ಚಿತ್ರದ ಕಥೆ ಜೈಲಿನಲ್ಲೇ ಆರಂಭವಾಗುತ್ತದೆ. ಕೈದಿಯಾಗಿರುವ ಮಹಿಳೆಯೊಬ್ಬಳು ಗಂಡು ಮಗುವಿಗೆ ಜನ್ಮ ನೀಡುತ್ತಾಳೆ. ಆ ಮಗುವಿಗೆ ಬಾಲನ್ ಎಂದು ಹೆಸರು ಇಡಲಾಗುತ್ತದೆ. ಜೈಲಿನಿಂದ ಬಿಡುಗಡೆಯಾದ ನಂತರ ತನ್ನ ಮಗನಿಗೆ ಉತ್ತಮ ಭವಿಷ್ಯ ರೂಪಿಸಬೇಕು ಎಂಬ ಕನಸಿನೊಂದಿಗೆ ಹೊಸ ಜೀವನ ಆರಂಭಿಸುವ ತಾಯಿ, ತನ್ನ ಕತ್ತಲೆಯ ಗತಕಾಲ ಮಗನ ಬದುಕಿನ ಮೇಲೆ ಯಾವುದೇ ಪರಿಣಾಮ ಬೀಳಬಾರದು ಎಂದು ನಿರಂತರವಾಗಿ ಹೆಸರು ಮತ್ತು ವಾಸಸ್ಥಳ ಬದಲಾಯಿಸುತ್ತಾ ಬದುಕುತ್ತಾಳೆ.

ಚಿತ್ರದಲ್ಲಿ ತಾಯಿಯ ಪಾತ್ರವನ್ನು ನಟಿ ಫರ್ಜಾನಾ ಪಾಲತಿಂಗಲ್ ಅತ್ಯಂತ ಸಹಜವಾಗಿ ನಿರ್ವಹಿಸಿದ್ದಾರೆ. ಒಬ್ಬ ತಾಯಿಯ ನೋವು, ಪ್ರೀತಿ ಮತ್ತು ತ್ಯಾಗವನ್ನು ಅವರು ಮನಮುಟ್ಟುವಂತೆ ತೆರೆಗೆ ತಂದಿದ್ದಾರೆ. ಬಾಲನ್ ಪಾತ್ರದಲ್ಲಿ ನಟಿಸಿರುವ ಆಧಿಶೇಷನ್ ಕೆ.ಆರ್ ತಮ್ಮ ಮುಗ್ಧ ಅಭಿನಯದಿಂದ ಪ್ರೇಕ್ಷಕರ ಮನ ಗೆಲ್ಲುತ್ತಾರೆ.