Last Updated:
ನಟ ಅಕ್ಷಯ್ ಖನ್ನಾ (Akshaye Khanna) ಇದೀಗ ದುಬಾರಿ ರಿಯಲ್ ಎಸ್ಟೇಟ್ ಖರೀದಿಯ ಮೂಲಕ ಸುದ್ದಿಯಾಗಿದ್ದಾರೆ. ಮುಂಬೈನ ಅತ್ಯಂತ ಪ್ರತಿಷ್ಠಿತ ಹಾಗೂ ಐಷಾರಾಮಿ ಪ್ರದೇಶಗಳಲ್ಲಿ ಒಂದಾಗಿರುವ ಮಲಬಾರ್ ಹಿಲ್ನಲ್ಲಿ ಬರೋಬ್ಬರಿ 33.26 ಕೋಟಿ ರೂ. ಮೌಲ್ಯದ ಹೊಸ ಮನೆಯನ್ನು ಖರೀದಿಸಿದ್ದಾರೆ ಎನ್ನಲಾಗಿದೆ.
ಬಾಲಿವುಡ್ ನಟ ಅಕ್ಷಯ್ ಖನ್ನಾ (Akshaye Khanna) ಇದೀಗ ದುಬಾರಿ ರಿಯಲ್ ಎಸ್ಟೇಟ್ ಖರೀದಿಯ ಮೂಲಕ ಸುದ್ದಿಯಾಗಿದ್ದಾರೆ. ಮುಂಬೈನ ಅತ್ಯಂತ ಪ್ರತಿಷ್ಠಿತ ಹಾಗೂ ಐಷಾರಾಮಿ ಪ್ರದೇಶಗಳಲ್ಲಿ ಒಂದಾಗಿರುವ ಮಲಬಾರ್ ಹಿಲ್ನಲ್ಲಿ ಬರೋಬ್ಬರಿ 33.26 ಕೋಟಿ ರೂ. ಮೌಲ್ಯದ ಹೊಸ ಮನೆಯನ್ನು ಖರೀದಿಸಿದ್ದಾರೆ ಎನ್ನಲಾಗಿದೆ. ‘ಧುರಂಧರ್’ ಚಿತ್ರದ ಭರ್ಜರಿ ಯಶಸ್ಸಿನ ಬೆನ್ನಲ್ಲೇ ನಟನ ಈ ದೊಡ್ಡ ಆಸ್ತಿ ಖರೀದಿ ಗಮನ ಸೆಳೆದಿದೆ.
ಅಕ್ಷಯ್ ಖನ್ನಾ ಖರೀದಿಸಿರುವ ಆಸ್ತಿ ಮಲಬಾರ್ ಹಿಲ್ ರಸ್ತೆಯ 30 ಲಿಟಲ್ ಗಿಬ್ಸ್ ಪ್ರದೇಶದಲ್ಲಿದೆ ಎಂದು ರಿಯಲ್ ಎಸ್ಟೇಟ್ ಕಂಪನಿ ಸ್ಕ್ವೇರ್ ಯಾರ್ಡ್ಸ್ ತಿಳಿಸಿದೆ. ಮಹಾರಾಷ್ಟ್ರ ರಾಜ್ಯ ನೋಂದಣಿ ಇಲಾಖೆಯ ದಾಖಲೆಗಳನ್ನು ಪರಿಶೀಲಿಸಿದ ಬಳಿಕ ಈ ಮಾಹಿತಿ ಬಹಿರಂಗವಾಗಿದೆ. ಐಷಾರಾಮಿ ಅಪಾರ್ಟ್ಮೆಂಟ್ ಆಗಿರುವ ಈ ಆಸ್ತಿಯಲ್ಲಿ ಮೂರು ಕಾರುಗಳನ್ನು ನಿಲ್ಲಿಸಲು ಪಾರ್ಕಿಂಗ್ ವ್ಯವಸ್ಥೆಯೂ ಇದೆ ಎನ್ನಲಾಗಿದೆ.
