ಬಲೂಚಿಸ್ತಾನ್‌ನ ಗ್ವಾದರ್ ಬಳಿ ಇರುವ ಒಂದು ಆಧುನಿಕ ಸಂಸ್ಕರಣಾ ಘಟಕದಲ್ಲಿ ಪ್ರತಿದಿನ ನೂರಾರು ಕತ್ತೆಗಳನ್ನು ವಧೆ ಮಾಡಲಾಗುತ್ತಿದೆ. ಅವುಗಳ ಮಾಂಸ, ಎಲುಬು ಮತ್ತು ಮುಖ್ಯವಾಗಿ ಚರ್ಮವನ್ನು ಚೀನಾಕ್ಕೆ ರಫ್ತು ಮಾಡಲಾಗುತ್ತಿದೆ. ಸಾಂಪ್ರದಾಯಿಕವಾಗಿ ಸಾರಿಗೆ ಮತ್ತು ಕೃಷಿ ಕೆಲಸಕ್ಕೆ ಬಳಸುತ್ತಿದ್ದ ಪ್ರಾಣಿಗಳನ್ನು ಈಗ ವಿದೇಶಿ ವಿನಿಮಯ ಗಳಿಕೆಯ ಸಾಧನವಾಗಿ ಪರಿವರ್ತಿಸುತ್ತಿರುವ ಪಾಕಿಸ್ತಾನದ ಈ ಹೊಸ ವ್ಯಾಪಾರ ವಿಶ್ವದ ಗಮನ ಸೆಳೆದಿದೆ.

ಹ್ಯಾಂಗೆಂಗ್ ಗ್ರೂಪ್ ಎಂಬ ಚೀನೀ ಕಂಪನಿ ಗ್ವಾದರ್ ನಾರ್ತ್ ಫ್ರೀ ಝೋನ್‌ನಲ್ಲಿ ಕಸಾಯಿಖಾನೆ ಮತ್ತು ಸಂಸ್ಕರಣಾ ಸೌಲಭ್ಯವನ್ನು ನಿರ್ವಹಿಸುತ್ತಿದೆ. ಕಂಪನಿಯು ಕೆಲವೇ ತಿಂಗಳುಗಳಲ್ಲಿ ದೈನಂದಿನ ಸಾಮರ್ಥ್ಯವನ್ನು 800 ಕತ್ತೆಗಳಿಗೆ ಹೆಚ್ಚಿಸುವ ಯೋಜನೆ ಹೊಂದಿದೆ. ಆರು ವರ್ಷಗಳಲ್ಲಿ ಸುಮಾರು 50 ಮಿಲಿಯನ್ ಡಾಲರ್ ಹೂಡಿಕೆ ಮಾಡಿರುವ ಈ ಘಟಕದಲ್ಲಿ ಒಂಬತ್ತು ಚೀನೀ ವ್ಯವಸ್ಥಾಪಕರೊಂದಿಗೆ ಸುಮಾರು 500 ಸ್ಥಳೀಯ ಕಾರ್ಮಿಕರು ಕೆಲಸ ಮಾಡುತ್ತಿದ್ದಾರೆ.

ಪ್ರತಿ ಕತ್ತೆಗಳಿಗೂ ಟ್ಯಾಗ್ ಹಾಕಿ ಪತ್ತೆಹಚ್ಚುವ ವ್ಯವಸ್ಥೆ ಇದೆ. ಪ್ರಸ್ತುತ 11 ಪೂರೈಕೆದಾರ ಏಜೆನ್ಸಿಗಳು ಕತ್ತೆಗಳನ್ನು ತರಲಾಗುತ್ತಿದ್ದು, ನಂತರ 50 ಸಾಕಣೆ ಕೇಂದ್ರಗಳಿಗೆ ವಿಸ್ತರಿಸುವ ಗುರಿ ಇದೆ ಅಂತ ಫಸ್ಟ್ ಪೋಸ್ಟ್ ವರದಿ ಮಾಡಿದೆ.

