ಒಡಿಶಾ ಮೂಲದ ಮಹಿಳೆಯೊಬ್ಬರು ತಮ್ಮ ಮ್ಯಾನೇಜರ್ ವಿರುದ್ಧ ಆರೋಪಿಸಿ, ಸೋಶಿಯಲ್ ಮೀಡಿಯಾದಲ್ಲಿ ಪೋಸ್ಟ್ ಹಾಕಿದ್ದಾರೆ. ಡೆಬ್ಲಿನಾ ಎಂದು ಗುರುತಿಸಲ್ಪಟ್ಟ ಮಹಿಳೆ, ಇನ್ಸ್ಟಾಗ್ರಾಮ್ನಲ್ಲಿ ಪೋಸ್ಟ್ ಮಾಡಿದ ವೀಡಿಯೊದ ಮೂಲಕ ತನ್ನ ಅನುಭವವನ್ನು ಹಂಚಿಕೊಂಡಿದ್ದಾರೆ. ಕ್ಲಿಪ್ನಲ್ಲಿ, ಅವರು ತಮ್ಮ ಆರೋಗ್ಯ ಹದಗೆಟ್ಟ ನಂತರ ಎರಡು ದಿನಗಳ ಅನಾರೋಗ್ಯ ರಜೆ ತೆಗೆದುಕೊಂಡಿದ್ದಾಗಿ ವಿವರಿಸಿದ್ದಾರೆ.

ಜ್ವರ ಕಡಿಮೆ ಆದ ನಂತರ ಅವರು ಕೆಲಸಕ್ಕೆ ಮರಳಿದಾಗ, ಅನಾರೋಗ್ಯ ರಜೆ ಅಧಿಸೂಚನೆಗಳಿಗೆ ಸಂಬಂಧಿಸಿದ ಹೊಸ ಕಚೇರಿ ನಿಯಮದ ಬಗ್ಗೆ ಅವರಿಗೆ ತಿಳಿಸಲಾಗಿದೆ ಎಂದು ವರದಿಯಾಗಿದೆ. ಡೆಬ್ಲಿನಾ ಪ್ರಕಾರ, ಮ್ಯಾನೇಜರ್ ಉದ್ಯೋಗಿಗಳಿಗೆ ಅನಾರೋಗ್ಯ ರಜೆಯನ್ನು ಸಹ ಹಿಂದಿನ ರಾತ್ರಿ ತಿಳಿಸಬೇಕೆಂದು ಸೂಚಿಸಿದ್ದರು ಎನ್ನಲಾಗಿದೆ.

ಕಚೇರಿ ನೀತಿಯ ಬಗ್ಗೆ ಮಾತನಾಡುತ್ತಾ, ನನ್ನ ಆರೋಗ್ಯ ಕೆಟ್ಟದಾಗಿತ್ತು, ಆದ್ದರಿಂದ ನಾನು ಎರಡು ದಿನಗಳ ಅನಾರೋಗ್ಯ ರಜೆ ತೆಗೆದುಕೊಂಡೆ. ಹಿಂತಿರುಗಿದ ನಂತರ, ನನ್ನ ಮ್ಯಾನೇಜರ್ ಹೊಸ ನಿಯಮವನ್ನು ಮಾಡಿದ್ದಾರೆ ಎಂದು ನನಗೆ ತಿಳಿದುಬಂದಿದೆ, ನೀವು ಅನಾರೋಗ್ಯ ರಜೆ ತೆಗೆದುಕೊಳ್ಳುತ್ತಿದ್ದರೂ ಸಹ, ಹಿಂದಿನ ರಾತ್ರಿ ಅವರಿಗೆ ತಿಳಿಸಬೇಕಂತೆ ಅಂತ ಡೆಬ್ಲಿನಾ ಆಕ್ರೋಶ ಹೊರಹಾಕಿದ್ದಾರೆ.

ಇದು ಹೇಗಾಗುತ್ತದೆ? ನಮ್ಮ ಆರೋಗ್ಯ ಹದಗೆಡಲಿದೆ ಎಂದು ನಮಗೆ ಏನಾದರೂ ಸೂಚನೆ ಬರುತ್ತದೆಯೇ? ಎಂದು ಡೆಬ್ಲಿನಾ ಪ್ರಶ್ನಿಸಿದ್ದಾರೆ ನನ್ನ ಜೀವನವನ್ನು ನಾನು ಅಷ್ಟು ನಿಖರವಾಗಿ ಊಹಿಸಲು ಸಾಧ್ಯವಾದರೆ, ಐಪಿಎಲ್‌ನಲ್ಲಿ ಭವಿಷ್ಯ ನುಡಿದು ನಾನು ಹಣ ಗಳಿಸುತ್ತಿರಲಿಲ್ಲವೇ? ನಾನು ಈ ಲಾಲಾ ಕಂಪನಿಯಲ್ಲಿ ಏಕೆ ಕೆಲಸ ಮಾಡಬೇಕು?” ಎಂದು ಅವರು ಮತ್ತಷ್ಟು ವ್ಯಂಗ್ಯವಾಡಿದ್ದಾರೆ.

“ಸ್ಪಷ್ಟವಾಗಿ ಜ್ವರಕ್ಕೂ ಈಗ ಪೂರ್ವಾನುಮತಿ ಬೇಕು” ಎಂಬ ಶೀರ್ಷಿಕೆಯೊಂದಿಗೆ ಕ್ಲಿಪ್ ಅನ್ನು ಅಪ್‌ಲೋಡ್ ಮಾಡಲಾಗಿತ್ತು. ಆ ವಿಡಿಯೋ ಕ್ಲಿಸ್ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಹಲವಾರು ಬಳಕೆದಾರರು ಕಾಮೆಂಟ್‌ ಮಾಡಿ, ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. “ಯೋಜಿತ” ಅನಾರೋಗ್ಯ ರಜೆಯ ಕಲ್ಪನೆಯನ್ನು ಅಪಹಾಸ್ಯ ಮಾಡಿದ್ದಾರೆ.