ನೋಂದಣಿ ದಾಖಲೆಗಳ ಪ್ರಕಾರ, ಅಕ್ಷಯ್ ಖನ್ನಾ ಖರೀದಿಸಿರುವ ಆಸ್ತಿಯ ಮೌಲ್ಯ 33.26 ಕೋಟಿ ರೂ. ಎನ್ನಲಾಗಿದೆ. ಈ ವ್ಯವಹಾರದ ನೋಂದಣಿ ಪ್ರಕ್ರಿಯೆ ಇದೇ ತಿಂಗಳು ಪೂರ್ಣಗೊಂಡಿದೆ. ಆಸ್ತಿಗಾಗಿ ಬರೋಬ್ಬರಿ 1.99 ಕೋಟಿ ರೂ. ಸ್ಟಾಂಪ್ ಡ್ಯೂಟಿ ಪಾವತಿಸಲಾಗಿದೆ. ಇದರ ಜೊತೆಗೆ 30,000 ರೂ. ನೋಂದಣಿ ಶುಲ್ಕವನ್ನೂ ಪಾವತಿಸಲಾಗಿದೆ ಎಂದು ವರದಿಯಾಗಿದೆ.
ಅಕ್ಷಯ್ ಖನ್ನಾ ಇತ್ತೀಚೆಗೆ ಆದಿತ್ಯ ಧಾರ್ ನಿರ್ದೇಶನದ ಧುರಂಧರ್ ಚಿತ್ರದಲ್ಲಿ ವಿಭಿನ್ನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಸಿನಿಮಾದಲ್ಲಿಅಕ್ಷಯ್ ಖನ್ನಾ ರೆಹಮಾನ್ ದಕೈತ್ ಎಂಬ ಖಳನಾಯಕನ ಪಾತ್ರವನ್ನು ನಿರ್ವಹಿಸಿದ್ದರು.
ಧುರಂಧರ್ ಎರಡು ಭಾಗಗಳಾಗಿ ಮೂಡಿಬಂದಿದ್ದು, ಎರಡೂ ಭಾಗಗಳು ಒಟ್ಟಾಗಿ ಭರ್ಜರಿ ಕಲೆಕ್ಷನ್ ಮಾಡಿವೆ ಎಂದು ವರದಿಯಾಗಿದೆ. ಚಿತ್ರದ ಯಶಸ್ಸು ಅಕ್ಷಯ್ ಖನ್ನಾ ಅವರ ವೃತ್ತಿಜೀವನದಲ್ಲೂ ಚರ್ಚೆಗೆ ಕಾರಣವಾಗಿತ್ತು. ವಿಶೇಷವಾಗಿ ಪಾತ್ರ ಮತ್ತು ಅಭಿನಯದ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಸಾಕಷ್ಟು ಚರ್ಚೆ ನಡೆದಿತ್ತು.
ಬಾಲಿವುಡ್ನಲ್ಲಿ ಆಸ್ತಿ ಖರೀದಿ ಹೊಸದೇನಲ್ಲ. ಮುಂಬೈನ ಪ್ರಮುಖ ಪ್ರದೇಶಗಳಲ್ಲಿ ನಟ-ನಟಿಯರು ಕೋಟ್ಯಂತರ ರೂಪಾಯಿ ಮೌಲ್ಯದ ಮನೆ ಮತ್ತು ಅಪಾರ್ಟ್ಮೆಂಟ್ಗಳನ್ನು ಖರೀದಿಸುತ್ತಿರುತ್ತಾರೆ. ಇದೀಗ ಈ ಪಟ್ಟಿಗೆ ಅಕ್ಷಯ್ ಖನ್ನಾ ಅವರ ಹೆಸರೂ ಸೇರ್ಪಡೆಯಾಗಿದೆ.
ಧುರಂಧರ್ ಚಿತ್ರದ ಯಶಸ್ಸಿನ ನಂತರ ಅಕ್ಷಯ್ ಖನ್ನಾ ಹೊಸ ಮನೆ ಖರೀದಿ ಸದ್ಯ ಬಾಲಿವುಡ್ ಮತ್ತು ರಿಯಲ್ ಎಸ್ಟೇಟ್ ವಲಯದಲ್ಲಿ ಚರ್ಚೆಯ ವಿಷಯವಾಗಿದೆ. ಮಲಬಾರ್ ಹಿಲ್ನಂತಹ ಪ್ರತಿಷ್ಠಿತ ಪ್ರದೇಶದಲ್ಲಿ 33.26 ಕೋಟಿ ರೂ. ಮೌಲ್ಯದ ಆಸ್ತಿ ಖರೀದಿಸಿರುವುದು ನಟನ ಅಭಿಮಾನಿಗಳ ಗಮನವನ್ನೂ ಸೆಳೆದಿದೆ.
