ಇದಕ್ಕೂ ಮುನ್ನ, 1962ರ ಏಷ್ಯನ್ ಗೇಮ್ಸ್‌ನ 97+ ಕೆಜಿ ವಿಭಾಗದಲ್ಲಿ ಭಾರತದ ಗಣಪತ್ ಅಂದಲ್ಕರ್ ಅವರು ಕಂಚಿನ ಪದಕ ಗೆದ್ದಿದ್ದರು. ಅದಾದ ಬಳಿಕ ಭಾರತದ ಯಾವುದೇ ಗ್ರೀಕೊ-ರೋಮನ್ ಪೈಲ್ವಾನ್ ಏಷ್ಯನ್ ಗೇಮ್ಸ್‌ನಲ್ಲಿ ಪದಕ ಗೆದ್ದಿರಲಿಲ್ಲ ಮತ್ತು ಫೈನಲ್ ಕೂಡ ತಲುಪಿರಲಿಲ್ಲ. ಆ ಐತಿಹಾಸಿಕ ದಾಖಲೆಯನ್ನು ನಿತೇಶ್ ಈಗ ಬರೆದಿದ್ದಾರೆ.

ಹರಿಯಾಣದ ಸೋನಿಪತ್ ಜಿಲ್ಲೆಯ ಜಗಸಿ ಗ್ರಾಮದ ನಿತೇಶ್ ಅವರ ಈ ಸಾಧನೆಯ ಹಿಂದಿನ ಹಾದಿ ಅಷ್ಟು ಸುಲಭದ್ದಾಗಿರಲಿಲ್ಲ. ಮೊಣಕಾಲಿನ ಗಂಭೀರ ಗಾಯ ಮತ್ತು ಆಪರೇಷನ್ ಕಾರಣದಿಂದಾಗಿ ಅವರು ಕುಸ್ತಿಯನ್ನೇ ಬಿಡಬೇಕಾಗಿ ಬಂದಿತ್ತು. ಆ ಕಷ್ಟದ ದಿನಗಳಲ್ಲಿ ಅವರು ಮನೆ ಮನೆಗೆ ಹೋಗಿ ಹಾಲು ಮಾರುವ ಕೆಲಸವನ್ನು ಮಾಡುತ್ತಿದ್ದರು. ಆದರೆ, ಹೆತ್ತವರ ಪ್ರೋತ್ಸಾಹದಿಂದಾಗಿ ಅವರು ಮತ್ತೆ ಕುಸ್ತಿ ಅಖಾಡಕ್ಕೆ ಮರಳಿದರು.

ಈ ಬಗ್ಗೆ ಅವರ ತಂದೆ ಆನಂದ್ ಸಿವಾಚ್ ಮಾತನಾಡುತ್ತಾ, “ಪ್ರತಾಪ್ ಸ್ಪೋರ್ಟ್ಸ್ ಸ್ಕೂಲ್‌ನಲ್ಲಿ ತರಬೇತಿ ಪಡೆಯುವಾಗ ನಿತೇಶ್ ಮೊಣಕಾಲಿಗೆ ಪೆಟ್ಟಾಗಿ ಆಪರೇಷನ್ ಮಾಡಿಸಬೇಕಾಯಿತು. ಚೇತರಿಸಿಕೊಳ್ಳುವ ಸಮಯದಲ್ಲಿ ನಾನು ನನ್ನ ಹಾಲಿನ ವ್ಯಾಪಾರದಲ್ಲಿ ನನಗೆ ಸಹಾಯ ಮಾಡುವಂತೆ ಕೇಳಿಕೊಂಡೆ. ಹಳ್ಳಿಯಿಂದ ಹಾಲು ಖರೀದಿಸಿ ಪಾನಿಪತ್‌ನಲ್ಲಿ ಮನೆ ಮನೆಗೆ ಮಾರುತ್ತಿದ್ದೆವು. ಕೆಲವು ದಿನಗಳ ನಂತರ ಅವನು ನನ್ನ ಬಳಿ ಬಂದು ‘ನಾನು ಮತ್ತೆ ಕುಸ್ತಿ ಆಡಬಹುದೇ?’ ಎಂದು ಕೇಳಿದ. ನನಗೆ ಕುಸ್ತಿಯಲ್ಲಿ ಆಸಕ್ತಿ ಇದ್ದರೂ ಆಡಲು ಸಾಧ್ಯವಾಗಿರಲಿಲ್ಲ, ಹಾಗಾಗಿ ಮಗ ಪೈಲ್ವಾನ್ ಆಗಬೇಕು ಎಂಬುದು ನನ್ನ ಆಸೆಯಾಗಿತ್ತು, ಅದಕ್ಕೆ ಒಪ್ಪಿದೆ” ಎಂದು ನೆನಪಿಸಿಕೊಂಡಿದ್ದಾರೆ.

97 ಕೆಜಿ ತೂಕದ ವಿಭಾಗದಲ್ಲಿ ಸ್ಪರ್ಧಿಸಿದ್ದ ನಿತೇಶ್‌ಗೆ ಕ್ವಾಲಿಫಿಕೇಶನ್ ರೌಂಡ್‌ನಲ್ಲಿ ‘ಬೈ’ (ನೇರ ಪ್ರವೇಶ) ಸಿಕ್ಕಿತ್ತು.