ಹೌದು, ವೈಭವ್ ಎಂಬ ವ್ಯಕ್ತಿ ತಮ್ಮ ಇನ್​ಸ್ಟಾದಲ್ಲಿ ಇಂತಹ ವಿಶೇಷ ದೃಶ್ಯಗಳನ್ನು ಹಂಚಿಕೊಂಡಿದ್ದಾರೆ. ಅಲ್ಲದೇ ಈಗ ಈ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ಸಖತ್ತಾಗಿ ವೈರಲ್ ಆಗುತ್ತಿದೆ. ನಾನು ಸ್ಕೂಟಿಯಲ್ಲಿ ಹೋಗುತ್ತಿರಬೇಕಾದರೆ ಈ ವಿಶೇಷ ಸಿಸ್ಟಮ್ ಅನ್ನು ನೋಡಿದೆ. ಇದರೊಂದಿಗೆ ರಸ್ತೆ ಪಕ್ಕ ಬೈಕ್ ನಿಲ್ಲಿಸಿ ವಿಡಿಯೋ ಮಾಡಿ ವ್ಯಾಪಾರಿಯನ್ನು ಮಾತನಾಡಿದ್ದಾಗಿ ಬರೆದುಕೊಂಡಿದ್ದಾರೆ.

ವಿಡಿಯೋದಲ್ಲಿ ತರಕಾರಿ ವ್ಯಾಪಾರಿ ತನ್ನ ತಲೆಗೆ ಒಂದು ರೀತಿಯ ಬೆಲ್ಟ್ ನೊಂದಿಗೆ ಸಾಧನವೊಂದನ್ನು ಅಳವಡಿಸಿಕೊಂಡಿದ್ದು, ಅದಕ್ಕೆ ಒಂದು ಐಫೋನ್, ಮೆಮೊರಿ ಡಿವೈಸ್ ಅಳವಡಿಕೆ ಮಾಡಿ ಧರಿಸಿದ್ದು, ಪ್ರತಿನಿತ್ಯದ ವ್ಯಾಪಾರವನ್ನು ಮುಂದುವರಿಸಿದ್ದಾರೆ. ಅಸಲಿಗೆ ಆತ ಏನು ಮಾಡುತ್ತಿದ್ದಾನೆ ಎಂಬ ಕುತೂಹಲದೊಂದಿಗೆ ವೈಭವ್ ಆ ಯುವಕನನ್ನು ಮಾತನಾಡಿಸಿದ್ದು, ಈ ವೇಳೆ ಊಹೆಗೂ ನಿಲುಕದ ಉತ್ತರ ಪಡೆದುಕೊಂಡಿದ್ದಾರೆ.

ಮತ್ತೊಂದು ಅಚ್ಚರಿಯ ಸಂಗತಿ ಈ ವಿಡಿಯೋದಲ್ಲಿ ರಿವೀಲ್ ಆಗಿದ್ದು, ಈ ಡೇಟಾ ಕಲೆಕ್ಷನ್ ಕೆಲಸಕ್ಕೆ ಆ ತರಕಾರಿ ವ್ಯಾಪಾರಿ ಯುವಕನಿಗೆ ಆತನಿಗೆ ಸಂಬಳ ಕೂಡ ನೀಡಲಾಗುತ್ತಿದೆ. ಪೋಸ್ಟ್ ನಲ್ಲಿ ನೀಡಿರುವ ಮಾಹಿತಿಯಂತೆ, ಈ ವಿಶೇಷ ಕೆಲಸಕ್ಕೆ ವ್ಯಾಪಾರಿಗೆ ಒಂದು ಗಂಟೆಗೆ 350 ರೂಪಾಯಿ ನೀಡಲಾಗುತ್ತದೆ. ಒಂದು ದಿನಕ್ಕೆ 10 ಗಂಟೆ ಕೆಲಸ ಮಾಡಿದರೆ, ದಿನಕ್ಕೆ 3500 ರೂಪಾಯಿ ಅಂದರೆ ತಿಂಗಳಿಗೆ ಬರೋಬ್ಬರಿ 1,05,000 ರೂಪಾಯಿಗೂ ಅಧಿಕ ಆದಾಯ ಸಿಗುತ್ತದೆ.

