ನೆಲ್ಲಿಕಾಯಿ ನಮಗೆಲ್ಲರಿಗೂ ಚಿರಪರಿಚಿತ. ಮನೆಗಳಲ್ಲಿ ಉಪ್ಪಿನಕಾಯಿ, ಮುರಬ್ಬಾ ಮಾಡುತ್ತಾರೆ. ಅನೇಕರು ನೆಲ್ಲಿಕಾಯಿ ಜ್ಯೂಸ್ ಕುಡಿಯುತ್ತಾರೆ. ಚಳಿಗಾಲದಲ್ಲಿ ಚ್ಯವನಪ್ರಾಶ್‌ನಲ್ಲಿ ಇದು ಮುಖ್ಯ ಘಟಕ ಅಂತ ಮೋದಿ ಹೇಳಿದ್ದರೆ. ನಮ್ಮ ಹಿರಿಯರು ತಲೆಮಾರುಗಳಿಂದಲೂ ನೆಲ್ಲಿಕಾಯಿಯ ಗುಣಗಳ ಬಗ್ಗೆ ಹೇಳುತ್ತಾ ಬಂದಿದ್ದಾರೆ ಅಂತ ಮನ್ ಕಿ ಬಾತ್‌ನಲ್ಲಿ ವಿವರಿಸಿದ್ದಾರೆ.

ಈ ನೆಲ್ಲಿಕಾಯಿ ಈಗ ಉತ್ತರ ಪ್ರದೇಶದ ಪ್ರತಾಪಗಢ ಜಿಲ್ಲೆಯಲ್ಲಿ ಹೊಸ ಅವಕಾಶಗಳನ್ನು ತೆರೆದಿದೆ. ಅಲ್ಲಿ ರೈತರು ತಲೆಮಾರುಗಳಿಂದಲೂ ನೆಲ್ಲಿಕಾಯಿ ಬೆಳೆಯುತ್ತಿದ್ದಾರೆ. ಇದು ಪ್ರತಾಪಗಢಕ್ಕೆ ಬಲವಾದ ಗುರುತನ್ನು ನೀಡಿದೆ ಅಂತ ಮೋದಿ ಹೇಳಿದ್ದಾರೆ. ಒಂದು ಜಿಲ್ಲೆ ಒಂದು ಉತ್ಪನ್ನ (ODOP) ಯೋಜನೆಯಿಂದ ನೆಲ್ಲಿಕಾಯಿ ಸಂಸ್ಕರಣೆಯಲ್ಲಿ ತೊಡಗಿರುವ ಸ್ಥಳೀಯ ಉದ್ಯಮಿಗಳಿಗೆ ಪ್ರೋತ್ಸಾಹ ಸಿಕ್ಕಿದೆ ಅಂತ ಪ್ರಸ್ತಾಪಿಸಿದ್ದಾರೆ.

ಪ್ರತಾಪಗಢದಲ್ಲಿ ಸುಮಾರು 100 ನೆಲ್ಲಿಕಾಯಿ ಸಂಸ್ಕರಣಾ ಘಟಕಗಳು ಕಾರ್ಯನಿರ್ವಹಿಸುತ್ತಿವೆ. ಸ್ವಸಹಾಯ ಗುಂಪುಗಳ ಮಹಿಳೆಯರು ಇದರಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿದ್ದಾರೆ. ದೇವಗಢ ಕಮಾಸಿ ಗ್ರಾಮದ ಸಾವಿತ್ರಿ ಫುಲೆ ಸ್ವಸಹಾಯ ಗುಂಪು ಸೇರಿದಂತೆ ಹಲವು ಸಂಘಟನೆಗಳಿವೆ. ಅಲ್ಲಿನ ಮಹಿಳೆಯರು ನೆಲ್ಲಿಕಾಯಿ ಕ್ಯಾಂಡಿ, ಮುರಬ್ಬಾ ಮತ್ತು ಜ್ಯೂಸ್ ತಯಾರಿಸುತ್ತಿದ್ದಾರೆ. ODOP ಮೂಲಕ ಹೊಸ ಮಾರುಕಟ್ಟೆಗಳು ಸಿಕ್ಕಿದ್ದರಿಂದ ಅವರ ಆದಾಯ ಹೆಚ್ಚಾಗಿದೆ ಎಂದಿದ್ದಾರೆ.

ವಿಂಧ್ಯವಾಸಿನಿ ಸ್ವಸಹಾಯ ಗುಂಪು: ನೆಲ್ಲಿಕಾಯಿ ಉಪ್ಪಿನಕಾಯಿ ಮತ್ತು ಜೀರ್ಣಕಾರಿ ಪುಡಿ ತಯಾರಿಸುತ್ತಿದ್ದಾರೆ. ಇವರಿಗೆ ಸಂಸ್ಕರಣಾ ಯಂತ್ರಗಳು, ಸಾಲ ಸೌಲಭ್ಯ ಮತ್ತು ಸ್ಥಳೀಯ ಮೇಳಗಳಲ್ಲಿ ಭಾಗವಹಿಸುವ ಅವಕಾಶ ಸಿಕ್ಕಿದೆ. ಇದರಿಂದ ಅವರ ಆದಾಯ ಗಣನೀಯವಾಗಿ ಹೆಚ್ಚಾಗಿದೆ ಅಂತ ಮೋದಿ ಪ್ರಶಂಸಿಸಿದ್ದಾರೆ.

ದೇಶದ ಪ್ರತಿಯೊಂದು ಪ್ರದೇಶಕ್ಕೂ ತನ್ನದೇ ಆದ ವಿಶೇಷತೆ ಇದೆ — ಒಂದು ಹಣ್ಣು, ಸಾಂಪ್ರದಾಯಿಕ ಕಲೆ ಅಥವಾ ಕೌಶಲ್ಯ. ODOP ಯೋಜನೆ ಈ ವಿಶೇಷತೆಗಳನ್ನು ಸ್ಥಳೀಯ ಮಾರುಕಟ್ಟೆಯಿಂದ ದೇಶದ ಇತರೆಡೆ ಮತ್ತು ವಿಶ್ವ ಮಾರುಕಟ್ಟೆಗೆ ತಲುಪಿಸುವುದನ್ನು ಗುರಿಯಾಗಿಟ್ಟುಕೊಂಡಿದೆ. ಇದು ವೋಕಲ್ ಫಾರ್ ಲೋಕಲ್ (Vocal for Local) ಮತ್ತು ಆತ್ಮನಿರ್ಭರ ಭಾರತಕ್ಕೆ ಬೆಂಬಲ ನೀಡುತ್ತದೆ. ಹಬ್ಬಗಳ ಸಮಯದಲ್ಲೂ ಸ್ಥಳೀಯ ಉತ್ಪನ್ನಗಳನ್ನು ಬಳಸುವುದನ್ನು ಮರೆಯಬಾರದು.

ಇದೇ ಭಾಗವನ್ನು ಇನ್‌ಸ್ಟಾಗ್ರಾಮ್ ರೀಲ್ ಆಗಿ ಹಂಚಿಕೊಂಡಿರುವ ಮೋದಿ, ನೆಲ್ಲಿಕಾಯಿ ಕೇವಲ ಆರೋಗ್ಯಕ್ಕೆ ಮಾತ್ರವಲ್ಲ, ರೈತರು ಮತ್ತು ಮಹಿಳೆಯರ ಆರ್ಥಿಕ ಸಬಲೀಕರಣಕ್ಕೂ ಕಾರಣವಾಗುತ್ತಿದೆ ಅಂತ ಅಭಿಪ್ರಾಯಪಟ್ಟಿದ್ದಾರೆ.