ಟ್ರಂಪ್ ಮತ್ತು ಜಾರ್ಜಿಯಾ ಮೆಲೋನಿ ನಡುವಿನ ಈ ಸಾರ್ವಜನಿಕ ಜಗಳವು ಅವರ ನಡುವಿನ ಸ್ನೇಹದಲ್ಲಿ ಗಮನಾರ್ಹ ಬಿಕ್ಕಟ್ಟು ಇರುವುದನ್ನು ಬಹಿರಂಗಪಡಿಸಿದೆ. ಈ ವರ್ಷದ ಆರಂಭದಲ್ಲಿ ಇರಾನ್ ಯುದ್ಧದ ಬಗ್ಗೆ ಇಟಲಿ ಅಮೆರಿಕಾ ವಿರುದ್ಧ ಭಿನ್ನಾಭಿಪ್ರಾಯ ವ್ಯಕ್ತಪಡಿಸಿದ ನಂತರ ಫ್ರಾನ್ಸ್‌ನಲ್ಲಿ ನಡೆದ G7 ಶೃಂಗಸಭೆಯ ಸಮಯದಲ್ಲಿ ಇದು ಸುಧಾರಿಸಿದಂತೆ ಕಂಡುಬಂದಿತ್ತು. ಆದರೆ ಟ್ರಂಪ್ ಬಾಲಿಶ ಹೇಳಿಕೆಯ ನಂತರ ಮತ್ತೆ ಸಂಬಂಧ ಹದಗೆಡುವ ಲಕ್ಷಣ ಕಂಡು ಬಂದಿದೆ.

ಮುಂದುವರಿದು ಮೆಲೋನಿ ಬಗ್ಗೆ ಮಾತನಾಡಿರುವ ಟ್ರಂಪ್, ‘ಅವಳು ನನ್ನೊಂದಿಗೆ ಫೋಟೋ ತೆಗೆಯಲು ಬೇಡಿಕೊಂಡಳು. ಅವಳು ನನ್ನೊಂದಿಗೆ ಫೋಟೋ ತೆಗೆಯಲು ತುಂಬಾ ಉತ್ಸುಕಳಾಗಿದ್ದಳು. ನನಗೆ ಆಸಕ್ತಿ ಇರಲಿಲ್ಲ, ಕೊನೆಗೆ ಅವಳು ಅಷ್ಟೊಂದು ಬೇಡಿಕೊಂಡಿದ್ದಕ್ಕೆ ಒಪ್ಪಿಕೊಂಡೆ. ’ ಎಂದು ಹೇಳಿದ್ದರು. ಇಟಾಲಿಯನ್ ಟಿವಿ ಚಾನೆಲ್ La7 ಚಾನೆಲ್ ಸಂದರ್ಶನದ ಡಬ್ಬಿಂಗ್ ಆವೃತ್ತಿಯನ್ನು ಮಾತ್ರ ಬಿಡುಗಡೆ ಮಾಡಿದೆ.

ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಮೆಲೋನಿ, ಟ್ರಂಪ್ ನೀಡಿರುವ ಹೇಳಿಕೆಯನ್ನು ಸಂಪೂರ್ಣವಾಗಿ ತಿರಸ್ಕರಿಸಿದರು, ಮತ್ತು ಅವರು ಕಟ್ಟುಕಥೆಯನ್ನು ಹೆಣೆದಿದ್ದಾರೆ ಎಂದು ಆರೋಪಿಸಿದರು. . ‘ಡೊನಾಲ್ಡ್ ಟ್ರಂಪ್ ಅವರ ಹೇಳಿಕೆಗಳು ಸಂಪೂರ್ಣವಾಗಿ ಕಟ್ಟುಕಥೆ. ನನಗೆ ನಿಜಕ್ಕೂ ಆಘಾತವಾಗಿದೆ. ಅಮೆರಿಕದ ಅಧ್ಯಕ್ಷರು ತಮ್ಮ ಮಿತ್ರರಾಷ್ಟ್ರಗಳನ್ನು ಏಕೆ ಈ ರೀತಿ ನಡೆಸಿಕೊಳ್ಳುತ್ತಾರೆಂದು ನನಗೆ ಅರ್ಥವಾಗುತ್ತಿಲ್ಲ, ಇದು ಮೊದಲ ಬಾರಿಗೆ ಸಂಭವಿಸ್ತಿರೋದು ಅಲ್ಲ’ ಎಂದು ಮೆಲೋನಿ ಕಿಡಿಕಾರಿದರು.

‘ಅವರು ತಮ್ಮ ನಾಯಕರನ್ನು ಹೆಚ್ಚು ಮೃದುವಾಗಿ ನಡೆಸಿಕೊಳ್ಳುತ್ತಿದ್ದರೂ, ಪಶ್ಚಿಮ ಮತ್ತು ಅಮೆರಿಕದ ಶತ್ರುಗಳ ಕಡೆಗೆ ಅದೇ ದೃಢತೆಯನ್ನು ತೋರಿಸದಿರುವುದು ನಿರಾಶಾದಾಯಕವಾಗಿದೆ ಎಂದು ನಾನು ಹೇಳಬಲ್ಲೆ’ ಎಂದು ಹೇಳಿರುವ ಮೆಲೋನಿ, ‘ಅವರು ಒಂದು ವಿಷಯವನ್ನು ನೆನಪಿನಲ್ಲಿಟ್ಟುಕೊಳ್ಳಬೇಕು, ನಾನು ಅಥವಾ ಇಟಲಿ ಎಂದಿಗೂ ಯಾರ ಮುಂದೆಯೂ ಬೇಡಿಕೊಳ್ಳುವುದಿಲ್ಲ’ ಎಂದು ಹೇಳಿದ್ದಾರೆ.

G7 ಶೃಂಗಸಭೆಯ ವೀಡಿಯೊ ತುಣುಕಿನಲ್ಲಿ ಮೆಲೋನಿ ಮತ್ತು ಟ್ರಂಪ್ ದೀರ್ಘ ಸಂಭಾಷಣೆ ನಡೆಸುತ್ತಿರುವುದನ್ನು ತೋರಿಸಲಾಗಿದೆ.