ಈ ವಿಡಿಯೋ ವೈರಲ್ ಆಗುತ್ತಿದ್ದಂತೆ ಇದರ ಹಿಂದಿರುವ ಅಸಲಿಗೆ ತಂತ್ರಜ್ಞಾನ ಏನು ಅಂತ ನೆಟ್ಟಿಗರೊಬ್ಬರು ಮಾಹಿತಿ ಹಂಚಿಕೊಂಡಿದ್ದಾರೆ. ಇದನ್ನು ತಾಂತ್ರಿಕ ಭಾಷೆಯಲ್ಲಿ ಇಗೋ ಸೆಂಟ್ರಿಕ್ ಡೇಟಾ ಕಲೆಕ್ಷನ್ ಎಂದು ಕರೆಯುತ್ತಾರೆ. ಐಫೋನ್ ನಲ್ಲಿರುವ ಲಿಡಾರ್ (LiDAR) ನಂತಹ ಆಧುನಿಕ ಸೆನ್ಸಾರ್ ಸಹಾಯದ ನೆರವಿನಿಂದ ಮನುಷ್ಯ ನಿತ್ಯ ಮಾಡುವ ಕೆಲಸಗಳಾದ ಅಡುಗೆ, ಬಟ್ಟೆ ಫೋಲ್ಡ್ ಮಾಡೋದು, ಪಾತ್ರೆ ತೊಳೆಯುವುದು, ವಸ್ತುಗಳನ್ನು ಅರೇಂಜ್ ಮಾಡುವುದಂತಹ ಕೆಲಸಗಳ ಬಗ್ಗೆ ಸಂಪೂರ್ಣ ಮಾಹಿತಿಯನ್ನು ಈ ಫೋನ್ ಮೂಲಕ ರೆಕಾರ್ಡ್ ಮಾಡಲಾಗುತ್ತದೆ. ಈ ಡೇಟಾ ಮುಖ್ಯವಾಗಿ ಅಮೆರಿಕ ರೊಬೊಟಿಕ್ಸ್ ಕಂಪನಿಗಳು ಖರೀದಿ ಮಾಡುತ್ತವಂತೆ. ಅಲ್ಲದೇ ಮನುಷ್ಯನ ವರ್ತನೆಯನ್ನು ರೊಬೊಗಳು ನಿಖರವಾಗಿ ಕಾಪಿ ಮಾಡುವಂತೆ ಟ್ರೈನಿಂಗ್ ನೀಡಲು ಬಳಕೆ ಮಾಡಲಾಗುತ್ತದೆ. ಭವಿಷ್ಯದಲ್ಲಿ ಎಐ ನಿಂದ ಜನರ ಕೆಲಸಗಳು ಊಹೆಗೂ ನಿಲುಕದ ರೀತಿಯಲ್ಲಿ ಬದಲಾಗುತ್ತವೆ ಎಂಬ ಚರ್ಚೆ ನಡೆಯುತ್ತಿದೆ. ಇದೇ ಸಂದರ್ಭದಲ್ಲಿ ಮನುಷ್ಯರು ಹೇಗೆ ಕೆಲಸ ಮಾಡ್ತಾರೆ ಎಐಗೆ ತರಬೇತಿ ನೀಡಲು ಇಲ್ಲಿ ಸಾಮಾನ್ಯ ಕಾರ್ಮಿಕರನ್ನು ಬಳಕೆ ಮಾಡುತ್ತಿರುವುದು ವಿಶೇಷ ಎಂದು ಹೇಳಬಹುದು.