ಕರೀನಾ ಕಪೂರ್ ತಮ್ಮ ಕಾರ್ಯಕ್ರಮದಲ್ಲಿ ವಿವಿಧ ಕ್ಷೇತ್ರಗಳ ಮಹಿಳೆಯರನ್ನು ಆಹ್ವಾನಿಸಿ ಅವರ ವೈಯಕ್ತಿಕ ಜೀವನ, ವೃತ್ತಿ, ಸಂಬಂಧಗಳು ಹಾಗೂ ಹಲವು ವಿಚಾರಗಳ ಬಗ್ಗೆ ಮಾತುಕತೆ ನಡೆಸುತ್ತಾರೆ. ಈ ಬಾರಿ ಮೀರಾ ಕಪೂರ್ ಕಾರ್ಯಕ್ರಮಕ್ಕೆ ಅತಿಥಿಯಾಗಿ ಬಂದಿದ್ದಾರೆ. ಮೀರಾ ಕೂಡ ಕಾರ್ಯಕ್ರಮದ ಚಿತ್ರೀಕರಣದ ಕೆಲವು ಫೋಟೋಗಳನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದು, ಕರೀನಾ ಅವರಿಗೆ ಧನ್ಯವಾದ ತಿಳಿಸಿದ್ದಾರೆ.

ಕರೀನಾ ಮತ್ತು ಮೀರಾ ಒಟ್ಟಿಗೆ ಕಾಣಿಸಿಕೊಂಡಿರುವುದು ಸಾಮಾನ್ಯ ಸೆಲೆಬ್ರಿಟಿ ಭೇಟಿ ಎನ್ನಬಹುದಾದರೂ, ಈ ಇಬ್ಬರನ್ನು ಸಂಪರ್ಕಿಸುವ ಒಂದು ಪ್ರಮುಖ ವಿಚಾರವಿದೆ. ಮೀರಾ ಕಪೂರ್ , ನಟ ಶಾಹಿದ್ ಕಪೂರ್ ಅವರ ಪತ್ನಿ. ಶಾಹಿದ್ ಮತ್ತು ಕರೀನಾ ಒಂದು ಕಾಲದಲ್ಲಿ ಪ್ರೀತಿಯಲ್ಲಿದ್ದ ಜೋಡಿಯಾಗಿ ಬಾಲಿವುಡ್‌ನಲ್ಲಿ ಸಾಕಷ್ಟು ಸುದ್ದಿಯಾಗಿದ್ದರು. ಹೀಗಾಗಿ ಶಾಹಿದ್ ಮಾಜಿ ಪ್ರಿಯತಮೆ ಕರೀನಾ ನಡೆಸಿಕೊಡುವ ಕಾರ್ಯಕ್ರಮಕ್ಕೆ ಅವರ ಪತ್ನಿ ಮೀರಾ ಅತಿಥಿಯಾಗಿ ಬಂದಿರುವುದು ಅಭಿಮಾನಿಗಳ ಕುತೂಹಲಕ್ಕೆ ಕಾರಣವಾಗಿದೆ.

ಶಾಹಿದ್ ಕಪೂರ್ ಮತ್ತು ಕರೀನಾ ಕಪೂರ್ ಅವರ ಸಂಬಂಧ 2000ರ ದಶಕದಲ್ಲಿ ಬಾಲಿವುಡ್‌ನ ಬಹುಚರ್ಚಿತ ಸೆಲೆಬ್ರಿಟಿ ಸಂಬಂಧಗಳಲ್ಲಿ ಒಂದಾಗಿತ್ತು. ಇಬ್ಬರೂ ಒಟ್ಟಿಗೆ ‘ಜಬ್ ವೀ ಮೆಟ್’ ಸೇರಿದಂತೆ ಸಿನಿಮಾಗಳಲ್ಲಿ ನಟಿಸಿದ್ದರು. ನಂತರ ಇಬ್ಬರೂ ತಮ್ಮದೇ ಜೀವನದಲ್ಲಿ ಮುಂದುವರಿದರು. ಕರೀನಾ 2012ರಲ್ಲಿ ಸೈಫ್ ಅಲಿ ಖಾನ್ ಅವರನ್ನು ವಿವಾಹವಾದರೆ, ಶಾಹಿದ್ 2015ರಲ್ಲಿ ಮೀರಾ ರಾಜ್‌ಪುತ್ ಅವರನ್ನು ವಿವಾಹವಾದರು.

ಕರೀನಾ ಮತ್ತು ಮೀರಾ ಒಟ್ಟಿಗೆ ಇರುವ ಫೋಟೋ ಸಾಮಾಜಿಕ ಜಾಲತಾಣದಲ್ಲಿ ಕಾಣಿಸಿಕೊಂಡ ಬಳಿಕ ಅಭಿಮಾನಿಗಳು ಹಲವು ರೀತಿಯಲ್ಲಿ ಪ್ರತಿಕ್ರಿಯಿಸಿದ್ದಾರೆ. ಕೆಲವರು ಇಬ್ಬರನ್ನು ಒಂದೇ ಫ್ರೇಮ್‌ನಲ್ಲಿ ನೋಡುತ್ತಿರುವುದು ಕುತೂಹಲಕಾರಿ ಎಂದು ಹೇಳಿದರೆ, ಇನ್ನೂ ಕೆಲವರು ಶಾಹಿದ್ ಕಪೂರ್ ಅವರ ಹಳೆಯ ಸಂಬಂಧವನ್ನು ನೆನಪಿಸಿಕೊಂಡಿದ್ದಾರೆ. ಈ ಕಾರಣದಿಂದಲೇ ಇಬ್ಬರ ಭೇಟಿಯ ಕುರಿತು ಚರ್ಚೆ ವೇಗವಾಗಿ ಹೆಚ್ಚಾಗಿದೆ.