ಬಿಸಿಸಿಐ ಕೇಂದ್ರ ಒಪ್ಪಂದ ಹೊಂದಿರುವ ಅಗ್ರ ಆಟಗಾರರಿಗೆ ಶಾರೀರಿಕ ಮತ್ತು ಮಾನಸಿಕ ದಣಿವಾರಿಸಿಕೊಳ್ಳಲು ವರ್ಷದಲ್ಲಿ ಕನಿಷ್ಠ ಒಂದು ತಿಂಗಳ ಸಂಪೂರ್ಣ ವಿಶ್ರಾಂತಿಯನ್ನು ವೇಳಾಪಟ್ಟಿಯಲ್ಲಿ ಕಾಯ್ದಿರಿಸಬೇಕು. ಇದರಿಂದ ಆಟಗಾರರಲ್ಲಿ ಹೊಸತನ ಮತ್ತು ಮಾನಸಿಕ ದಣಿವು ಕಡಿಮೆಯಾಗುತ್ತದೆ. ಅಲ್ಲದೆ ಕ್ರಿಕೆಟ್ ಮೇಲಿನ ಆಸಕ್ತಿ ಕೂಡ ಅಭಿಮಾನಿಗಳಲ್ಲಿ ಹೆಚ್ಚಾಗುತ್ತದೆ. ಬಿಡುವಿಲ್ಲದೆ ನಡೆಯುವ ಕ್ರಿಕೆಟ್​​ನಿಂದ ಜನರಲ್ಲೂ ಆಸಕ್ತಿ ಕುಂದುತ್ತದೆ ಎಂದು ಗವಾಸ್ಕರ್ ವಾದಿಸಿದ್ದಾರೆ.

ಹಿರಿಯ ಆಟಗಾರರಿಗೆ ವಿಶ್ರಾಂತಿ ನೀಡುವ ಹೆಸರಿನಲ್ಲಿ ಪದೇ ಪದೇ ಹೊಸ ಆಟಗಾರರನ್ನು ರೊಟೇಷನ್ ಮಾಡಿ ಭಾರತ ತಂಡಕ್ಕೆ ಕರೆತರಲಾಗುತ್ತಿದೆ. ಇದರಿಂದ ಭಾರತ ತಂಡವನ್ನು ಪ್ರತಿನಿಧಿಸುವ ಗೌರವ ಮತ್ತು ಮೌಲ್ಯ ಕಡಿಮೆ ಆಗುತ್ತಿದೆ. ಯಾರೋ ಒಬ್ಬರು ವಿಶ್ರಾಂತಿ ಪಡೆದಿದ್ದಾರೆ ಎಂಬ ಕಾರಣಕ್ಕೆ ಸುಲಭವಾಗಿ ಭಾರತದ ಕ್ಯಾಪ್ ಸಿಗಬಾರದು, ಅದನ್ನು ಆಟಗಾರರು ಕಷ್ಟಪಟ್ಟು ಗಳಿಸಬೇಕು ಎಂದು ಗವಾಸ್ಕರ್ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಭಾರತ ತಂಡವು ಪ್ರತಿ ತಿಂಗಳೂ ಎಲ್ಲೋ ಒಂದು ಕಡೆ ಸತತವಾಗಿ ಪಂದ್ಯಗಳನ್ನು ಆಡುತ್ತಲೇ ಇರುತ್ತದೆ. ಇದರಿಂದಾಗಿ ಕ್ರಿಕೆಟ್ ಅಭಿಮಾನಿಗಳೂ ಕೂಡ ದಣಿದಿದ್ದಾರೆ. ಇದಕ್ಕ ಸ್ಪಷ್ಟ ನಿದರ್ಶನವೆಂದರೆ ಇತ್ತೀಚಿನ ಅಫ್ಘಾನಿಸ್ತಾನ ವಿರುದ್ಧದ ಪಂದ್ಯಗಳಲ್ಲಿ ಕ್ರೀಡಾಂಗಣಗಳು ಅರ್ಧದಷ್ಟು ಖಾಲಿ ಇದ್ದವು ಎಂದಿದ್ದಾರೆ. ಆದ್ದರಿಂದ ಅಭಿಮಾನಿಗಳ ಆಸಕ್ತಿ ಉಳಿಸಿಕೊಳ್ಳಲು ಅವರಿಗೂ ವಿರಾಮ ಬೇಕು ಎಂದಿದ್ದಾರೆ.

ಯುವ ಪ್ರತಿಭೆಗಳಿಗೆ ಅವಕಾಶ ನೀಡುವುದನ್ನು ತಾನು ಬೆಂಬಲಿಸುವುದಾಗಿ ಹೇಳಿರುವ ಗವಾಸ್ಕರ್, ಅದಕ್ಕಾಗಿ ‘ಭಾರತ ಎ’ ತಂಡ ಹಾಗೂ ಅಂಡರ್-19 ಪಂದ್ಯಗಳನ್ನು ಹೆಚ್ಚಾಗಿ ಆಯೋಜಿಸಬೇಕೇ ಹೊರತು, ಹಿರಿಯ ಆಟಗಾರರ ಸರಣಿಗಳಲ್ಲಿ ಪದೇ ಪದೇ ಇಡೀ ತಂಡವನ್ನೇ ಬದಲಾಯಿಸಬಾರದು ಎಂದು ಸಲಹೆ ನೀಡಿದ್ದಾರೆ. ಹೀಗೆ ಮಾಡುವುದರಿಂದ ಅವಕಾಶ ಸಿಕ್ಕಾಗ ಉತ್ತಮವಾಗಿ ಆಡಿದರೂ ಮುಂದಿನ ಸರಣಿಯಲ್ಲಿ ಹಿರಿಯ ಆಟಗಾರರು ಮರಳಿದಾಗ ಯುವ ಆಟಗಾರರನ್ನ ತಂಡದಿಂದ ಕೈಬಿಡುವುದು ಅವರ ಮನಸಿನ ಮೇಲೆ ದುಷ್ಪರಿಣಾಮ ಬೀರುತ್ತದೆ ಎಂದಿದ್ದಾರೆ.