.
