ಸದ್ಯ ಐಪಿಎಲ್ ನಲ್ಲಿ ನೀಡುತ್ತಿರುವ 6 ಓವರ್ ಗಳ ಪವರ್ ಪ್ಲೇ ಸ್ಥಾನದಲ್ಲಿ ಸಚಿನ್ ಒಂದು ಅದ್ಭುತವಾದ ಬದಲಾವಣೆ ಮಾಡಲು ಹೇಳಿದ್ದಾರೆ. ಇದರಂತೆ ಪವರ್ ಪ್ಲೇ ಓವರ್ ಗಳನ್ನು 4ಕ್ಕೆ ಕಡಿಮೆ ಮಾಡಿ, ಸದ್ಯ ಇರುವ 30 ಅಡಿ ಸರ್ಕಲ್ ಹೊರಗೆ ಇಬ್ಬರು ಪ್ಲೇಯರ್ ಗಳಿಗೆ ಅವಕಾಶ ನೀಡಬಹುದು. ಉಳಿದ ಎರಡು ಓವರ್ ಗಳನ್ನು ಬೌಲಿಂಗ್ ಪವರ್ ಪ್ಲೇ ಆಗಿ ಗುರುತಿಸಬೇಕು. ಈ ಎರಡು ಓವರ್ ಗಳಲ್ಲಿ ಫೀಲ್ಡಿಂಗ್ ಮಾಡುತ್ತಿರುವ ತಂಡದ ನಾಯಕ ಯಾವಾಗ ಬೇಕಾದರೂ, ಯಾವುದೇ ಸ್ಥಾನದಲ್ಲಿ ಆದರೂ ಫೀಲ್ಡರ್ ಗಳನ್ನು ನಿಲ್ಲಿಸಿಕೊಳ್ಳಲು ಅವಕಾಶ ನೀಡಬೇಕು. ಇದರಂತೆ ಎರಡು ಫೀಲ್ಡರ್ ಗಳೊಂದಿಗೆ ಮತ್ತೋರ್ವ ಫೀಲ್ಡರ್ ಗೆ (30 ಯಾರ್ಡ್ ಸರ್ಕಲ್ ನಿಂದ ಹೊರಗೆ ಮೂವರು ಫೀಲ್ಡರ್ಗಳು) ಹೆಚ್ಚುವರಿಯಾಗಿ ಅವಕಾಶ ನೀಡಬೇಕು. ಇದರಿಂದ ಫೀಲ್ಡಿಂಗ್ ತಂಡದ ಆಟಕ್ಕೆ ಬ್ರೇಕ್ ಹಾಕುತ್ತದೆ ಮತ್ತು ಪಂದ್ಯದ ಮೇಲೆ ಹಿಡಿತ ಸಾಧಿಸಲು ಅನುವು ಮಾಡಿಕೊಡುತ್ತದೆ ಎಂದು ಸಚಿನ್ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಸಾಮಾನ್ಯವಾಗಿ ಟಿ20 ಪಂದ್ಯದಲ್ಲಿ ಓರ್ವ ಬೌಲರ್ಗೆ ಗರಿಷ್ಠ 4 ಓವರ್ ಬೌಲ್ ಮಾಡಲು ಅವಕಾಶ ನೀಡಲಾಗುತ್ತದೆ. ಆದರೆ ಇಲ್ಲಿ ಸಚಿನ್ ಒಂದು ಅದ್ಭುತ ಬದಲಾವಣೆಯನ್ನು ಸೂಚಿಸಿದ್ದಾರೆ. ‘ಟಾಪ್ ಅರ್ಡರ್ ಬೌಲರ್ ಗಳು ಅಗತ್ಯವಾದರೆ ಹೇಗೆ 20 ಓವರ್ ಸಂಪೂರ್ಣವಾಗಿ ಬ್ಯಾಟಿಂಗ್ ಮಾಡಲು ಅವಕಾಶ ಇದೆಯೋ ಅದೇ ರೀತಿ ಬೌಲರ್ ಗಳಿಗೂ ಒಂದು ಅವಕಾಶ ಇರ್ಬೇಕು? ಆದ್ದರಿಂದ ಇನ್ನಿಂಗ್ಸ್ ಒಂದರಲ್ಲಿ ಓರ್ವ ಬೌಲರ್ ಗೆ ಐದು ಓವರ್ ಬೌಲಿಂಗ್ ಮಾಡುವ ಅವಕಾಶ ಕೊಡಬೇಕು’ ಎಂದು ಸಚಿನ್ ಹೇಳಿದ್ದಾರೆ.

ಸಚಿನ್ ಅವರು ಸೂಚಿಸಿರುವ ಬದಲಾವಣೆಗಳು ಕ್ರಿಕೆಟ್ ಪ್ರಪಂಚದಲ್ಲಿ ಹೊಸ ಚರ್ಚೆಗೆ ಕಾರಣವಾಗಿದೆ. ನಿಜ ಹೇಳಬೇಕು ಎಂದರೇ, ಇಂಪ್ಯಾಕ್ಟ್ ಪ್ಲೇಯರ್ ನಿಯಮ ಬಂದ ಬಳಿಕ ಐಪಿಎಲ್ ನಲ್ಲಿ 250 ಪ್ಲಸ್ ಸ್ಕೋರ್ ಮಾಡೋದು ಸಾಮಾನ್ಯ ಸಂಗತಿಯಾಗಿದೆ. 8ನೇ ಕ್ರಮಾಂಕದಲ್ಲಿಯೂ ಬ್ಯಾಟರ್ ಬಂದು ಸಿಕ್ಸರ್ ಗಳ ಮಳೆಯನ್ನು ಸುರಿಸುವ ಅವಕಾಶವಿದೆ. ಇದರಿಂದ ಬೌಲರ್ ಗಳಿಗೆ ಸಾಕಷ್ಟು ಒತ್ತಡ ಆಗುತ್ತಿದೆ.

ಕ್ರಿಕೆಟ್ ನಲ್ಲಿ ಯಾವಾಗಲೂ ಬ್ಯಾಟರ್ ಗಳಿಗೆ ಮಾತ್ರವಲ್ಲದೇ, ಬೌಲರ್ ಗಳಿಗೂ ಸಮಾನ ಅವಕಾಶ ಸಿಗಬೇಕು ಎಂಬುವುದು ಸಚಿನ್ ಅವರ ಆಶಯವಾಗಿದೆ. ಐಪಿಎಲ್ ಮತ್ತು ಬಿಸಿಸಿಐ ಈ ಬಗ್ಗೆ ಆರ್ಥಿಕವಾಗಿ ಮಾತ್ರ ನೋಡದೇ, ಆಟದ ಸಹಜತೆಯನ್ನು ಜೀವಂತವಾಗಿ ಇರುವಂತೆ ಮಾಡಲು ಇಂತಹ ಸಲಹೆಗಳನ್ನು ಪರಿಶೀಲನೆ ಮಾಡಬೇಕು. ಒಂದೊಮ್ಮೆ ಈ ಬದಲಾವಣೆಗಳು ಜಾರಿಯಾದರೆ, ಐಪಿಎಲ್ ಕ್ರೇಜ್ ಮತ್ತಷ್ಟು ಹೆಚ್ಚಾಗೋದು ಖಚಿತ ಎಂದು ಕ್ರಿಕೆಟ್ ವಿಶ್ಲೇಷಕರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.