ಈ ವ್ಯಾಪಾರದ ಮೂಲಕೇಂದ್ರ ಕೇವಲ ಕತ್ತೆ ಮಾಂಸವಲ್ಲ. ಕತ್ತೆ ಚರ್ಮವನ್ನು ಕುದಿಸಿ ಹೊರತೆಗೆಯುವ ಕಾಲಜನ್‌ನಿಂದ ತಯಾರಿಸುವ ಎಜಿಯಾವೊ ಸಾಂಪ್ರದಾಯಿಕ ಚೀನೀ ಔಷಧದಲ್ಲಿ ಪ್ರಮುಖ ಸ್ಥಾನ ಹೊಂದಿದೆ. ಇದನ್ನು ರಕ್ತದ ಟಾನಿಕ್ ಆಗಿ, ರೋಗನಿರೋಧಕ ಶಕ್ತಿ ಹೆಚ್ಚಿಸಲು ಮತ್ತು ನಿದ್ರೆಗೆ ಸಹಾಯಕವಾಗಿ ಬಳಸಲಾಗುತ್ತದೆ. ಸೌಂದರ್ಯವರ್ಧಕಗಳಲ್ಲಿ ವಯಸ್ಸನ್ನು ನಿಯಂತ್ರಿಸುವ ಗುಣಗಳಿಗಾಗಿ ಸಹ ಮಾರಾಟವಾಗುತ್ತದೆ.

2021ರಲ್ಲಿ ಚೀನಾದ ಎಜಿಯಾವೊ ಮಾರುಕಟ್ಟೆ ಸುಮಾರು 7.8 ಶತಕೋಟಿ ಡಾಲರ್ ಮೌಲ್ಯದ್ದಾಗಿತ್ತು. ವರ್ಷಕ್ಕೆ 23 ಲಕ್ಷದಿಂದ 48 ಲಕ್ಷ ಕತ್ತೆಗಳನ್ನು ಈ ಉತ್ಪನ್ನಕ್ಕಾಗಿ ಕೊಲ್ಲಲಾಗುತ್ತದೆ ಎಂದು 2023ರ ಯುಎಸ್ ಕಾಂಗ್ರೆಸ್ ಸಂಶೋಧನಾ ಸೇವಾ ವರದಿ ಅಂದಾಜಿಸಿದೆ.

ಚೀನಾದ ಸ್ವಂತ ಕತ್ತೆಗಳ ಸಂಖ್ಯೆ ಕಳೆದ ಮೂರು ದಶಕಗಳಲ್ಲಿ ತೀವ್ರವಾಗಿ ಕುಸಿದಿದೆ. ಕೃಷಿ ಯಾಂತ್ರೀಕರಣದಿಂದ ಕೆಲಸದ ಪ್ರಾಣಿಗಳ ಅಗತ್ಯ ಕಡಿಮೆಯಾಯಿತು. ಇದರಿಂದಾಗಿ ಖರೀದಿದಾರರು ವಿದೇಶಿ ಮೂಲಗಳತ್ತ ತಿರುಗಿದ್ದಾರೆಂತೆ.

ಪಾಕಿಸ್ತಾನ ವಿಶ್ವದ ಅತಿದೊಡ್ಡ ಕತ್ತೆ ಜನಸಂಖ್ಯೆಗಳಲ್ಲಿ ಒಂದನ್ನು ಹೊಂದಿದೆ. 2025-26ರ ಆರ್ಥಿಕ ಸಮೀಕ್ಷೆಯ ಪ್ರಕಾರ ದೇಶದಲ್ಲಿ 62 ಲಕ್ಷಕ್ಕೂ ಹೆಚ್ಚು ಕತ್ತೆಗಳಿವೆ. 2024-25ರಲ್ಲಿ 60 ಲಕ್ಷವಿದ್ದ ಸಂಖ್ಯೆ ಒಂದು ವರ್ಷದಲ್ಲಿ ಎರಡು ಲಕ್ಷ ಹೆಚ್ಚಾಗಿದೆ. ಹಿಂದಿನ ವರ್ಷಗಳಲ್ಲಿ 55 ಲಕ್ಷದಿಂದ 58 ಲಕ್ಷಕ್ಕೆ ಏರಿದ್ದು ಈಗ ಮುಂದುವರಿದಿದೆ. ಚೀನಾದ ನಂತರ ಮೂರನೇ ಅತಿದೊಡ್ಡ ಸಂಖ್ಯೆಯನ್ನು ಹೊಂದಿರುವ ದೇಶ ಇದು.

