Last Updated:
ತಮ್ಮ ಪೂರ್ವಜರ 10 ಎಕರೆ ಜಮೀನಿನಲ್ಲಿ ಚೇತನ್ ಮಾಡಿದ ಪ್ರಯೋಗವೇ ‘ರಂಬೂಟನ್ ಮತ್ತು ಮ್ಯಾಂಗೋಸ್ಟಿನ್’ ಕೃಷಿ. ಆರಂಭದಲ್ಲಿ ನೂರಾರು ಸಸಿಗಳನ್ನು ನೆಟ್ಟು, ಹಗಲಿರುಳು ಬೆವರು ಸುರಿಸಿ ಬೆಳೆಸಿದರು.
ದಕ್ಷಿಣ ಕನ್ನಡ: ಇಂದಿನ ಯುವಕರಿಗೆ ನಗರದ ಲೈಫ್ಸ್ಟೈಲ್ ಅಂದರೆ ಇಷ್ಟ. ಕೈತುಂಬಾ ಸಂಬಳ (Salary), ಎಸಿ ಆಫೀಸ್, ಐಷಾರಾಮಿ ಜೀವನ – ಇದಕ್ಕಾಗಿಯೇ ಕಷ್ಟಪಟ್ಟು ಓದಿ, ಸಾಫ್ಟ್ ವೇರ್ ಅಥವಾ ಇಂಜಿನಿಯರಿಂಗ್ ಉದ್ಯೋಗದ (Job) ಹಿಂದೆ ಓಡುತ್ತಾರೆ. ಆದರೆ, ದಕ್ಷಿಣ ಕನ್ನಡ (Dakshina Kannada) ಜಿಲ್ಲೆಯ ಸುಳ್ಯದ (Sulya) ಈ ಯುವಕ ಮಾತ್ರ ಹಾದಿ ತಪ್ಪಿದರೂ, ಅದು ತನ್ನ ಜೀವನಕ್ಕೆ ಅತಿದೊಡ್ಡ ‘ಬಂಪರ್’ ಅವಕಾಶವಾಗಿ ಬದಲಾಗಲಿದೆ ಎಂದು ಕನಸಲ್ಲೂ ಅಂದುಕೊಂಡಿರಲಿಲ್ಲ.
ಕೃಷಿಗೆ ಕೈಹಾಕಿದ ಇಂಜಿನಿಯರ್
ಮೆಕ್ಯಾನಿಕಲ್ ಇಂಜಿನಿಯರಿಂಗ್ ಪದವೀಧರರಾದ ಚೇತನ್ ಶೆಟ್ಟಿ, ಬೆಂಗಳೂರಿನ ಪ್ರತಿಷ್ಠಿತ ಕಂಪನಿಯೊಂದರಲ್ಲಿ ಏಳು ವರ್ಷಗಳ ಕಾಲ ದುಡಿದವರು. ಎಲ್ಲವೂ ಚೆನ್ನಾಗಿ ನಡೆಯುತ್ತಿತ್ತು, ಆದರೆ ಮನಸ್ಸಿನ ಮೂಲೆಯಲ್ಲಿ ಊರಿನ ಮಣ್ಣಿನ ಮೇಲಿನ ಪ್ರೀತಿ ಕಾಡುತ್ತಲೇ ಇತ್ತು. ಇನ್ನೊಬ್ಬರ ಕೈಕೆಳಗೆ ದುಡಿಯೋದಕ್ಕಿಂತ, ಸ್ವಂತ ಭೂಮಿಯಲ್ಲಿ ರಾಜನಾಗಿ ಬದುಕಬೇಕು ಎಂದು ನಿರ್ಧರಿಸಿ, ಬೆಂಗಳೂರಿನ ಲೈಫ್ಸ್ಟೈಲ್ಗೆ ಗುಡ್ಬೈ ಹೇಳಿ ಊರಿಗೆ ವಾಪಸ್ಸಾದರು.
ವಿದೇಶಿ ಹಣ್ಣುಗಳ ಕೃಷಿಯಲ್ಲಿ ಮ್ಯಾಜಿಕ್
ತಮ್ಮ ಪೂರ್ವಜರ 10 ಎಕರೆ ಜಮೀನಿನಲ್ಲಿ ಚೇತನ್ ಮಾಡಿದ ಪ್ರಯೋಗವೇ ‘ರಂಬೂಟನ್ ಮತ್ತು ಮ್ಯಾಂಗೋಸ್ಟಿನ್’ ಕೃಷಿ. ಆರಂಭದಲ್ಲಿ ನೂರಾರು ಸಸಿಗಳನ್ನು ನೆಟ್ಟು, ಹಗಲಿರುಳು ಬೆವರು ಸುರಿಸಿ ಬೆಳೆಸಿದರು. ಇವತ್ತು ಆ ಸಸಿಗಳು ಬಂಗಾರದ ಮೊಟ್ಟೆ ಇಡುವ ಮರಗಳಾಗಿವೆ. ಸುಮಾರು 350 ರಂಬೂಟನ್ ಮತ್ತು 150 ಮ್ಯಾಂಗೋಸ್ಟಿನ್ ಮರಗಳಿಂದ ಇವರು ಪ್ರತಿ ವರ್ಷ ಬರೋಬ್ಬರಿ 10 ರಿಂದ 15 ಟನ್ ಹಣ್ಣುಗಳನ್ನು ಪಡೆಯುತ್ತಿದ್ದಾರೆ. ಅಷ್ಟೇ ಅಲ್ಲ, ವಿದೇಶಿ ಹಣ್ಣುಗಳಾದ ಜಬೊಟಿಕಾಬ, ವೆಲ್ವೆಟ್ ಆಪಲ್ ಸಹ ಇಲ್ಲಿ ನಳನಳಿಸುತ್ತಿವೆ.
ವರ್ಷಕ್ಕೆ 15 ಲಕ್ಷ ಆದಾಯ
ಕೇವಲ ಫಸಲು ಬೆಳೆಯುವುದಷ್ಟೇ ಅಲ್ಲ, ಬೆಂಗಳೂರಿನ ಅಪಾರ್ಟ್ಮೆಂಟ್ಗಳಿಗೆ ಹೋಗಿ ಮಾರಾಟ ಮಾಡುವುದರಿಂದ ಹಿಡಿದು, ಇಂದು ದೇಶ-ವಿದೇಶಗಳಿಗೆ ಹಣ್ಣುಗಳನ್ನು ರಫ್ತು ಮಾಡುವ ಮಟ್ಟಕ್ಕೆ ಚೇತನ್ ಬೆಳೆದಿದ್ದಾರೆ. ಖರ್ಚುಗಳೆಲ್ಲಾ ಹೋಗಿ ವರ್ಷಕ್ಕೆ 15 ಲಕ್ಷ ರೂಪಾಯಿ ಲಾಭ ಗಳಿಸುತ್ತಿರುವ ಚೇತನ್, ಕೃಷಿ ನಷ್ಟದ ಉದ್ಯೋಗವಲ್ಲ, ಸರಿಯಾಗಿ ಮಾಡಿದರೆ ಇದಕ್ಕಿಂತ ಲಾಭದಾಯಕ ಕೆಲಸ ಮತ್ತೊಂದಿಲ್ಲ ಎಂದು ತೋರಿಸಿಕೊಟ್ಟಿದ್ದಾರೆ.
Location :
Dakshina Kannada,Karnataka