ಆಫ್ರಿಕನ್ ಒಕ್ಕೂಟ 2024ರಲ್ಲಿ ಕತ್ತೆ ಚರ್ಮಕ್ಕಾಗಿ ವಧೆ ಮತ್ತು ರಫ್ತಿನ ಮೇಲೆ ಖಂಡದಾದ್ಯಂತ ನಿಷೇಧ ಹೇರಿತು. ಆಫ್ರಿಕಾದಲ್ಲಿ ಸುಮಾರು 3.3 ಕೋಟಿ ಕತ್ತೆಗಳಿದ್ದು, ನಿಷೇಧ ಜಾರಿಯಾಗದಿದ್ದರೆ 2040ರ ವೇಳೆಗೆ ಸಂಖ್ಯೆ ಅರ್ಧಕ್ಕೆ ಇಳಿಯಬಹುದು ಎಂದು ಪ್ರಾಣಿ ಕಲ್ಯಾಣ ಸಂಸ್ಥೆ ಬ್ರೂಕ್ ಎಚ್ಚರಿಸಿದೆ. ಈ ನಿಷೇಧದ ನಂತರ ಚೀನೀ ಖರೀದಿದಾರರು ಪಾಕಿಸ್ತಾನ, ಬ್ರೆಜಿಲ್ ಮತ್ತು ಆಸ್ಟ್ರೇಲಿಯಾದತ್ತ ನೋಡುತ್ತಿದ್ದಾರೆ.

ಪಾಕಿಸ್ತಾನದಲ್ಲಿ ಹಿಂದೆ ಕೆಲವು ನಗರಗಳಲ್ಲಿ ಕತ್ತೆ ಮಾಂಸವನ್ನು ಗೋಮಾಂಸ ಅಥವಾ ಕುರಿಮರಿ ಎಂದು ಮಾರಾಟ ಮಾಡಿದ ಪ್ರಕರಣಗಳ ನಂತರ ಚರ್ಮ ರಫ್ತಿಗೆ ನಿರ್ಬಂಧವಿತ್ತು. ಸುಮಾರು ಒಂದು ದಶಕದ ನಂತರ ಆ ನಿರ್ಬಂಧವನ್ನು ತೆಗೆದುಹಾಕಲಾಗಿದೆ. ಈಗ ರಫ್ತು ಕೇವಲ ಗ್ವಾದರ್ ಮುಕ್ತ ವಲಯದ ನೋಂದಾಯಿತ ಘಟಕಗಳಿಗೆ ಸೀಮಿತ. ದೇಶೀಯ ಆಹಾರ ಸರಪಳಿಗೆ ಈ ಉತ್ಪನ್ನಗಳು ಸೇರದಂತೆ ನಿಯಮಗಳಿವೆ. ಕೆಲಸ ಮಾಡುವ ಕತ್ತೆಗಳ ಸಂಖ್ಯೆ ಕಡಿಮೆಯಾಗದಂತೆ ಸಾಕಣೆ ಕೇಂದ್ರಗಳನ್ನು ಪ್ರೋತ್ಸಾಹಿಸುವ ನೀತಿಯೂ ಇದೆ.

ಜುಲೈನಲ್ಲಿ ಗ್ವಾದರ್‌ನಿಂದ ಟಿಯಾಂಜಿನ್ ಮೂಲಕ ಚೀನಾಗೆ ಮೊದಲ ಸಾಗಣೆ ನಡೆಯಿತು. ಹಿಂದಿನ ಹೆಪ್ಪುಗಟ್ಟಿದ ಮಾಂಸ ಮತ್ತು ಚರ್ಮದ ಸರಕುಗಳ ಮೌಲ್ಯ ಸುಮಾರು 1.95 ಲಕ್ಷ ಡಾಲರ್ ಆಗಿತ್ತು. ಹ್ಯಾಂಗೆಂಗ್ ಸಿಇಒ ಆಂಡಿ ಲಿಯಾವೊ ಅವರ ಪ್ರಕಾರ ಆರು ತಿಂಗಳಲ್ಲಿ ತಿಂಗಳಿಗೆ 50 ಲಕ್ಷ ಡಾಲರ್ ವಿದೇಶಿ ವಿನಿಮಯ ಗಳಿಕೆ ಸಾಧ್ಯ. ಎರಡು ವರ್ಷಗಳಲ್ಲಿ ಇದು 70 ಲಕ್ಷ ಡಾಲರ್‌ಗೆ ಏರಬಹುದು. ಪಾಕಿಸ್ತಾನಿ ಅಧಿಕಾರಿಗಳು ವರ್ಷಕ್ಕೆ 375-400 ಮಿಲಿಯನ್ ಡಾಲರ್ ಗಳಿಕೆಯ ಸಾಧ್ಯತೆಯನ್ನು ಉಲ್ಲೇಖಿಸಿದ್ದಾರೆ. ಇನ್ನೂ ಎರಡು-ಮೂರು ಚೀನೀ ಕಂಪನಿಗಳಿಗೆ ಸಾಕಣೆ ಫಾರ್ಮ್ ಮತ್ತು ಕಸಾಯಿಖಾನೆ ಸ್ಥಾಪಿಸಲು ಅನುಮತಿ ನೀಡಲಾಗಿದೆ.

ಪಾಕಿಸ್ತಾನದ ಪಂಜಾಬ್‌ನ ಓಕಾರಾದಲ್ಲಿ ಸರ್ಕಾರಿ ಫಾರ್ಮ್‌ನಲ್ಲಿ ರಫ್ತಿಗಾಗಿ ಕತ್ತೆ ಸಾಕಣೆ ಯೋಜನೆ ಇತ್ತು. ಈಗ ಖಾಸಗಿ ಕಂಪನಿಗಳು ಸ್ಥಳೀಯ ರೈತರೊಂದಿಗೆ ಸಹಕರಿಸಿ ಸರಬರಾಜು ಹೆಚ್ಚಿಸುವ ನಿರೀಕ್ಷೆಯಿದೆ. ಕಂಪನಿ ಪ್ರಯೋಗಾಲಯ ಸ್ಥಾಪಿಸಿ ಸಾಕಣೆಯತ್ತಲೂ ಹೋಗುವ ಯೋಜನೆ ಹೊಂದಿದೆ.

ಪಾಕಿಸ್ತಾನಕ್ಕೆ ಇದು ವಿದೇಶಿ ಹೂಡಿಕೆ, ಉದ್ಯೋಗ ಮತ್ತು ರಫ್ತು ವೈವಿಧ್ಯೀಕರಣದ ಅವಕಾಶ. ಆದರೆ ಕೆಲಸದ ಪ್ರಾಣಿಗಳನ್ನು ವಾಣಿಜ್ಯ ಸರಕಾಗಿ ಪರಿವರ್ತಿಸುವುದರ ನೈತಿಕ ಮತ್ತು ಪರಿಸರ ಪರಿಣಾಮಗಳ ಬಗ್ಗೆ ಚರ್ಚೆ ಮುಂದುವರಿಯುತ್ತದೆ. ಆಫ್ರಿಕಾದ ಅನುಭವ ತೋರಿಸಿದಂತೆ, ನಿಯಂತ್ರಣವಿಲ್ಲದಿದ್ದರೆ ಸ್ಥಳೀಯ ಸಮುದಾಯಗಳ ಜೀವನೋಪಾಯಕ್ಕೆ ಹಾನಿಯಾಗಬಹುದು. ಪಾಕಿಸ್ತಾನ ಸರ್ಕಾರ ಈ ವ್ಯಾಪಾರವನ್ನು ನಿಯಂತ್ರಿತ ರೀತಿಯಲ್ಲಿ ನಡೆಸುವುದಾಗಿ ಹೇಳಿದೆ. ಗ್ವಾದರ್‌ನ ಈ ಹೊಸ ಉದ್ಯಮ ಯಶಸ್ವಿಯಾಗುವುದೋ ಅಥವಾ ವಿವಾದಾಸ್ಪದವಾಗುವುದೋ ಮುಂದಿನ ತಿಂಗಳುಗಳು ನಿರ್ಧರಿಸುತ್ತವೆ ಅಂತ ಫಸ್ಟ್ ಪೋಸ್ಟ್ ವರದಿ ಮಾಡಿದೆ.